Read Khumi Chin TARA CHIH NAI KEUNGCHI 13 Bible Online

TARA CHIH NAI KEUNGCHI 13 - Khumi Chin bible

TARA CHIH NAI KEUNGCHI 13

¹Israela chengchi ly ARENG ai tiu nai kamngo sa taleang bi bo. Hunai deaungkho y mymy ly nichi ai, Philistia chengchi my saneng vui palyhrei peang nai avum hai bo.

²Huni neng khala Zorath mary i Dan cheng theaung Manon napi nai khumi leaungrei awm. Ni i aju ly teng vui nai deaungkho y, cho chanau ngo thai y.

³ARENG i kani pri amtaw thau nai ly huni neampachy teng y amteng i, “Nang ly mana khala py cho chanau ngo pajau y teu i py, kra y naimy deaungdi aniu ai i, chapo tapen ai.

⁴Hunai deaungkho y kreip hang hawi mhm-rah ly mana khala py nei moh, Jah ai tla nai teicha teinei ngiereichi py amkyn ba.

⁵Nang ly chapo tapen chum baly ni i sam mana khala py, vau pi vui moh. Ati mana nai mo nabaly, huni deaungdi ly tapen khyp khala i dengdairei Nazari[2]kamkawm lawm i, Tameuh teng y au yb nai khumi ne nai deaungkho y ne. Ni ly Israela chengchi ai, Philistia chengchi kiu i nai atleu nai amteaung ai,” napi.

⁶Naibaly huni neampachy ly juvo teng y, “Tameuh i khumi leaungrei ly kai teng y ang jeu; ni ly kani pri i amtaw thau kamta ka-jei awm nai rym-ah awm; kai ly ni teng y ‘nang ly ma i jeu nai mo?’ nanai deng y. Ni my py mymy i amyn kai ai thui pi y.

⁷Na i py kai ly deaungdi aniu ai i, chapo tapen ai naini kai teng y ang thui pi angchi khyp bo. Huni deaungdi heng nai sala ryrei ly Nazari kamkawm lawm ai i, Tameuh teng y au nai khumi lawm ai. Kai ai kreip hang py, mhm-rah py nei y ai nai hawi jah ai avo nai teicha teinei ngiereichi ai amkyn ai nai ang thui pi,” napi.

⁸Huna nai khala Manon ly “Aw ARENG, nangmy pato nai khumi ai pahen parai naimy, kaichi teng y pato pi bi kyh ly chapo tapen nai khala kaichi mana sa ai mo nanai py, leu pei kyh,” nanai chiu sa.

⁹Tameuh my py Manon i hnei takeng nai kamta sa pi nai deaungkho y, mymy i kani pri amtaw thau nai ly li sa nai meingtymra y ateh nai neampachy teng y tym bi. Huna nai khala ni i juvo Mano ly ni hawi vanrei by y.

¹⁰Huna nai y ni ly vaimy angpreng iy, mymy i juvo teng y, “Jangvai kai teng y ang jeu nai khumi ly vai, ang jeu bi bo,” napi.

¹¹Manon ly ang thau i, my i aju nithun abang iy ni teng y, “Nang ly kai i aju hawi leu arum nai khumi ne a? " nanai deng. “Ne na a” nanai ni my pathang.

¹²Naibaly Manon my ni teng y, “Tumbaly nang i thui nai kamta ne khyp nai khala, huni deaungdi ly ati sa ai mo? " nanai deng.

¹³ARENG i kani pri amtaw thau naimy ly ni teng y, “Nang i aju ly kai i thui pi nai ngiereichi hawihai palai sa ai nai tla.

¹⁴Neampachy ly kreip angjyn keung i nga nai ngiereichi cha ai nai tlo y; kreip hang py, mhm-rah py nei ai nai tlo y. Jah ai tla nai teicha teineichi py, amkyn ai nai tla. Ni ly kai i thui pi naichi sa ai nai tla,” napi.

¹⁵Manon ly ni ai, ARENG i kani pri amtaw thai, nanai pany y nai deaungkho y ni teng y, “Pahen parai naimy tako vui moh rai ba; nang i vui mi-icho harei an so pi rai si,” napi. Na i py kani pri amtaw thau naimy ni teng y, “Kai ly kang awm pi teu i py, nang i pacho nai teicha teinei kang cha pi ai ny y leang; nang ly teicha teineichi sa ai nai ngai lawh baly, huni ai leng patlum nai kapathypra palawn iy, ARENG teng y talam ba,” napi.

¹⁷Manon my ni teng y, “Kai ly nang i amyn pany ai nai ngai; huna khala naini nang i leuchi teng khyp, nanai pany ai i, nang ai kaichi my tahm pasang ai,” napi.

¹⁸Kani pri amtaw thau naimy, “Ati mana nai y kai i amyn pany ai nai ngai mo? huni ly lyh ai hawi parai nai amyn ne,” napi.

¹⁹Hunaibaly Manon ly mi-icho harei hawi, teicha teinei katalamra ai lengseaung maicham salo y khai iy, lyh ai hawi naichi sa nai ARENG teng y talam bo.

²⁰Maicham i nai maikadeuchi sau nai thym khala, ARENG i kani pri amtaw thau nai ly maikadeu theung i dengdairei, kani mang y lyn kalau nai Manon ni aju juvo niu hawi. Huna khala naini huni khumi ly kani pri amtaw thau ne, nanai Manon pany bo. Hunaibaly nini aju juvo leaung nyhrei ly khaileaung y ambeu hawi. Huni bo y nini ly kani pri amtaw thau ai mana khala py, niu hawi ali bi y leang bo.

²²Manon my mymy i aju teng y, “Ani ly Tameuh ai niu hawi lawh bo i, meitang khyp dei ai,” napi.

²³Na i py aju my,” ARENG ly ani ai dei hai ai nai ngai lawh teu baly, ani i talam naichi kawn pi ai ny y; hina nai leuchi py, hini neng khala ang thui pi ai ny y,” napi.

²⁴Huni neampachy ly chapo tapen i, huni deaungdi ai Samson, nanai amyn pathi hawi bo. Huni deaungdi ly veangryh veangryh i, ARENG my ni ai amtheaung hai bo.

²⁵Naibaly deaungdi ly Zorath mary hawi Setola mary sala, Dan i tai naira y awm nai thym khala, ARENG i sa thai naira ly ni ai atho awm hai amteaung bo.