Read Khumi Chin TARA CHIH NAI KEUNGCHI 3 Bible Online

TARA CHIH NAI KEUNGCHI 3 - Khumi Chin bible

TARA CHIH NAI KEUNGCHI 3

¹Huna nai y ARENG ly Kanan pri y tavai atiu naira y abawi vai y nai Israela chengchi ai cham ai nai, huni pri theung y khumi cheng theaung phyreichi ai khai pi jo nai ne.

²Mymy huna nai kamta sa nai ly Israela cheng kangthau tleireichi ai tavai leaungsai amtiu ai nai dawn hai nai ne. Vaichi khala tavai keung y abawi vai y nai khumichi ai patiu pi ai nai dawn hai patyp bo.

³Huni pri theung y awm jo rai nai khumi chengchi ly Philistinchi i mary pangrei ra i Philistin khumi, Kanan khumi bawibawichi, Sidon khumichi hawi Bala Heramon dengdairei, palo parai nai Hamath mawi aleaung mang y khrairei awm nai, Lebanon mawi y awm u nai Hivit khumichi ne.

⁴Israela chengchi ly mychi i amsi pajochi teng y, Mosi dengdairei ARENG my pei nai Reita leuchi ai tangai mo, tangai y mo nanai pany ai nai, mymy ly huni khumichi ai teaung iy, cham ai ngai nai ne.

⁵Hunai deaungkho y Israela chengchi ly Kanan chengchi, Perizi chengchi, Amori chengchi, Hiti chengchi, Hivit chengchi, Jebusi chengchi hawi vanrei awm u nai ne.

⁶Nichi ly huni khumichi hawi vuinai ala iy, nichi i tameuhchi ai chiu u bo.

⁷Israela chengchi ly mychi i ARENG Tameuh ai tami u veng bo; mymy i tlang tleaung y tamang u i, Bala tameuh hawi Aser tameuhchi ai chiu u.

⁸Hunai deaungkho y ARENG ly Israela chengchi ai katho theu i, Mesopotamia samrang Kusen Rishathaim ai, nichi i tlang tleaung y tavai eaung hai i, ni my saneng tajarei peang.

⁹Naibaly Israela chengchi ly ARENG ai kadeaung u i, mymy ly nichi ai atleu ai nai, khumi leaungrei ai pato pi bo. Huni khumi ly Kaleb i amnau Kena i chapo Othniela ne.

¹⁰ARENG i phailo ly ni i tlang tleaung y tym i, ni ly Israela chengchi ai lu sa nai keung y lawm bo. Othniela ly tavai tiu ai nai chei i, ARENG ly ni ai eaung naira pei nai deaungkho y, Mesopotamia pri i samrang ai eaung vui nai ne.

¹¹Huni pri ly saneng vui palyhrei awmnemra nga i, hunaibaly Othniela ly dei bo.

¹²Israela chengchi ly ARENG i tlang tleaung y kamngo sa u bi bo. Hunai deaungkho y mymy ly Moba samrang Ekalon ai, Israela chengchi tleaung y atho awm hai.

¹³Ekalon ly Ammon chengchi hawi Amalek chengchi ai pangym iy, Israela chengchi ai tiu nai pajau vui i, chamleaung keung mary napi nai Jeriko mary ai nga vui bo.

¹⁴Israela chengchi ly saneng holai tajarei samrang Ekalon teng y miseaung achei u bo.

¹⁵Naibaly Israela chengchi ly ARENG ai vo naimy kadeaung u i, mymy ly nichi ai atleu ai nai khumi leaungrei ai pato pi. Huni khumi ly Benjamin cheng theaung, Kera i chapo langvawimi Ehu ne. Israela chengchi ly Ehu ai, Moba samrang Ekalon teng y langseaungchi hawi pato u bo.

¹⁶Ehu ly my i vui miurei awm iy, bo nyhrei awm nai haisau harei sa; huni haisau ai my i lamtang phai, baichu ateaungchi anui y kawm tabom nai ne.

¹⁷Naibaly huni langseaungchi ai khumi veung hawi parai nai Ekalon teng y syn pi bo.

¹⁸Ehu ly huni langseaungchi talam pi chum baly, langseaung angjeaung nai khumichi ai yhm mang y pato teang.

¹⁹Na i py Ehu ly Kilakala sahawi i lengseaung mynchi awm naira dengdairei ali teang iy, Ekalon teng y chei ali teang i, “Samrang nang teng y leu kamsyh thui pi ai nai awm,” napi. Huna nai y samrang ly miseaungchi teng y, “Kaimy ni tlairei avum ai nai awm i, theu u pawn!,” nanai leu pei i, nichi bawibawi ly theu u pawn bo.

²⁰Naibaly samrang ly kanibi amka reng nai salo keh i sambeu y, mymy tlairei ateh nai thym khala Ehu chei i ni teng y, “Samrang, nang i vui Tameuh teng i satang amti pi ai nai awm,” napi. Samrang ly ang thau i angdo bo.

²¹Huna nai khala Ehu ly my i langvawi kiu hawi, lamtang phai y heu nai haisau aphiu iy samrang i kajeu y thunvau bo.

²²Haisau ly taveang hawi raurei a-up na i, thau my amjawp hai cheng bo. Ehu ly huni haisau aphiu y; haisau ly samrang i nithun mang phai nyhrei sala y prida na bo.

²³Naibaly Ehu ly angam mang y theu i, katheu ai lakeusi angtleang iy,

²⁴theu vui bo. Miseaungchi tym u teang nai khala, katheu ai lakeusi angtleang cheng nai niu u; na i py nichi my samrang ly theung mang y awmnem ngaw khyh, nanai dawn u.

²⁵Nichi angam mang y avo nai ryrei ajeng i py, katheu ly am-eaung y nai deaungkho y, nichi my saw la iy katheu paeaung u. Huna nai khala mychi i areng ly ang-saveaung y atlym naimy dei nai niu u bo.

²⁶Ehu ly huna nai nichi ajeng u nai thym khala theu iy angpreng veng bo. Ni ly lengseaung mynchi awm naira katlen vui i, Serah avang mang y tleaung vui nai ne.

²⁷Ni ly Ephraim mawi aheung y tym nai khala tavai thau ai nai baw eng i, Israela chengchi ly ni i nithun abang u iy, mawi aheungchi mang satla u kathiu bo.

²⁸Ni my nichi teng y, “Kai nithun abang u! ARENG ly nangchi i paleung ka-e Moba chengchi ai eaung ai nai pei bo,” napi. Hunaibaly Israela chengchi ly mawi i nai satla kathiu iy, Ehu teng y abang u. Moba chengchi angpeang nai Jordan tavo kady tuivum nga vui nai ne; paleung ka-echi leaungrei py tavo angpeang ai nai ngo y.

²⁹Huni kani y Moba tavaimi vawi patyp nai leaung meaung kateaungrei awmvi nai ai padei u bo; nichi leaungrei py tleaung u y.

³⁰Huni kani y Israela chengchi my Moba chengchi ai tiu nai pajau nai bo baly, huni pri y saneng vui tariurei awmnem naira nga u bo.

³¹Huni bo y lu sa nai miteaung keh ly Anath i chapo Shamkar ne; ni ly cheaungvawi kamsui hawi Philistin cheng leaung chungvai tariureichi ai padei i, Israela chengchi ai atleu bo.