Read Khumi Chin TARA CHIH NAI KEUNGCHI 5 Bible Online

TARA CHIH NAI KEUNGCHI 5 - Khumi Chin bible

TARA CHIH NAI KEUNGCHI 5

¹Huni kani y Deborah hawi Abinoam i chapo Barak ly hina nai khulym thui hawi nai ne.

²ARENG ai palo u! Israela chengchi ly tavai atiu ai nai leu pacheang yb bo. Khumi mipuichi py paleung apei parai i, amo theu naimy abawi u.

³Samrangchi awi, tangai u! Pri peang nai keungchi awi, adawn u patyp! Israela chengchi i ARENG Tameuh i nang parai nai sai palo ai nai kai ly khulym thui naimy taro beu ai.

⁴Aw ARENG, Sira mawi salo y nang jeu iy, Edom pri i dengdairei tavai thau nai khala, khaileaung amchyh na i, kani mang my kani nai hai. Khupanymchi dengdairei kanitui tla bo.

⁵Mawichi ly Sinai mawi i ARENG Israela chengchi i ARENG Tameuh i mo y ahyn na bo.

⁶Anath i chapo Shamka deung y py, Jaela deung y py, khuleaung chei naichi ly huni pri mang tako u y leang bo. Khuleaung chei naichi ly lam takitavaichi mang naini tako u nai ne.

⁷Israela pri i marychi ly avang jimeung lawm veng bo; Kai Deborah ly Israela chengchi i amhm kamta lawm y rai khala, huni marychi ly avang jimeung lawm yb veng bo.

⁸Huni bo y Israela chengchi ly tameuh takhrachi ai vawi u takhra nai khala, huni pri y tavai tiu u bo. Israela pri y khumi meaung kateaung palyhrei awm nai theung y khupui harei, ti y baly tivi harei syn nai khumi awm a?

⁹Kai ly Israela tavai luchi teng y py, paleung apei naimy tavai theung y kun u nai khumi mipuichi teng y py, paleung bie nai ne. Hunaibaly ARENG ai palo u!

¹⁰Atangra salo y ateh iy, keaungngo kano kasau kangleung atang u nai khumichi awi, chei nai tleirei y kheu mang tako nai khumichi awi, hini satang adawn pasym u.

¹¹Tangai u! tuikanchi sahawi y tukulula nai khumi mipuichi ly ARENG i eaung nai pawi satang py, Israela chengchi i eaung nai pawichi satang py, thui u nai ne. Huna nai khala ARENG i khumichi ly mymychi i marychi dengdairei amsa u bo.

¹²Mo mang y amtheung, Deborah awi, momang y amtheung ba! Mo mang y amtheung! khulym thui ly! Momang y amtheung! Abinoam i chapo Barak awi, mo mang y lyn; nang i langheng hawi naichi ai hawi ba!

¹³Naibaly ka-ym awm nai khumichi ly mymychi i luchi teng y jeu u bo; ARENG i khumichi ly tavai tiu ai nai angveirym naimy, ni teng y jeu u bo.

¹⁴Nichi ly Benjamin cheng theaungchi nithun abang iy, Ephraim khu ka-peang dengdairei, leaunghawi theung mang y satla u. Tavai lu arengchi ly Makhira cheng theaung theung i nai py, tavai luchi ly Zebulon cheng theaung theung i nai py, theu u bo.

¹⁵Iskara cheng theaungchi i lu sa naichi ly Deborah hawi vanrei abang u; Iskara cheng theaungchi ly Barak hawi vanrei abang u; nichi ly Barak hawi vanrei abang iy, leaunghawi theung mang y satla u bo. Na i py Ruben cheng theaungchi ly adyh adawi y nai deaungkho y, abang ai nai thui khyp pajau y.

¹⁶Nichi ly ati mana nai y beramchi hawi vanrei, awm u jo lawh mo? Beram kanghuchi ly beram typ nai keungchi my, palau nai raawi tangai ai ngai u nai y a? Ruben cheng theaungchi adyh adawi y nai ly ne. Nichi ly mychi i paleung theung y thui khyp pajau y.

¹⁷Kad cheng theaungchi ly Jordan tavo nisi mang y awm u jo; Dan cheng theaungchi py, samphochi sahawi y awm u jo. Aser cheng theaungchi ly pangli peang sahawi y awm u jo nai ne.

¹⁸Na i py Zebulon khu hawi Naphtali khu i khumichi ly tavai keung y mymychi i tlang areu naimy atho sa u bo.

¹⁹Mekido micheaung sahawi i Taanach mary ra y, samrangchi ly jeu iy atiu u; Kanan samrangchi ly tavai atiu u i py, tangka lawm ai nai ly ngo u y.

²⁰Ka-si taukichi ly kani mang y atiu u; nichi ly kani khusang mang y amki prei nai thym khala, Sisera ai tavai tiu u bo.

²¹Tui ho parai nai kishon tavo ly lem na i, paleung ka-echi ai amjau hai pawn bo. Kai ly tavai thau ai, atho haiho hawi mo mang y lyn ai.

²²Huna nai khala keaungngochi ly atho sa nai ataleh iy, kheu muikenchi hawi khaileaung kalai piu na.

²³ARENG i kani pri amtaw thau my, “Meroza mary ai pasawi u; huni mary i khumichi ai pasawi u. Nichi ly ARENG mang y asa ai nai jeu u y; mymy i vui atiu ai nai tavaimichi jeu u y,” nanai thui.

²⁴Keneti cheng Heba i aju Jaela ly kanih yhm y awm nai neampachychi theung y taham hawi keh.

²⁵Sisera ly tui nei ai nai hnei i py, Jaela my sikanu pei pi; apu parai nai khau hawi sikanu pei pi nai ne.

²⁶Ni ly kanih yhm thang nai thengbeang kamsui harei ai, kiu Makengrei mang la iy, Makengrei mang ly kalop sa hai nai saki harei syn iy, Sisera i lu y tahen bo; thengbeang kamsui ly Sisera i lu prida vui nai ne.

²⁷Sisera ly atlym i, Jaela i kheu keung y angto y na. Ni ly khaileaung y atlym i, Jaela i kheu keung y dei bo.

²⁸Sisera i amhm ly thaibeng pa-kho mang angdeang; ni ly amhi mawi angpang nithun mang khen ryry. “Ni i ka-ri ly ati mana nai y patyh lawh mo?” “Ni i keaungngochi ly ati mana nai vawi patyh lawh mo?” nanai tangam naimy thui bo.

²⁹Ni i khumi kacheng, samrang yhm i khumichi my,

³⁰“Nichi ly patiu iy phy amji ai nai vawnsaichi hau u ai; tavaimi leaung leaungrei i vui, anglo leaungrei leaung nyhrei ai py, Sisera i vui vang kateng ateaung hawi, samrangnu i vui kaneaung awi ai nai pau thun nai ateaungchi py, hau nai deaungkho y ne lym ai,” nanai pathang u i, mymy py adawn pasym veangveang nai ne.

³¹Aw ARENG, nang i paleung ka-e bawibawichi ly hina nai kamta sum u sy; na i py nang i ahawichi ly achaw deaung nai kani si nai kamta, angvang phang sy! Naibaly Kanan pri y saneng vui palyh ryrei tlamsa nai ne.