Read Khumi Chin AMTENG HAI NAI 22 Bible Online

AMTENG HAI NAI 22 - Khumi Chin bible

AMTENG HAI NAI 22

¹Naibaly mymy ly huni i lam pareaung sala y heng naira jangpang tui, krustala lengseaung kamta angvang nai, Tameuh hawi Beram Cho i areng atehra dengdairei theu nai ang khen hai.

²Naibaly huni jangpang hi mang vai py hu mang vai py athai amjy holai nyhrei, lo tleirei y athai nai heng naira dengkeaung awm: huni dengkeaung i ngam ly cheng cheaungkhangchi ai hawi sa pi ai nai khai nai ne.

³Naibaly amsawi, nanai ly awm ali bi ai ny y: Tameuh hawi Beram Cho i areng atehra ly hu y awm ai i, mymy i miseaungchi ly mymy i kalop sa u ai:

⁴nichi ly mymy i meimai niu u ai i, mymy i amyn ly nichi i lukati y awm teang ai.

⁵Vum, nanai ly awm ali ai ny y ; nichi ly maisi kangvang hawi kanito kangvang py aly ngai u y ai; Areng Tameuh my ly nichi ai angvang hai ai i, nichi ly deungtasarei peang u jojo ai.

⁶Naibaly ni my ly kai teng y, “Hini leu ly ka-ym awm nai hawi kateng ne: naibaly Areng, amochi i phailo Tameuhmy ly atiti tym kasa ai naichi ly mymy i miseaungchi teng y khen hai ai nai, mymy i kani pri i amtaw thau nai ai pato veng bo.

⁷Naibaly khen cham, kai kang jeu praw ai. Hini cha-iu thui yb nai leu sai patawm nai khumi ly taham hawi,” ang napi.

⁸Naibaly kai Johan ly hini atitichi thai nai hawi niu nai keung ne. Naibaly kai ly thai nai hawi niu nai khala ly kai ai huni atitichi khen hai nai kani pri i amtaw thau nai i kheu keung y kambeu.

⁹Naibaly ni my ly kai teng y, “Huna nai kamta so reng moh: kai ly nang hawi, ngamjo ngamnau amochi hawi, hini cha-iu leu sai patawm naichi i miseaung ahawi py ne: Tameuh ai chiu phai chiu,” ang napi.

¹⁰Naibaly mymy ly kai teng y, “Hini cha-iu theung y thui yb nai leusaichi ly pajawp typ moh: neng ly ang tym ai bo.

¹¹Hawi y sa nai khumi ly hawi y nai so palai sy: chai y nai khumi ly chai y nai awm palai sy: khumi kahawi ly atiti kahawi so rai sy: khumi kachai ly chai nai awm rai sy.

¹²Khen cham, kai kang jeu praw ai; khumi cheaungkhangchi i atiti sa nai kamta khyp my pei ai nai, kai i kawn nai vang ly kai teng y awm.

¹³Alpha hawi Omeka, kangman keh nai hawi kangkhym keh nai, pekeung hawi katem kai ne.

¹⁴Heng naira dengkeaung y tym ai nai nga thai ai nai hawi, apai katheu mang avang pui y kun thai ai nai py nichi i kanih pasiu naichi ly taham hawi.

¹⁵Angam mang y ly uichi py, atam kawpchi py, angai naichi py, khumi ai padei naichi py, myn y chiu naichi py, ka-chawi thui jeaung reng iy ka-chawi sa naichi py awm u bo.

¹⁶Kai, Isu ly, palau takhra kamkawmchi i vui y hini atitichi nangchi teng y pany hai ai nai, kai i kani pri i amtaw thau nai ai kang pato veng bo. Davida i tangjyn kadeu hawi kangpreang, khawn tempo avang parai nai kai ne.

¹⁷Naibaly Phailo hawi deaung vawi nai anglo my, “Jeu ly,” ang napi. Thai nai khumi py, “Jeu ly,” tapi sy. Tui ahai nai khumi ly jeu sy: ngai nai khumi ly heng naira tui jawm my lo sy.

¹⁸Hini cha-iu thui yb nai leu sai thai nai ngiereichi teng y kang thui pi: Amimi py hini leu sai panawi baly, hini cha-iu y tajiu nai patang hai nairachi ly Tameuh my ni i tlang tleaung y panawi teang ai:

¹⁹naibaly amimi py hini cha-iu thui yb nai leu sai la vui baly, hini cha-iu y tajiu nai heng naira dengkeaung hawi avang pui kachaira y ni i phy nga nai ly Tameuh my la pi vui teang ai.

²⁰Hini leu thui pi nai keung ly, “Ne, kai kang jeu praw ai,” napi. Amen. p Areng Isu awi, jeu jau ba.

²¹Areng Isu i pahenra ly khumi kachaichi teng y awm sy. Amen.