Read Khumi Chin TARA CHIH NAI KEUNGCHI 8 Bible Online

TARA CHIH NAI KEUNGCHI 8 - Khumi Chin bible

TARA CHIH NAI KEUNGCHI 8

¹Naibaly Ephraim khura i khumichi my Kideon teng y, “Nang ly Midian chengchi ai tiu ai nai chei nai khala, ati mana nai kaichi ai palau y lawh mo? Ati mana nai kaichi ai hina nai sa lawh mo?” nanai khrikhri pa-rei josei u.

²Na i py Kideon my, “Nangchi i sa nai ngiereichi hawi pata ai nabaly, kai i sa nai ly ati py ny y leang; nangchi Ephraim khumichi i maidenreichy sa naimy ly kaichi nupai vereichi i sa nai tleaung y vang teng keh.

³Nangchi ly Tameuh i sa thai nai saho y Midian tavailu areng leaung nyhrei, Oreb hawi Zeeba nini ai padei u pajau na ly! Huni hawi pata ai nai pa-rei, kai ly ati kasa pajau lawh sai mo?”, nanai thui nai thai u baly, nichi kado theu nai rym u bo.

⁴Huna nai khala Kideon hawi my i risa leaung chungvai thomreichi ly Jordan tavo y tym u i, tavo angpeang u veng bo. Nichi ly khrikhri pa-rei akawm u teu i py, paleung ka-echi ai hui u veangveang nai ne.

⁵Kideon ly Sukkoth mary y tym nai khala mary i khumichi teng y, “Pahen parai naimy kai i risachi ai teicha teinei maidenreichy pei pi u kyh; nichi ly khrikhri pa-rei akawm u bo. Kai ly Midian samrang Zebah hawi Zalmuna nini ai patiu ai nai hui nai ne,” napi.

⁶Na i py Sukkoth mary i miteaung kehchi my, “Kaichi ly ati aly deaungkho y nang i risachi ai teicha teinei kang pei atyhtyh ai mo? Zeba hawi Zalmuna nini ai patiu y pui rai be,” napi u.

⁷Hunaibaly Kideon my, “Hawi mang! Tameuh my Zeba hawi Zalmuna ai kai i kiu y ang-au nai khala, kai ly nangchi ai daichi ka-vym theung i, aleng keungchi hawi kang pakhau ai,” napi.

⁸Naibaly Kideon ly Penuel mary mang y chei i, vaichi i kamta kasabawmra hnei i py, Penuel mary i khumichi ly Sukkoth mary i khumichi kamta, pathang u.

⁹Hunaibaly Kideon ly nichi teng y, “Kai tavai pajau nai vawi ali teang nai khala, nangchi i hini angdeangra yhm ka-sang panawi vui ai!” napi.

¹⁰Zeba hawi Zalmuna ly my ni i tavaimichi hawi vanrei, Kakor mary y awm u bo. Daichi ka-vym y awm nai, nichi i tavaimi kamkawm pui theung i leaung 120,000 rei dei iy, leaung 150,00 rei awm khyh bo.

¹¹Kideon ly Noba mary hawi Jokabeha mary nisi mang daichi ka-vym kachawn mang hui prei iy, huni tavaimichi ai tiu tamangtang nai ne.

¹²Huna nai khala Midian samrang leaung nyhrei, Zeba hawi Zalmuna nini ly preang hawi bo. Na i py Kideon ly preang i, nini ai patiu vui nai deaungkho y, tavaimi kamkawm pui ly ahei phrophra veng nai ne.

¹³Kideon ly Hire mawi sala lam mang, tavai keung i vawi ali teang nai khala,

¹⁴Sukkoth mary i thawndeang leaungrei ai patiu iy leu deng cham i, huni thawndeang my Sukkoth mary i miteaung keh leaung vuisaryh taja leaung saryhreichi i amynchi tajiu iy, Kideon teng y pei pi.

¹⁵Naibaly Kideon ly Sukkoth mary i khumichi teng y chei iy, “Nangchi my kai ly Zeba hawi Zalmuna ai patiu ai nai ngo y rai nai deaungkho y, khrikhri pa-rei akawm nanai kai i risachi ai teicha teinei pei ai nai akhi u lo-oh!” nanai thui chum baly,

¹⁶daichi ka-vymra i alengchangpichi la iy, Sukkoth mary i miteaung kehchi ai pajeaung bo.

¹⁷Ni ly Penuel mary i angdeangra yhm ka-sang ai py panawi pi vui iy, huni mary i khumichi ai py tleh chauchau bo.

