Read Khumi Chin AMTENG HAI NAI 16 Bible Online

AMTENG HAI NAI 16 - Khumi Chin bible

AMTENG HAI NAI 16

¹Naibaly meingtym kachai i dengdairei raawi pajeng parai nai my ly kani pri i amtaw thau nai leaung saryhreichi teng y, “Chei u ly, Tameuh i kado theu naira khau saryhrei i nai khaileaung pri y lei u keng,” napi nai kathai.

²Naibaly kangman kei i nai ly chei i, mymy i khau i nai khaileaung pri y lei bo; hunaibaly huni ly mawi kasi i ka-ma-ra awm iy ni i myn y chiu naichi i tlang tleaung y no parai nai angvawi hawi y nai lawn bo.

³Naibaly pa-nyh i nai ly mymy i khau i nai pangli y lei bo; hunaibaly huni ly khumi kadei i thi kamta lawn iy, pangli theung y heng nai amjy cheaungkhangchi ly dei bebe bo.

⁴Naibaly pa-thom i nai ly mymy i khau i nai jangpangchi hawi tuinochi y lei iy thi lawn u bo.

⁵Naibaly tuichi i kani pri i amtaw thau nai my ly, “Aw, vai py awm nai, jangni i dengdairei py awm nai Chai Nai Keung awi, Nang ly hina nai kamta tara chih nai deaungkho y teng parai nai ne:

⁶Nichi ly nang i khumi kachaichi hawi amochi i thi lei iy, Nang ly nichi ai thi nei hai bo; avo y!” napi nai kathai.

⁷Naibaly maicham ly, “Ne khyp, Aw Atiti py Sa Thai Nai Tameuh awi, Nang i tara chih nai ly teng py teng, hawi py hawi,” napi nai kathai.

⁸Naibaly palyh i nai ly mymy i khau i nai kanito y lei bo; naibaly huni teng y khumichi ai mai y akeaung tlau ai nai au bo.

⁹Naibaly khri pa-rei bi nai deaungkho y khumichi ai ly akeaung hai tlau bo; naibaly nichi ly huni patang hai naira peang nai keung Tameuh i amyn thui tamawn iy, mymy ai palo ai nai uikhei nai paleung ngo u y leang.

¹⁰Naibaly pa-ngo i nai ly mymy i khau i nai mawi kasi i areng atehra y lei bo; hunaibaly ni i peang naira ly veng be bo: nichi ly no nai deaungkho y mychi i palai py akei u bo;

¹¹nichi ly no nai hawi angvawi awm nai deaungkho y py kani pri i Tameuh ai thui tamawn iy, mychi i atiti sa naichi uikhei nai paleung ngo u y leang.

¹²Hunaibaly tariu i nai ly mymy i khau i nai Euphratis jangpang y leu bo; hunaibaly nisi mang i dengdairei jeu nai samrangchi i vui y lam sa rym ai nai huni i tui ly kang veng bo.

¹³Naibaly naka i labeaung i dengdairei hawi, mawi kasi i labeaung i dengdairei hawi, tapawp nai amo i labeaung i dengdairei py phailo chai y nai thomrei uipho ka-tawm naimy theu nai kaniu;

¹⁴nichi ly vawinamchi i phailo, atiti ka-ma-ra sa naichi ne; nichi ly Atiti py Sa Thai Nai Tameuh i kani len parai nai i atiura y pahawi achu ai nai, khaileaung pri bawibawi i samrangchi teng y chei u nai ne.

¹⁵(Khen cham, kangviu kamta kang jeu ai: atyp iy mymy i kanih kry nai khumi ly taham hawi, ti y baly ni y tlang ka-keu pavai iy angji ngailai nai sai ang niu lawh na.)

¹⁶Hunaibaly nichi ly mymychi ai meingtym harei, Hebrai leu y Har-Makedona napi naira y ly pahawi achu u bo.

¹⁷Naibaly saryh i nai ly mymy i khau i nai ali y lei bo: hunaibaly meingtym kachai theung i nai, areng atehra i dengdairei ly, “Angym bo,” napi nai raawi pajeng parai naimy theu bo:

¹⁸naibaly amlosadichi hawi, katynchi hawi, kani pajyh naichi py awm iy, kaleih py tlenrei khrikhri pa-rei ho; khaileaung pri y khumichi awm khyp kha i dengdairei huna nai kamta ty nanai hawi khrikhri pa-rei ho nai kaleih ly awm vai y.

¹⁹Naibaly avang pui my ly phy thomrei lawn i, cheng cheaungkhangchi i avangchi py anawi be bo; naibaly mymy i kado theu nai ka-teng ny y nai kreip athai hang khau ly huni teng y tuih ai nai, Babulon avang pui ly Tameuh i mo y pany jo nai awm bo.

²⁰Naibaly tlawn bawibawichi py preang pawn bo, mawi puichi py by y leang bo.

²¹Naibaly amai amairei beisa phairei tahm ji nai ji kalen pui ly kani mang i dengdairei khumichi i tlang tleaung y tla bo; naibaly ji tla nai patang hai naira deaungkho y khumichi ly Tameuh ai thui tamawn: ati mana nai mo nabaly patang hai naira ly ka-teng ny y nai he!