Read Khumi Chin AMTENG HAI NAI 2 Bible Online

AMTENG HAI NAI 2 - Khumi Chin bible

AMTENG HAI NAI 2

¹“Ephesi avang palau takhra kamkawm i kani pri i amtaw thau nai teng y hinai kamta tajiu: ‘Lamtang mang i kiu y ka-si saryhrei syn nai, muku maisi khai naira theung y aleaung nai keung i leu thui nai ly hini ne he:

²Nang i atiti sa naichi hawi, sa akawm nai hawi, kham tanga nai sai hawi, khumi kamngochi ai kham pajau y nai sai py kapany: naibaly amtaw thau naichi ny y naimy, amtaw thau nai angam naichi ai cham iy nichi ly tapawp nai keungchi ne, nanai pany bo;

³naibaly nang ly kham tanga naimy awm i, kai i amyn deaungkho y kham pajau iy paha py paha y leang bo.

⁴Na i py kai ly sai sairei nang i tlang tleaung y thui ai nai awm. Nang ly nang i tamen angchei nai sai ly anawn vui bo.

⁵Hunai deaungkho y nang i atlym naira adawn vau ly, uikhei iy atiti sa man naichi ly so teang; ti y naimy nang ly uikhei y baly kai kang jeu ai i, nang i masi khai naira ai ly ni i meingtym i dengdairei katasyh vui ai.

⁶Na i py hini ly nang i vui hawi naira ne; nang ly Nikolachi i atiti sa naichi ly niu ngai y, huni ly kai py niu ngai y teang.

⁷kano awm nai khumi ly palau takhra kamkawmchi teng y Phailo i leu thui nai ly thai sy. Pajau nai keung ai ly Tameuh i Paradais y awm nai heng naira dengkeaung y cha ai nai kapei ai,’ napi.

⁸“Naibaly Sumurna avang palau takhra kamkawm i kani pri i amtaw thau nai teng y hinai kamta tajiu: “Kangman keh nai hawi kangkhym keh nai, dei iy heng ali teang nai keung i leu thui nai ly hini ne he;

⁹Nang i patang nai hawi kamawn nai sai py kapany; na i py nang ly nang chy bo; naibaly Juda tatang ny y naimy, Juda angam nai Setan i achu nai kamkawmchi i thui tamawn nai py kapany.

¹⁰Nang i tlang tleaung y vai tym ai nai patang naira takhra takhra jei moh: khen cham, nangchi ai ang parawi thai ai nai diabola my ly nangchi theung y phyreichi ai theaung y tla hai ai bo; naibaly nangchi ly kani horei sala y patang py patang ai. Na i py dei pa-rei ka-ym awm ba, hunaibaly heng naira areng lukhym kang pei ai mang.

¹¹Kano awm nai khumi ly palau takhra kamkawmchi teng y Phailo i leu thui nai ly thai sy. Pajau nai keung ai ly pa-nyh dei naira y ly ati sai py so hai y ai,’ napi.

¹²“Naibaly Perkamon avang palau takhra kamkawm i kani pri i amtaw thau nai teng y hinai kamta tajiu: ‘Bo nyhrei awm nai haisau kaichiu awm nai keung i leu thui nai ly hini ne he:

¹³Nang i awm naira kapany: Setan i areng atehra ly huni meingtym y awm: naibaly nang ly kai i amyn patawn cheng i, Setan i awm naira y kai i leu pany hai nai keung ka-ym Antipa ai ang padei nai thym khala y py nang ly kai ai ym naira ly apha y leang bo.

¹⁴Na i py kai ly sai sairei nang i tlang tleaung y thui ai nai awm; Balam i patiu naira patawm nai keung amichi mo nang teng y awm. Ni ly myn y chiu nai apathyp nai mawi cha ai nai hawi, angai ai nai py Israela kangpreangchi i mo y atlym naira khai pi ai nai Balaka ai patiu.

¹⁵Nikolachi i patiu nai leu hunai kamta khyp my patawm nai keung amichi mo py nang teng y awm teang.

¹⁶Hunai deaungkho y uikhei jau; ti y naimy kang jeu praw ai i, kai i labeaung i haisau hawi nichi ai katiu ai.

¹⁷Kano awm nai khumi ly palau takhra kamkawmchi teng y Phailo i leu thui nai ly thai sy. Pajau nai keung teng y ly heu nai manna kapei ai, lengseaung kangleung py kapei ai; nga nai keung leaungrei ny y baly ami py pany pajau y nai amyn kangtha ly huni lengseaung y tajiu angchi nai ne,’ napi.

¹⁸“Naibaly Thuatira avang palau takhra kamkawm i kani pri i amtaw thau nai teng y hinai kama tajiu: ‘Mymy i mei ly mai ka-veaung kamta awm nai, mymy i kheu ly kheupaja amchai nai kamta awm nai keung, Tameuh i Chapo i leu thui nai ly hini ne he:

¹⁹Nang i atiti sa naichi hawi, tamen nai sai hawi, ym nai sai hawi, kry nai sai hawi, kham tanga nai sai hawi, nang i kangkhym i atiti sa naichi ly angchei i atiti sa naichi tleaung y ty keh nai ne, nanai kapany.

²⁰Na i py kai ly sai sairei nang i tlang tleaung y thui ai nai awm: nang ly huni neampachy Jezebeli, amo angam nai ai ly ngai lawh nai ne; ni ly kai i miseaungchi ai angai ai nai hawi, myn y chiu nai apathyp nai mawi cha ai nai py ang patiu iy tapawp reng.

²¹Kai ly uikhei ai nai neng pei i py ni ly angai nairachi uikhei ai nai ngai y.

²²Khen cham, kai ly mymy ai ira tleaung y ka-phi ai, naibaly mymy hawi pajang sa naichi ly mymychi i sa nai sai uikhei u y baly nichi ai patang parai naira y ka-phi vui ai.

²³Naibaly mymy i chanauchi ai ly kapadei khyp ai; naibaly kai ly dawn naira hawi paleung khen patawm nai keung ne, nanai palau takhra kamkawm bawibawichi ly pany u ai; naibaly nangchi leaung leaungrei i atiti sa nai kamta kaimy kang heung ai.

²⁴Na i py nangchi Thuatira avang i khumi takhra, huni patiu naira patawm y nai, Setan i “Leu kathiu” nanai amtiu y nai ngiereichi teng y, myn kaji takhra kapho hai y ai, kang napi;

²⁵na i py kai kang jeu y ryrei ly nangchi i awm angchi nai ly patawm u cheng.

²⁶Hunaibaly pajau nai keung, kai i atiti sa naichi tem pa-rei patawm nai ai ly cheng cheaungkhangchi tleaung y sa thai naira kapei ai;

²⁷kai ly Ngaai teng i dengdairei kanga nai kamta, ni py tamo cheaungvawi y ang peang ai i, nichi ai ly laawm beu nai keung i laawmchi kamta kawi piupa ai:

²⁸naibaly ni ai ly khawn tempo kapei ai.

²⁹Kano awm nai khumi ly palau takhra kamkawmchi teng y Phailo i leu thui nai ly thai sy,’ napi.