Read Khumi Chin TARA CHIH NAI KEUNGCHI 4 Bible Online

TARA CHIH NAI KEUNGCHI 4 - Khumi Chin bible

TARA CHIH NAI KEUNGCHI 4

¹Ehu dei nai bo y Israela chengchi ly ARENG i tlang tleaung y kamngo sa u bi bo.

²Hunai deaungkho y ARENG ly Hazor mary ai peang nai keung, Kanan khumichi i samrang Jabin ai tavai eaung hai bo. Huni samrang i tavailu ly cheng takhra khumichi awm nai Haroset mary i Sisera ne.

³Samrang Jabin teng y tamo ka-ri chungvai takawrei awm; ni ly Israela chengchi ai saneng apomrei khrukhra hai iy, ana pumpi naimy peang bo. Huna nai khala Israela chengchi ly kasabawmra nga ai nai vo naimy, ARENG ai kadeaung u nai ne.

⁴Hunaibaly vaily Lapidoth i aju Deborah ly amo leaungrei ne i, Israela chengchi i vui y tara chih nai keung py ne.

⁵Ni ly Ephraim mawi meingtym Bethela mary hawi Ramah mary sala y awm nai, chamleaung keung anui y ateh reng nai ne. Israela chengchi py tara leu amcheang thai ai nai, ni teng y chei u reng.

⁶Kanirei nai khala ni ly Naphtali khu ka-peang, Kedesh mary dengdairei Abinoam i chapo Barak ai palau iy, Israela chengchi i ARENG Tameuh my, ‘Nang ly Naphtali nupai hawi Zebulon nupai theung i khumi leaung meaung kateaungreichi ai palau iy, Tabor mawi mang y chei ai nai tla.

⁷Nang ai tiu hai ai nai samrang Jabin i tavailu Sisera ai kishon tavo mang y kaimy hawi ai. Ni teng y ka-richi hawi tavaimi risachi abawi ai. Na i py nang ai kaimy kang eaung hai ai,’ nanai nang ai leu kang pei bo,” napi.

⁸Naibaly Barak my, “Nang ly kai hawi vanrei chei ai nabaly, kai chei ai; na i py nangmy kai hawi vanrei chei hai y baly, kai py chei y leang bo,” nanai pathang.

⁹Deborah my py, “Hawi mang, kai ly nang hawi vanrei chei ai; na i py nang chei nai tahm awm ai ny y; ati mana nai mo nabaly ARENG my Siresa ai neampachy i kiu y au ai nai deaungkho y ne,” napi. Naibaly Deborah ly Barak hawi vanrei, kishon tavo mang y chei bo.

¹⁰Barak ly Zebulon nupai hawi Naphtali nupaichi ai Kadesa mary mang y hawi i, ni teng y khumi leaung meaung kateaungrei abang u bo. Deborah py ni hawi vanrei abang nai ne.

¹¹Huna nai khala Keneti cheng Heba ly Kadesa mary sahawi y awm nai Ngopraibiu keung anui y, my i vui tai sa bo. Ni ly Mosi i naisa Hobab i kangpreang, Keneti nupai theung i dengdairei ang pyn nai khumi ne.

¹²Sisera my Tabor mawi mang y lyn nai satang thai nai khala,

¹³ni ly tamo ka-ri chungvairei hawi, my i khumi bawibawichi ai palau iy, cheng takhrachi awm nai Haroset mary dengdairei, kishon tavo mang y pato nai ne.

¹⁴Naibaly Deborah my Barak teng y, “Nang chei ly ARENG my nang ai ang hawi bo; vaini my mymy ly nang ai, Sisera ai eaung ai nai pei bo,” napi. Hunai deaungkho y Barak ly my i tavaimi leaung meaung kateaungreichi hawi Tabor mawi dengdairei satla kathiu bo.

¹⁵Naibaly paleung ka-echi ai tiu i, ARENG my Sisera i tamo ka-richi hawi tavaimichi ai ahei hai phro nai deaungkho y, Sisera ly my i ka-ri tleaung i nai satla iy, angprengvui nai ne.

¹⁶Barka my py my i ka-richi hawi tavaimichi py cheng takhra khumichi awm nai Haroset mary y tym pa-rei hui i, Sisera i tavaimichi ly leaungrei py tleaung y na pa-rei dei u nai ne.

¹⁷Sisera ly Kaneti cheng Heba i aju Jaela i tai mang y angpreng vui bo. Ati mana nai mo nabaly Hazor samrang Jabin hawi Heba yhm dengtheungchi ly adyh adawi nai deaungkho y ne.

¹⁸Jaela ly Sisera ai lamchung ai nai theu i ni teng y, “Jeu ba, kai i tai theung y kun; jei moh,” napi. Naibaly tavailu ly kun i, Jaela my ni ai kalaka kangdeng y heu vui bo.

¹⁹Ni my py Jaela teng y, “Pahen parai naimy tui nei ai nai pei kyh, kai tui ahai parai,” napi. Jaela ly sikanu khai nai mawipeih adym paeaung pi iy, sikanu nei hai nai bo baly, ni ai heu vui teang bo.

²⁰Naibaly Sisera my Jaela teng y, “Nang ly tai katheu pa-khora y typ ba; leu kabeaung y tai theung y khumi leaungrei awm a? nanai deng nai khumi awm lawh baly, ‘by y,’ nanai pathang ba,” nanai leu taviu yb bo.

²¹Sisera ly khri pa-rei akawm nai deaungkho y, aseaung iy i ngym vui bo. Naibaly Jaela ly saki hawi kanih yhm thangra thengbeang kamsui harei la iy Sisera teng y chei jyn i, thengbeang kamsui hawi ni i naipi prida iy, khaileaung y acheaung na pa-rei tahen thla bo.

²²Barka ly Sisera ai hau nai tym khala, Jaela my lamchung nai theu i ni teng y, “Tai theung y kun ba, nang i hau nai khumi ai kang patei ai,” napi. Naibaly Barka ly Jaela hawi vanrei tai theung y kun nai khala, Sisera ly thengbeang kamsui naipi prida naimy dei su nai niu bo.

²³Huni kani y Tameuh ly Kanan samrang Jabin ai pajau ai nai Israela chengchi ai eaung hai bo.

²⁴Nichi ly huni samrang sum ai nai pa-rei, atho sa-ra sa-ra iy khrikhri pa-rei tiu u nai ne.