Read Khumi Chin TARA CHIH NAI KEUNGCHI 6 Bible Online

TARA CHIH NAI KEUNGCHI 6 - Khumi Chin bible

TARA CHIH NAI KEUNGCHI 6

¹Israela chengchi ly ARENG ai kamngo sa u taleang bi bo. Hunai deaungkho y mymy ly nichi ai saneng saryhrei peang ai nai Midian chengchi teng y pei nai ne.

²Midian chengchi ly Israela chengchi tleaung y atho awm nai deaungkho y, Israela chengchi ly tapiu theung y py, takhra abyhra mawichi mang py aheu u bo.

³Israela chengchi i amti amjang pati nai tleirei y, Midian chengchi ly Amalek chengchi, khutaha pri y awm nai khumi chengchi hawi vanrei jeu iy, tiu u reng nai ne.

⁴Nichi ly Israela chengchi i khaileaungra tai u iy, tokalawi mang i Kaza mary sahawi tengpang y tym pa-rei, amti amjangchi taphra u reng nai ne. Nichi ly beramchi, sichi, keaungngo kano kasauchi hawi, awm nai ngiereichi la pi pawn nai deaungkho y, Israela chengchi i vui cha nei ai nai ati sai py by y na bo.

⁵Nichi ly mychi i kanih yhmchi, beramchi, sichi hawi vawi u ali teang reng nai ne. Nichi i nawi nai sai ly akhutama kanghuchi kamta ne. Nichi hawi mychi i kula-iuchi py, kati pajau y na pa-rei nawi na; nichi ly jeu u iy awm nai ngierei ai taphra u.

⁶Israela chengchi ly nichi ai amtang pajau u y.

⁷Hunaibaly Israela chengchi ly Midian chengchi my tiu naira i nai, kasabawmra nga ai nai ARENG teng y aeu iy takeng u bo.

⁸Naibaly mymy ly amo leaungrei ai nichi teng y pato pi bo. Amo dengdairei Israela chengchi i ARENG my, “Kai ly nangchi ai Aikupta pri miseaung i nai kang pahawi nai ne.

⁹Aikupta pri khumichi teng i nai py, hini pri y awm nai nangchi ai tiu nai khumichi teng i nai py, atleu pi bo. Nangchi theu u nai thym khala, nichi ai patheu pawn iy, nichi i pri ly nangchi teng y kang pei bo.

¹⁰Kai ly nangchi i ARENG Tameuh ne, nanai leu kang pei iy vai, nangchi awm nai pri i Amori chengchi my chiu nai tameuhchi ai, chiu u y ai nai reita kang pei. Na i py nangchi ly kai i leu tangai u y,” napi.

¹¹Naibaly ARENG i kani pri amtaw thau nai ly Ophra avang y jeu iy, Abieza nupai theung i khumi leaungrei, Joasa i ngopraibiu keung anui y ateh. Joasa i chapo Kideon ly mymy ai Midian chengchi my niu pajau y ai nai, kreip athai nip nai angawm theung y choh ati nai ne.

¹²Huna nai khala ARENG i kani pri amtaw thau nai ly ni i mo y amteng i ni teng y, “Atho awm nai khumi sorai awi, ARENG ly nang hawi vanrei awm na a!,” napi.

¹³Kideon my ni teng y, “Aw areng, ARENG ly kaichi hawi vanrei awm nai ne khyp nabaly, ati mana nai y hini patang naira tym hai lawh mo? ARENG ly mymy i khumichi ai, Aikupta pri i dengdairei pahawi nai saichi hawi, lyh ai awm nai saichi sa pi nai py, amsi pajochi my ang thui pi bo. Huni lyh ai awm nairachi ly ma mang y mo? ARENG ly kaichi ai khai su iy, Midian chengchi teng y ang-au su lawh ly!,” napi.

¹⁴Hunaibaly ARENG my, “Nangmy i atho haiho pui hawi chei iy, Midian chengchi teng i nai Israela chengchi ai atleu ba. Kaimy nang ai kang pato nai bo,” napi.

¹⁵Kideon my py, “Aw ARENG, kai ly mana nai Israela chengchi ai atleu pajau ai mo? Kai i nupaichi ly Manase cheng theaung theung y, atho di keh naichi ne. Kai py kaimy i yhm dengtheung theung y tahm by y; ati sai py ny y nai khumi teu,” nanai pathang.

¹⁶ARENG my, “Kai ly nang ai sabawm ai i, huni ly nang sa pajau ai; nang ly khumi leaungrei ai tiu pajau vui nai kamta, Midian chengchi ai rai y naimy tiu pajau ai,” napi.

¹⁷Kideon my, “Nang i kangai hawi avum ai nabaly, nang ly ARENG ne khyp, nanai ka-ma-ra harei patei ba.

¹⁸Nang teng y talam ai nai katalamra, kang tym hai y ryrei ly pahen parai naimy, hini meingtym i nai leh pi vui mo kyh ba, nanai takeng. Mymy py, “Nang jeu aliteang nai neng tym pa-rei kai awm jo ai,” napi.

¹⁹Hunaibaly Kideon ly my i yhm y vawi iy, mi-i cho harei tleh i theaung bo; angbo abawi y nai tako dei teaungnyh pa-thom sie tariurei hawi tako sa. Naibaly mi-i mawi ai takhura y, mi-i mawi byh hang ai laawm hareira y khai iy, kani pri amtaw thau awm nai ngopraibiu keung anui y syn i, ni teng y talam pi bo.

