Read Khumi Chin AMTENG HAI NAI 17 Bible Online

AMTENG HAI NAI 17 - Khumi Chin bible

AMTENG HAI NAI 17

¹Naibaly khau saryhrei syn nai kani pri i amtaw thau nai leaung saryhrei theung i leaungrei ly kai teng y jeui, “jeu ly, tui neangneangra y ateh nai neampachy kamleaung ai tara chih nai ly kang khen hai ai.

²Khaileaung pri i samrangchi ly mymy hawi angai iy, khaileaung pri y awm naichi py mymy i angai naira kreip athai hang y pavui u bo,” napi.

³Naibaly mymy ly kai ai Phailo y daichi ka-vym y ang tym hai; naibaly Tameuh ai thui tamawn nai amyn kawi nai lu saryhrei taki horei awm nai mawi kasi kamsenta tleaung y atang nai neampachy leaungrei ai kaniu.

⁴Naibaly huni neampachy ly kanih kamsen jeaung hawi kani kamsenta akhiu i muku hawi amiachi hawi, khawisaleng lengseaungchi py amthyp i, atiti amso awm parai nai, mymy i angai naira i atiti chai y nai kawi meng nai muku khau mymy i kiu y syn bo;

⁵naibaly mymy i lukati y ly, “Awm nai sai aneng parai nai, Babulon avang pui, neampachy kamleaungchi hawi khaileaung pri i atiti amso awm naichi i amhm,” nanai amyn tajiu nai ne.

⁶Naibaly huni neampachy ly khumi kachaichi i thi hawi, Isu deaungkho y dei naichi i thi y pavui nai kaniu. Naibaly kai ly ni ai niu makho makha baly rengrang tlai napi i, khra pa-rei lyh na.

⁷Naibaly huni kani pri i amtaw thau nai ly kai teng y, “Ati mana nai rengrang napi lawh? Huni neampachy hawi, lu saryhrei taki horei awm nai mymy ai tang nai mawi kasi i awm nai aneng parai nai ly kang thui pi pachai ai mang.

⁸Nang i niu nai mawi kasi ly jangni awm khyp i, vai by y leang; naibaly angawm kalawi by y nai theung i dengdairei ang theu kalau ai i, tama naira y chei ai. Naibaly khaileaung pri y awm nai, khaileaung palum angchei khalai dengdairei heng naira cha-iu y amyn tajiu y naichi ly mawi kasi ai niu u nai khala y, jangni awm khyp i, vai by y nai, ang jeu bi ai nai ly rengrang na u ai.

⁹Hinira y ly cheng nai paleung amteng hai nai ne. Lu saryhrei ly huni neampachy i ateh naira mawi pui saryhrei ne:

¹⁰hunichi ly samrang leaung saryhreichi py ne; leaung pangreichi ly tla praw bo, leaungrei ly awm rai, leaungrei ly theu y leang rai; mymy ly theu khala y kra y nai sala chy awm ai nai teu.

¹¹Naibaly jangni awm khyp i, vai by y nai mawi kasi kypkyp ly leaung taja nai ne: ni ly leaung saryhreichi theung i theu nai ne i, tama naira y chei ai.

¹²Naibaly nang i niu nai taki horei ly samrang leaung horeichi ne, nichi ly peang naira ngo y leang rai; na i py nichi ly tanarei chy sala y mawi kasi hawi vanrei samrangchi kamta aly peang naira nga ai.

¹³Nichi ly dawn nai vanrei ne i, nichi i sa thai naira hawi aly peang naira py mawi kasi teng y au u ai.

¹⁴Hunichi ly Beram Cho ai tiu ai i, Beram Cho ly arengchi i Areng, samrangchi i Samrang ne nai deaungkho y nichi ai pajau ai: mymy teng y awm naichi py, palau nai, vawi takhra nai, ka-ym awm naichi ly pajau u teang ai,” napi.

¹⁵Naibaly mymy ly kai teng y, “Neampachy kamleaung ateh nai meingtym i tui nang i niu naichi ly khumichi hawi, mipuichi hawi, chengchi hawi, leuchi py ne.

¹⁶Naibaly nang i niu nai taki horei hawi mawi kasi my py neampachy kamleaung ai niu ngai y ai i, ni ai ly ati sai py ny y nai hawi tlang ka-keu naimy khai ai, ni i ngan py cha u ai i mymy ai mai y kang hai bebe ai.

¹⁷Tameuh i leu thui nai angym be y ryrei ly mymy i kangai sa ai nai hawi, dawn nai vanrei awm ai nai hawi, nichi i peang naira ly mawi kasi teng y au u ai nai py, Tameuh my nichi i paleung theung y dawn hai bo.

¹⁸Naibaly nang i niu nai neampachy ly khaileaung pri i samrangchi i tlang tleaung y peang nai avang pui ne,” napi.