¹⁸Naibaly Kideon my Zeba hawi Zalmuna nini teng y, “Tabor mary y nangchi my tleh vui nai khumichi ly mana nai khumichi mo?” nanai deng. Nini my, “Huni khumichi ly nang hawi atawm; nichi bawibawi ly samrang i chapochi hawi atawm,” nanaipathang.

¹⁹Kideon my, “Nichi ly kai i amhm i chapochi, kai i amjo amnauchi ne. Nangchi ly nichi ai padei u mo khyly, kai py nangchi ai padei ai ny y, nanai kai vaineng abeu bo,” napi.

²⁰Naibaly ni ly my i chapo chalu Jetha teng y, “Angthau ly nini ai padei vui! " napi. Na i py chapo ly my i haisau aphiu y naimy awm; ni ly saneng nau nai deaungkho y paniu panai vui nai ne.

²¹Huna nai khala Zeba hawi Zalmuna ni my Kideon teng y, “Kaini ai nangmy naimy padei ba; neampacho luitang sa ai nai kalop ly neampacho luitang naini sa pajau khyh,” napi. Naibaly Kideon ly nini ai tleh iy, nini i kula-iu ra i kaneaung y awi nai ateaungchi py leng vui nai ne.

²²Huni bo y Israela chengchi ly Kideon teng y, “Nang ly kaichi ai Midian chengchi kiu i nai atleu pi bo; hunai deaungkho y nang hawi nang i katu chanau kangpreang bawibawichi ly kaichi ai peang sy,” napi.

²³Kideon my ly “Kai ly nangchi ai kang peang ai ny y; kai i chapo my py peang ai ny y; nangchi ai ARENG my ang peang ai,” napi.

²⁴Na i py ni my thui bi nai ly “Nangchi teng y kai hnei ai ngai nai harei awm; nangchi la u nai muku kano amchochi, kai ai pei u,” napi. (Midian chengchi ly takhra mang i daichi ka-vym y awm naichi kamta, muku kano amchochi teaung u reng nai ne.)

²⁵Khumi mipuichi my, “Muku kano amchochi ai kaichi ly amo theu naimy nang teng y pei ai,” napi u chum baly, kanih bai u iy mychi la u nai kano amcho ngiereichi ai khumi luteng khai u bo.

²⁶Midian samrangchi amthyp nai ateaung alangchi, leng awi naichi, kanih kamsenjeaung hawi kula-iu kaneaung y awi nai leangchi bo y, Kideon i nga nai muku kano amchochi i kaji ly sie apom phai palyhrei chang y na pa-rei awm.

²⁷Kideon ly huni mukuchi hawi myn harei sa iy, mymy i awm nai Ophra mary y khai bo. Israela cheng bawibawichi py Tameuh ai khai su iy, huni myn chiu ai nai Ophra mary y chei u. Huna nai sa nai ly Kideon hawi my i dengtheungchi i vui deaung pateung nai kamta ne.

²⁸Hunai deaungkho y Midian chengchi ly Israela chengchi my tiu nai avum i, mo mang y nichi i vui pajei pahyn nai by y leang bo. Huni pri py Kideon dei nai neng ryrei, saneng vui palyh tlamsa nai ne.

²⁹Kideon ly my i yhm y vawi ali teang i hu y awm bo.

³⁰Ni ly aju neangneang awm nai deaungkho y, chapo leaung vui saryhrei awm.

³¹Sekhem mary y py aju katheang leaungrei awm i, huni aju hawi chapo leaungrei nga bi; ni ly huni chapo ai Abimelek, nanai amyn pathi.

³²Joasa i chapo Kideon ly miteaung cheang i dei baly, ni i veu ly Abieza nupaichi i saleaung khuteng, Ophra mary ampo Joasa ai up nai tapreaung y up bo.

³³Kideon dei nai bo y Israela chengchi ly Tameuh ai nithun thun u bi bo; Bala tameuh ai chiu u bi nai ne. Nichi ly leu maikawm asa yb nai Bala tameuh ai, mychi i tameuh palawn u i,

³⁴mymychi ai taki teungtareung nanai paleung ka-echi kiu i atleu pi nai keung ARENG Tameuh ai chiu u y.

³⁵Nichi ly Israela chengchi i vui Kideon my sa pi nai hawi nairachi hawi, ni i yhm dengtheungchi tlang tleaung y, kawn ai nai pany u y bo.