Read Khumi Chin TARA CHIH NAI KEUNGCHI 7 Bible Online

TARA CHIH NAI KEUNGCHI 7 - Khumi Chin bible

TARA CHIH NAI KEUNGCHI 7

¹Kanirei nai khala Kideon hawi my i khumi bawibawichi ly khawn angthodyh ang thau iy, Harod micheaung peang y tai u bo. Midian chengchi i tai nai ly nichi i tosyh ngan Moreh mawi sahawi i leaunghawi theung y ne.

²ARENG my Kideon teng y, “Nang teng y abang nai khumichi ly vuikanai nawi ala nai deaungkho y, Midian chengchi ai eaung ai nai kang pei y; kang pei lawh baly, nichi ly mychi i atho hawi eaung nai teu nanai athang khai ai i, kai i saho y, nanai palawn y ai.

³Hunai deaungkho y ami py ne sy, ‘jei nai khumi ngierei ly mychi i yhm y ali u; kaichi ly hini Kilead mawi y awm jo ai,’ nanai khumichi teng y thai hai ba,” napi. Hunaibaly meaung kateaung nyh pa-thom sangnyhreichi ly yhm y vawi u bo. Na i py khumi leaung meaung kateaungreichi ly awm u jo rai.

⁴Huni bo y ARENG ly Kideon teng y, “Nang teng y awm nai khumi nawi ala rai; nichi ai tuivum y satlo hai; huni meingtym y nang i vui khumi phy nyhrei kang phy pi ai. Hina nai khumi ly nang hawi vanrei abang ai nai nga ai, nanai kaimy thui baly hini khumichi ly nang hawi vanrei chei ai nai nga ai. Hina nai khumi ly nang hawi vanrei abang ai nai ngo y, nanai kaimy thui baly, huni khumichi ly nang hawi vanrei chei ai nai ngo y,” napi.

⁵Kideon ly khumichi ai tuivum y satla hai chum baly, ARENG my ni teng y, “Huni khumichi theung y, ui kamta palai hawi tui palei iy nei nai khumichi hawi, kheukhu di iy meung naimy tui nei nai khumichi ai, phy nyhrei khai takhra ba,” napi.

⁶Naibaly kiu hawi bei iy palai hawi palei nai khumichi ly leaung chungvai thomrei awm; huni bo i khumichi ly kheukhu di iy meung naimy nei u naichi ne.

⁷ARENG my Kideon teng y, “Kai ly tui ai palai hawi palei iy nei nai khumi leaung chungvai thomreichi hawi, nang ai atleu iy Midian chengchi ai eaung hai ai. Takhra khumi bawibawichi ai, yhm mang y vawi ai nai leu pei,” napi.

⁸Hunaibaly Kideon ly teicha teineichi hawi, bawchi syn nai khumi leaung chungvai thomreichi bo i, takhra Israela chengchi ai ly yhm y vawi hai bo. Midian chengchi i tai ly ka-nem mang leaunghawi theung y awm nai ne.

⁹Huni vum ARENG my Kideon teng y leu pei nai ly “Angthau ly nichi i tai naira mang y tiu u; kaimy nang ai eaung hai ai mang.

¹⁰Na i py nang ly nichi ai tiu ai nai jei hyn lawh baly, nang i miseaung Purah ai palau iy, huni tavaimichi tai naira mang y chei kathiu.

¹¹Nichi katheu u nai leu, nang thai ai mang. Huna nai khala nang ly tavai atiu ai nai sorai paleung awm ai,” napi. Naibaly Kideon ly my i miseaung Purah hawi vanrei, paleung ka-echi i tai naira kachawn mang y chei hawi bo.

¹²Midian chengchi, Amalek chengchi hawi, khutaha daichi ka-vymra y awm nai khumichi ly akhutama kanghuchi kamta, leaunghawira y i u bo. Nichi i kula-iuchi ly pangli peang y awm nai spryh jirei nawi nai ne.

