Read Khumi Chin AMTENG HAI NAI 21 Bible Online

AMTENG HAI NAI 21 - Khumi Chin bible

AMTENG HAI NAI 21

¹Naibaly kani kangtha hawi khaileaung kangtha py kaniu: ati mana nai mo nabaly kangman i kani hawi kangman i khaileaung py tama vui bo, pangli py by y leang bo.

²Naibaly avang pui kachai, Jerusalem kangtha ly, deaung vawi nai anglo ly mymy ai palyn nai keung i vui y asa tarengdeng nai angveirym nai kamta, Tameuh teng i dengdairei kathiu nai kaniu.

³Naibaly areng atehra theung i dengdairei ly raawi pajeng naimy, “Khen cham, Tameuh i awm naira ly khumichi theung y awm bo: mymy ly nichi teng y awm hai ai i, nichi py mymy i khumichi lawm ai; Tameuh kypkyp my ly nichi teng y awm hai ai i, mymy ly nichi i Tameuh lawn ai.

⁴Naibaly mymy ly nichi i mei katui bawibawi tamiu pi ai; dei naira py awm bi y leang bo; paleung mawn nai py, vo nai py, no nai py awm ali bi y leang bo: atiti kangman i naichi ly tama bo,” nanai kathai.

⁵Naibaly areng atehra tleaung y ateh nai keung my ly, “Khen cham, ati cheaungkhang kangtha kasa,” napi. Naibaly mymy ly “Tajiu ly, hini leu bawibawi ly ka-ym awm nai py kateng ne lawh,” napi.

⁶Naibaly ni ly kai teng y, “Hunichi ly angym be bo. Alpha hawi Omeka, pakeung hawi katem kai ne. Tui ahai nai keung ngierei teng y heng naira tuino i tui jawm my kapei ai.

⁷Pajau nai keung ngierei ly hunichi ai amtym ai; naibaly kai ly ni i Tameuh kalawn ai i, ni py kai i chapo lawn ai.

⁸Na i py jei naichi hawi, ym y naichi hawi, amso ngailai naichi hawi, khumi ai padei naichi hawi, angai naichi hawi, atam kawp naichi hawi, myn y chiu naichi hawi, ka-chawi thui nai bawibawichi py mai hawi kan kang nai ang y phy nga ai nai nichi i vui ne ai: huni ly pa-nyh dei naira ne,” napi.

⁹Naibaly kangkhym i patang hai naira kawi meng nai khau saryhrei syn nai kani pri i amtaw thau nai saryhrei theung i leaungrei ly ang jeu i kai teng y, “Jeu ly, Beram Cho i deaung vawi nai anglo mymy i aju ai kang khen hai ai mang,” nanai thui.

¹⁰Naibaly ni my ly Phailo y kai ai mawi pui hawi ka-sangra y la vui i, Jerusalem avang pui kachai, Tameuh i nang parai naira awm naimy, Tameuh teng i kani pri mang i dengdairei satla nai ang khen hai:

¹¹huni i angvang nai sai ly lengseaung vang ka-teng ny y nai jaspi lengseaung apai ly len py len, asang py asang, apai katheu holai nyhrei awm, naibaly apai katheu ahawi y kani pri i amtaw thau nai leaung holai nyhreichi awm:

¹²huni apai katheu tleirei y ly Israela kangpreangchi cheng holai nyhreichi i amyn tajiu nai ne.

¹³Nisi mang y katheu thomrei, tosyh mang y katheu thomrei, tokalawi mang y katheu thomrei, ni dym mang y katheu thomrei.

¹⁴Naibaly avang pui apai ly lengseaung leng nai lengseaung holai nyhrei awm i, hunira y ly Beram Cho i amtaw thau nai holai nyhreichi i amyn holai nyhrei awm.

¹⁵Naibaly kai teng y leu thui nai keung ly avang pui hawi apai katheuchi hawi apai py pata ai nai, siju palawn ai nai muku cheaungvawi harei awm.

¹⁶Naibaly avang pui ly ahilum nai ne; jeng ly ka khyrei awm teang: mymy ly huni cheaungvawi hawi avang pui pata i, hlau meaungkateaungrei bo y sang nyhrei awm: jeng ka hawi kasang py vanrei angeng khyp nai ne.

¹⁷Naibaly mymy ly apai pata bi i, khumi i pata nai reita kamta(huni ly kani pri i amtaw thau nai i pata nai reita kamta ne iy), miu chungvai atlo vui palyh pa-ngo palyhrei awm.

¹⁸Naibaly apai ly jaspi lengseaung hawi sa nai ne: avang pui ly dengkhang pa-pui kamchai kamta muku chai pyn nai hawi sa nai ne.

¹⁹Huni avang pui apai lengseaung leng nai tleirei ly lengseaung vang ka-teng ny y nai takhra takhra hawi apu hai nai ne. Leng manme nai ly jaspi lengseaung ne; pa-nyh i nai ly saphira lengseaung ne; pa-thom i nai ly kalkidon lengseaung ne; palyh i nai ly samarakdin lengseaung ne; pa-ngo i nai ly sardonuk lengseaung ne:

²⁰tariu i nai ly sardion lengseaung ne; saryh i nai ly kruso lengseaung ne; taja i nai ly birula lengseaung ne; takaw i nai ly topazi lengseaung ne; horei i nai ly krusopra lengseaung ne; holai harei i nai ly huakintho lengseaung ne; holai nyhrei i nai ly amethusto lengseaung ne.

²¹Naibaly apai katheu holai nyhrei ly khawisaleng lengseaung holai nyhrei ne; katheu ha harei ly khawisaleng lengseaung ha harei ne teang; huni avang pui lam pareaung ly dengkhang pa-pui kamchai kamta muku chai pyn nai ne.

²²Naibaly theung mang y ly achura yhm kalen pui kaniu y leang. Atiti py Sa Thai Nai Areng Tameuh hawi Beram Cho ly huni i achura yhm kalen pui ne.

²³Naibaly huni avang pui ai angvang hai ai nai ly kanito mo, lo mo aly ngai y leang; Tameuh i nang parai naira ly angvang hai nai ne, huni i maisi py Beram Cho ne lawh.

²⁴Naibaly cheng cheaungkhangchi ly huni kangvang y ly aleaung u ai i, khaileaung pri i samrangchi ly mymychi i tahm asang naira ly huni teng y tym hai ai.

²⁵Huni i apai katheuchi ai py kanithun y kho y ai:

²⁶vum, nanai ly hu y awm ai ny y: nichi ly cheng cheaungkhangchi i tahm asang naira hawi palo naira py huni teng y tym hai ai:

²⁷naibaly atiti chai y nai amjy mo, amso ngailai nai hawi ka-chawi thui nai keung mo huni theung y tlen py kun ai ny y; Beram Cho i heng naira cha-iu y amyn tajiu angchi nai ngiereichi naini kun ai khyh.