Read Khumi Chin AMTENG HAI NAI 19 Bible Online

AMTENG HAI NAI 19 - Khumi Chin bible

AMTENG HAI NAI 19

¹Huni bo y ly kani pri mang i khumi mipui neangneangchi ly tao pajeng parai nai kamta naimy, “Haleuja! Paheng naira hawi, nang parai naira hawi, sa thai naira py kaichi Tameuh i ne:

²mymy i tara chih nai ngierei ly teng py teng, hawi py hawi; mymy ly neampchy kamleaung keh nai, ni i angai naira deaungkho y khaileaung pri ai kalu piupa nai keung ai ly tara chih iy, ni i kiu y mymy i miseaungchi i thi kavui y vawitheung tha pi bo,” napi nai kathai.

³Naibaly nichi ly “Haleluja,” nanai pa-nyh thui bi. Naibaly mymy i maikhyh nai ly deungtasarei amhui kalau jojo.

⁴Naibaly miteaung keh leaung apom phai palyhreichi hawi, heng nai amjy palyhreichi py ambeu u i, “Amen. Haleluja,” na naimy areng atehra tleaung y ateh nai Tameuh ai ly chiu u bo.

⁵Naibaly areng atehra theung i dengdairei ly raawi theu i, “Nangchi, mymy i miseaung, mymy ai tahm khai nai katheang kalenchi awi, achi i Tameuh ai palo u,” napi.

⁶Naibaly khumi mipui neangneangchi i raawi kamta hawi, tui kamsau katyn kamta hawi, khri pa-rei kani pajyh nai katyn kamta py, “Haleluja! Achi i Areng Tameuh, Atiti py Sa Thai Nai Keung ly peang bo.

⁷Amo theu iy khri pa-rei kawn u sina, mymy ai ly palo u sina; Beram Cho aju la ai nai neng tym bo i, deaung vawi nai my ly angveirym bo:

⁸mymy ly kaleung pahathyp nai hawi amchai nai kanih mai ka-syn akhiu ai nai leu nga bo: huni kanih mai ka-syn ly khumi kachaichi i atiti kahawi sa nai ne lawh,” nanai kathai.

⁹Naibaly mymy ly, “Beram Cho i apom nai pawi y heang naichi ly taham hawi, nanai tajiu,” ang napi. Naibaly mymy ly kai teng y, “Hunichi ly Tameuh i leu kateng ne,” napi.

¹⁰Naibaly kai ly ni ai chiu ai nai mymy i kheu keung y ambeu bo. Hunaibaly mymy ly kai teng y, “Huna nai kamta so reng moh! Kai ly nang hawi, Isu i thui pi nai leu patawm nai ngamjo ngamnauchi i miseaung ahawi ne chy bo: Tameuh ai chiu phai chiu; Isu i thui pi nai leu ly leu thui yb nai Phailo i nai ne lawh,” napi.

¹¹Naibaly kani am-eaung iy khen cham, keaungngo kangleung hawi, huni tleaung y atang nai Ka-ym hawi Kateng nanai keung ai ly kaniu ; ni ly teng parai naimy tara chih iy atiu lawh.

¹²Mymy i mei ly mai ka-veaung kamta ne, mymy i lu y ly areng lukhym neangneang awm; naibaly mymy harei khyh ny y baly ami py pany y nai amyn tajiu angchi khai nai ne.

¹³Naibaly ni ly thi abawi nai kanih akhiu i, mymy i amyn ly Tameuh i Leu napi.

¹⁴Naibaly kani pri i atiu ai nai kamkawmchi ly kanih mai ka-syn kangleung hawi amchai nai akhiu naimy keaungngo kangleungchi tleaung y atang nai ni teng y abang u bo.

¹⁵Naibaly cheng cheaungkhangchi ai tamo nga hai ai nai, mymy labeaung i dengdairei haisau kachiu theu bo; naibaly mymy ly nichi ai tamo cheaungvawi y peang ai: ni ly Atiti py Sa Thai Nai Tameuh i kado theu nai ka-teng ny y nai kreip athai ati nai angawm y ly ati nai ne.

¹⁶Naibaly mymy i kanih hawi phai tleaung y ly, “Samrangchi i Samrang, Arengchi i Areng,” nanai amyn tajiu angchi ne.

¹⁷Naibaly kanito y angdo nai kani pri i amtaw thau nai leaungrei ai kaniu; naibaly ni ly kani laileaung y angkheng nai tavo bawibawichi teng y ly tao pajeng parai naimy,

¹⁸“Nangchi ly samrangchi i ngan py, tavaimi luchi i ngan py, khumi kalenchi i ngan py, keaungngo hawi hunichi tleaung y atang naichi i ngan py, khumi bawibawi, miseaung hawi miseaung ny y nai, katheang kalenchi i ngan py cha thai ai nai, Tameuh i pawi nang parai nai sa naira y jeu achu u bawibawi,” nanai aeu bo.

¹⁹Naibaly mawi kasi hawi, khaileaung pri i samrangchi hawi, nichi i atiu ai nai kamkawmchi ly keaungngo tleaung y atang nai ai tiu nai hawi, ni i atiu ai nai kamkawm ai tiu ai nai py akachu u nai kaniu.

²⁰Naibaly mawi kasi ai hawi, mymy i mei ka-niu y atiti rengrang sa nai deaungkho y mawi kasi i ka-ma-ra nga nai hawi ni i myn y chiu naichi ai lam tamang hai nai tapawp nai amo ai py mymy hawi vanrei patiu u bo; nini leaung nyhrei ai ly kan hawi mai kang nai angawm y ly heng nai tarawi y aphi hawi mei.

²¹Naibaly kalangchi ai ly keaungngo tleaung y atang nai labeaung i dengdairei theu nai haisau y ly tleh bo; naibaly tavo bawibawichi ly nichi i ngan cha naimy kajeu kawi u bawibawi.