¹³Kideon tym nai thym khala ahawi leaungrei ly ahawi teng y my i amang amti pi. Huni khumi ly “Kai i amang mang y changleung hawi sa nai tako phirei ly achi i tai naira mang y amli kathiu i, kanih yhm harei y chawm; huni kanih yhm ly anawi i, phra seaungkhrang na,” napi.

¹⁴Ni i ahawi my, “Huni tako phi ly Israela cheng Joasa i chapo, Kideon i haisau ne na a tu ly! Thui pachai pi ai nai takhra by y jau be! Tameuh my ni teng y Midian chengchi hawi, achi tavaimi kamkawm verei ai, eaung ai nai pei nai chybo tu ly!” napi.

¹⁵Huni khumi i amang hawi, amang thui pachai nai ai thai nai khala, Kideon ly kheukhu di iy ARENG ai chiu bo. Naibaly ni ly Israela chengchi tai naira mang y vawi aliteang i, “Angthau u! ARENG my nangchi ai, Midian tavaimichi ai eaung ai nai pei bo!” napi.

¹⁶Ni ly my i risa leaung chungvai thomreichi ai phy thomrei phy iy, khumi luteng mai kateang abawi nai laawm harei hawi, baw harei syn hai kryh bo.

¹⁷Naibaly nichi teng y, “Paleung ka-echi i tai kachawn mang y kai tym nai khala nangchi ly kai ai khen iy, kai i sa nai kamta so u.

¹⁸Kai hawi kai i kamkawmchi my baw eng nai khala, nangchi py tai kamki bawchi eng u iy, ‘ARENG hawi Kideon i vui’ nanai aeu u,” napi.

¹⁹Kideon hawi ni i risa leaung chungvaireichi ly aneng hyh tym y kyh rai khala, tamcheaung ali nai neng y, nichi i tai nai kachawn mang y tym u bo. Huna nai khala nichi ly baw eng iy, mychi syn nai laawmchi pakhau u phro bo.

²⁰Naibaly takhra risa kamkawm nyhreichi py, hunai kamta sa u teang. Nichi bawibawi ly langvawi kiu mang maisi laawmchi syn iy, lamtang kiu mang bawchi syn u. Hunaibaly,” ARENG hawi Kideon i haisau! " nanai aeu u bo.

²¹Nichi ly paleung ka-echi i tai kamki awm nai meingtymra y angdo u. Naibaly paleung ka-e tavaimi kamkawm verei ly hang lengleang naimy angpreng u pawn bo.

²²Kideon i risachi my bawchi eng u nai thym khala, ARENG ly paleung ka-e tavaimichi ai, mychi tengtawi haisau hawi atleh mengmeaung hai bo. Nichi ly Zarethan meingtym mang y amhi iy, Bethsita mary hawi Tabath mary sahawi i Abela Meholah mary tym pa-rei preang u nai ne.

²³Huna nai khala Naphtali hawi Aser cheng theaungchi ai py, Manase khu ka-peang nyhrei i khumichi ai py palau mei iy, nichi ly Midian chengchi ai preng u bo.

²⁴Kideon ly Ephraim mawitleaung pri meingtym tleirei y, savaichi pato i nichi teng y, “Midian chengchi ai tiu ai nai satlo u kathiu; Jordan tavo ai py, Bethbara avang tym pa-rei tavo micheaung ngierei ai py, nichi angpeang thai y ai nai peang u veng,” nanai taviu bo. Ephraim cheng theaung bawibawichi ly akachu u i, Jordan tavo hawi Bethbara tavo micheaung ngierei ai peang vui bo.

²⁵Nichi ly Midian tavailu areng leaung nyhrei, Oreb hawi Zeeba nini ai patiu i, Oreb ai ly Oreb lengseaungra y padei u iy, Zeeba ai ly Zeeba kreip athai nip naira y padei u bo. Nichi ly Midian chengchi ai hui veangveang i, Oreb hawi Zeeba nini i lu ly Jordan tavo nisi mang y tym nai Kideon teng y syn pi u nai ne.