Read Khumi Chin AMTENG HAI NAI 14 Bible Online

AMTENG HAI NAI 14 - Khumi Chin bible

AMTENG HAI NAI 14

¹Naibaly kai ly khen i khen cham, Beram Cho ly Zion Mawi y angdo nai hawi, mymychi i lukati y mymy i amyn hawi mymy i Ampo i amyn py tajiu angchi nai khumi taseng atlo meaungkateaung palyh pa-ngo sang palyhreichi ai mymy teng y awm nai kaniu.

²Naibaly kani mang i dengdairei ati mo katyn, tui kamsau katyn kamta hawi, khri pa-rei kani pajyh nai katyn kamta kathai; naibaly kai i thai nai ly taro beu nai keungchi i mymychi i taro beu nai katyn kamta ne:

³naibaly nichi ly areng atehra mo y hawi, heng nai amjy palyhreichi hawi, miteaung kehchi i mo y py khulym kangtha ka-tawm naimy thui u bo; naibaly khaileaung pri i dengdairei atleu nai taseng atlo meaungkateaung palyh pa-ngo sang palyhreichi khyh ny y baly ami py huni khulym amtiu thai y.

⁴Hunichi ly angai nai deaungkho y amymy ai chai hai y naichi ny y; nichi ly kachym phyh ne. Hunichi ly Beram Cho i tako nai tleirei y ni teng y abang naichi ne. Nichi ai ly Tameuh i vui y hawi, Beram Cho i vui y py athai man naichi lawn ai nai khumichi theung i dengdairei atleu nai ne.

⁵Naibaly nichi i labeaung y ka-chawi theu nai ly ami py pany vai y; nichi ly cheh ai by y pa-rei lawh veng.

⁶Naibaly kani pri i amtaw thau nai takhra leaungrei ly kani laileaung y angkheang nai kaniu: khaileaung pri y awm nai theaung cheaungkhangchi hawi, cheng cheaungkhangchi hawi, leu cheaungkhangchi hawi, khumi cheaungkhangchi teng y py deaungtasarei Satang Kahawi thui pi ai nai mymy teng y au bo;

⁷naibaly mymy ly tao pajeng parai naimy, “Tameuh ai tahm khai ly, mymy ai palo u:ati mana nai mo nabaly mymy i tara chih nai neng tym bo: kani khaileaung hawi pangli hawi, tuinochi py sa nai keung ai ly chiu u,” napi.

⁸Naibaly huni bo y kani pri i amtaw thau nai takhra pa-nyh i nai ly, “Babulon avang kalen pui, cheng bawibawichi ai mymy i angai naira deaungkho y kado theu naira kreip athai hang nei hai nai ly anawi veng bo, anawi veng bo,” napi.

⁹Naibaly nini bo y kani pri i amtaw thau nai takhra pa-thom i nai ly tao pajeng parai naimy, “Ami py mawi kasi hawi ni i ka-ma-ra nga baly,

¹⁰huni khumi kypkyp my py Tameuh i kado theu naira kreip athai hang, ati sai py abawi y naimy mymy i kado theu nai khau y tui abawi y naimy katlen yb nai ly nei ai nai tla ai; naibaly kani pri i amtaw thau naichi i mei ka-niu y hawi, Beram Cho i mei ka-niu y py mai hawi kan y ni ai patang hai takengkei ai:

¹¹naibaly nichi ai patang hai nai maikhyh ly deungtasarei amhui kalau jojo ai; naibaly mawi kasi hawi ni i myn y chiu naichi, ni i amyn ka-ma-ra nga naichi ly vum kanithun tlen py anawn naira ngo y ai.

¹²Hinira y ly Tameuh i leu pei naichi hawi, Isu ai ym naira patawm kheng nai khumi kachaichi i kham tanga nai sai amteng hai nai ne,” napi.

¹³Naibaly kani pri mang i dengdairei raawi my ly, “Hina nai kamta tajiu. Vai i dengdairei amteaung iy Areng y dei naichi ly taham hawi: Phailo my py, Ne, nichi ly mymychi i sa akawm naichi anawn vui thai ai nai, nichi i atiti sa naichi ly nichi ai hui jojo,” nanai thui nai kathai.

¹⁴Naibaly kai ly khen i, khen cham, khupanym kangleung kaniu: naibaly huni khupanym tleaung y ly khumi i chapo ka-tawm, areng muku lukhym amym nai, mymy i kiu y cheaungchen kachiu syn naimy ateh nai kaniu.

¹⁵Naibaly kani pri i amtaw thau nai takhra ly achura yhm kalen pui theung i nai theu iy, khupanym tleaung y ateh nai teng y ly tao pajeng parai naimy, “Nang i cheaungchen atheu ly, tyn jau bei; ati mana nai mo nabaly tyn ai nai neng bo; khaileaung i cho myn jawn bo ho,” napi.

¹⁶Naibaly khupanym tleaung y ateh nai keung ly mymy i cheaungchen khaileaung y pala iy, khaileaung tleaung i cho tyn be bo.

¹⁷Naibaly kani pri i amtaw thau nai takhra leaungrei ly achura yhm kalen pui theung i nai theu bi: mymy py cheaungchen kachiu awm teang.

¹⁸Naibaly kani pri i amtaw thau nai takhra leaungrei mai peang nai keung my ly maicham i dengdairei theu bi; naibaly ni my ly cheaungchen kachiu syn nai kani pri i amtaw thau nai teng y tao pajeng parai naimy, “Nang i cheaungchen kachiu atheu ly, khaileaung pri i kreip athai phrawmchi ly kala baw jau; kreip athai ly myn jawn na bo ho,” napi.

¹⁹Naibaly kani pri i amtaw thau nai my ly mymy i cheaungchen ly khaileaung pri y pala i khaileaung i kreip athai kala baw kala baw bo, naibaly kreip athai ati nai angawm, Tameuh i kado theu nai ati nai angawm y ly aphi be bo.

²⁰Naibaly kreip athai ati nai angawm y ly avang pui angam mang y ati u bo, naibaly kreip athai ati nai angawm i dengdairei ly thi ang leaung bo, hlau sang atlo chungvai tariu ryrei keaungngochi i tamo pakeang naira tym pa-rei um nai ne.