Read Khumi Chin AMTENG HAI NAI 4 Bible Online

AMTENG HAI NAI 4 - Khumi Chin bible

AMTENG HAI NAI 4

¹Huni bo y kai ly khen i, khen cham kani pri y katheu am-eaung nai ne, naibaly kai i thai man nai raawi ly baw katyn ka-tawm kai teng y atiti thui pi nai ly, “Hi y jeu kalau, vai momang y atiti tym ai nai tla naichi ly kang khen hai ai mang,” napi.

²Tlenrei khyh my kai ly Phailo y kalawn bo: naibaly khen cham, kani pri y ly areng atehra awm i, huni areng atehra tleaung y leaungrei ateh nai ne.

³Naibaly ateh nai keung ly jaspi hawi sardion lengseaung ka-tawm ne: naibaly seaungjai harei ly smarakdin lengseaung khen nai kamta atehra y takuideung nai ne.

⁴Naibaly areng atehra taki teungtareung nai areng atehra apom phai palyhrei awm i, huni areng atehrachi tleaung y ateaung kangleung amthyp nai hawi, areng i muku lukym amym nai miteaung keh leaung apom phai palyhreichi ai kaniu.

⁵Naibaly areng atehra theung i dengdairei amlosadichi hawi, katynchi hawi, kani pajyh naichi py theu, naibaly huni areng atehra mo y maiteaung saryhrei angveaung nai py awm: hunichi ly Tameuh i Phailo saryhreichi ne:

⁶naibaly huni areng atehra mo y ly krustala lengseaung kamta pangli, dengkhang apui ka-tawm awm; naibaly areng atehra sala y hawi, areng atehra taki teung tareung nai heng nai amjy palyhrei, nithun mo mei cheichei awm.

⁷Naibaly heng nai amjy harei nai ly khrangsi takai kamta ne, heng nai amjy pa-nyh i nai ly si kamta ne, heng nai amjy pa-thom i nai ly khumi i meimai kamta ne, heng nai amjy palyh i nai ly angkheang nai ahm pui kamta ne.

⁸Naibaly huni heng nai amjy palyhrei ly pakhi tariurei awm bawibawi i, anui y py salo y py mei cheichei awm: naibaly nichi ly, “Jangni i dengdairei awm nai hawi, vai awm nai hawi, vai momang y awm ai nai Atiti py Sa Thai Nai Keung Areng Tameuh ly, Kachai, kachai, chai parai na y!” Nanai vum kanithun anawn y naimy thui jojo.

⁹Naibaly huni heng nai amjychi ly areng atehra tleaung y ateh nai deungtasarei heng jojo nai keung ai palo nai hawi tahm pasang nai hawi, kawn nai leu thui nai khala y ly,

¹⁰huni miteaung keh leaung apom phai palyhreichi ly areng atehra tleaung y ateh nai keung i mo y ly kheukhudi nai meung u i, deungtasarei heng jojo nai keung ai chiu hai; naibaly nichi i areng lukhym ly areng atehra mo y khai iy,

¹¹“Kaichi i Areng hawi Tameuh hawi, palo naira hawi, tahm pasang naira hawi, sa thai naira py nang ly nga ai ataing nai ne; Ati mana nai mo nabaly nang ly ati cheaungkhang sa i, hunichi nang ngai nai deaungkho y awm nai hawi sa nai ne,” nanai thui ai.