Read Khumi Chin TARA CHIH NAI KEUNGCHI 17 Bible Online

TARA CHIH NAI KEUNGCHI 17 - Khumi Chin bible

TARA CHIH NAI KEUNGCHI 17

¹Vaichi khala amyn Mikha napi nai khumi leaungrei ly Ephraim mawitleaung pri y awm nai ne.

²Ni ly my i amhm teng y, “Nei, nang i tangkacho sang atlo chungvairei tama vui nai khala y, nang i pasawi nai ly kai thai khyp nai ne. Khen cham, huni tangka ly kai teng y awm; kai la nai ne,” napi. Ni i amhm my, “Deang awi, ARENG ly nang ai amtheaung hai sy!,” napi.

³Ni ly huni tangka ai amhm teng y pei ali teang bo. Huna nai khala amhm my ni teng y, “Deang awi, amsawi lawi y ai nai kaimy huni tangka ly ARENG teng y talam ai; tangka hawi mawm nai dengkeaung myn harei sa naira y, huni tangka teaung ai i, nang ai kang pei teang ai,” napi.

⁴Chapo my huni tangka lo y naimy, amhm teng y pei pi ali teang bo. Hunaibaly amhm ly tangkacho chungvai nyhrei ai, tangka thip kawp nai keung teng y pei i, dengkeaung hawi myn harei sa hai iy, tangka hawi mawm hai typ bo. Huni myn ly Mikha i yhm y khai nai ne.

⁵Hini khumi Mikha napi nai teng y ly mymy i vui chiu sa nai yhm awm; ni ly mynchi hawi Ephod harei sa iy, my i chapo leaungrei ai my i vui pathyp pi nai keung y khai bo.

⁶Huni neng khala ly Israela chengchi theung y samrang by y leang rai; khumi luteng ly amy ngai nai kamta sa u nai ne.

⁷Huni neng khala y Juda pri Bethlehem mary y awm nai Levi theaung thawndeang leaungrei ly

⁸takhra mary ha harei mang y awm ai nai, Bethlehem mary i dengdairei theu iy, Ephraim mawitleaung pri y awm nai Mikha i yhm y tym.

⁹Mikha my ni teng y, “Nang ly ma mang i dengdairei jeu nai mo?,” nanai deng. Ni my, “Kai ly Juda pri Bethlehem mary i dengdairei kang jeu nai Levi theaung khumi ne i, awmra meingtym hau nai ne,” nanai pathang.

¹⁰Mikha my ni teng y, “Kai hawi vanrei awm ba; kai ai tau pei nai keung hawi pathyp pi nai keung y awm ba; nang ai sanengrei y tangkacho horei hawi ateaungchi py, teicha teinei py kaimy kang pei ai,” napi.

¹¹Naibaly Levi theaung thawndeang ly Mikha hawi vanrei awm ai nai ngai bo; ni ly Mikha i chapo kamta awm nai ne.

¹²Mikha my ni ai pathyp pi nai keung kalop sa hai i, Mikha i yhm y awm bo.

¹³Mikha my, “Vai, kai ly Levi theaung khumi leaungrei ai, kaimy i pathyp pi nai keung kalop sa ai nai kanga bo; hunai deaungkho y ARENG ly cheaungkhangra y kai ai lo-pa kau haiai,” nanai thui bo.