²⁰Kani pri amtaw thau naimy, “Mi-i mawi hawi tako la iy, hini lengseaung salo y khai ly mi-i byh hang lei,” napi. Kideon ly hunai kamta sa.

²¹Hunaibaly ARENG i kani pri amtaw thau nai ly kiu pheu iy, my i syn nai cheaungvawi meaung hawi, mi-i mawi hawi takochi ai teaung nai khala, lengseaung theung i nai mai kadeu theu i, mi-i mawi hawi takochi ai kang hai. Naibaly kani pri amtaw thau nai ly tama veng bo.

²²Huna nai khala Kideon ly mymy i avum nai ly ARENG i kani pri amtaw thau ne, nanai pany i, jei naimy hina nai thui; “Aw salo kangteng ARENG! kai ly nang i kani pri amtaw thau hawi, motha naimy avum lawh bo ly! " napi.

²³Na i py ARENG my, “Paleung awmnem naimy awm ba, jei moh; nang ly dei y leang mang,” napi.

²⁴Kideon ly huni meingtym y ARENG i vui maicham harei sa iy, “ARENG ly paleung awmnem naira ne,” nanai amyn pathi bo. (Huni maicham ly Abieza nupai i khu, Ophra avang y vaini khrairei awm.)

²⁵Huni vum y ARENG ly Kideon teng y, “Ngampo i si katai hawi ngampo my sa pi nai maicham taphra vui iy, huni maicham sahawi i kani anglo Aser ai pany jo nai ka-ma-ra ui nai dengkeaung keungchi paliu pawn.

²⁶Huni mawi tangbiu saleung y nang i ARENG Tameuh i vui maicham khaw pa-rei so ba. Huni bo y pa-nyh i si katai la iy, nangmy paliu vui nai kani anglo Aser ai pany jo nai ka-ma-ra ai theng palawn iy mai patawi ly talam ba,” napi.

²⁷Naibaly Kideon ly miseaung leaung horei ai palau iy, mymy ai ARENG my leu pei nai kamta sa hai bo. Ni ly my i yhm dengtheungchi ai py, mary i khumichi ai py jei nai deaungkho y, hinikalop ai kanithun y so vam y i vum y sa.

²⁸Khawn khutawi angthodyh mary i khumichi, i anglaw u nai khala nichi ly Bala tameuh i maicham hawi, kani anglo Aser ai pany jo nai ka-ma-ra dengkeaungchi atlym vui nai py, maicham kangtha salo y pa-nyh si katai leng patlum nai py niu u bo.

²⁹Nichi ly “Hini ly ami my sa nai mo?”, nanai mychi tengtawi adeng u i, Joasa i chapo Kideon my sa nai ne, nanai pany u bo.

³⁰Huna nai khala nichi ly Joasa teng y, “Nang i chapo Kideon ai padei ai nai patheu pi! Ni ly Bala i maicham hawi, huni sahawi i Aser ai pany jo nai ka-ma-ra dengkeaung keungchi paliu vui lawh bo ly " napi u.

³¹Na i py Joasa ly mymy teng jeu nai khumi bawibawichi teng y, “Nangchi ly Bala mang y asa u nai a? Ni i vui ama hai u nai a? Ni mang y asa nai khumi ngiereichi ly kanithun y naimy dei u ai. Ni ly tameuh tatang ne lawh baly amymy ai amo hai na sy. Taphra naira avum nai ly ni i maicham ne,” napi

³²Huni neng dengdairei Kideon ly Jerubala, nanai amyn nga bo. Ati mana nai mo nabaly Joasa my, “Bala ly amymy ai amo hai sy; taphra naira avum nai ly ni i maicham ne,” nanai thui nai deaungkho y ne.

³³Huna nai khala Midian chengchi, Amalek chengchi, khutaha meingtymra awm nai khumi bawibawichi ly akachu u iy, Jordan tavo angpeang u chum baly, Jezarela leaunghawira y anawn u bo.

³⁴ARENG i phailo ly Kideon teng y tym nai deaungkho y, ni ly Abieza nupai bawibawichi ai, mymy nithun abang u ai nai baw eng bo.

³⁵Manase khu ka-peang nyhreichira py, savaichi pato iy Manase theaungchi ai mymy nithun abang u ai nai palau. Ni ly Asa, Zebulon, Naphtali cheng theaungchi teng y py savaichi pato nai deaungkho y, huni khumichi py ni teng y jeu u bo.

³⁶Naibaly Kideon ly Tameuh teng y, “Nang ly kai ai teaung iy Israela chengchi ai atleu ai, nanai leu pei yb bo.

³⁷Kai ly choh ati nai khaileaungra y beram miu khai ai; khawn mang y ly beram mui tleaung y naini kadam tla hai iy, khaileaung y tlo y lawh baly nang ly Israela chengchi ai atleu ai nai, kai ai teaung angchi khyp nai bo, nanai pany ai,” napi.

³⁸Huna nai hnei takeng nai kamta ne khyp bo. Kideon ly khawn angthodyh ang thau iy beram mui mie cham baly, kadam tui ly angdeung harei kawi nai ne.

³⁹Naibaly Kideon ly ARENG teng y, “Kai ai kado theu hai mo kyh ba; vai, hini tlenrei hnei takeng ai nai pei kyh; beram mui hawi vai tlenrei cham ai nai pei ba. Hini tlenrei ly beram mui phuirawm iy, khaileaung ly kadamtui suipla sy,” napi.

⁴⁰Huni vum py Tameuhmy Kideon i hnei takeng nai kamta sa pi. Khawn mang y beram mui ly phuirawm iy, khaileaung ly kadam suipla nai ne.