Read Khumi Chin AMTENG HAI NAI 5 Bible Online

AMTENG HAI NAI 5 - Khumi Chin bible

AMTENG HAI NAI 5

¹Naibaly areng atehra tleaung y ateh nai keung lamtang mang i kiu y ly, theung y hawi salo y py atiti tajiu angchi nai cha-iu aeang, pajawp typ nai ka-ma-ra saryhrei dengtauh nai kaniu.

²Naibaly kani pri i amtaw thau nai ham parai nai leaungrei ly tao pajeng parai naimy, “Huni cha-iu aeang lam iy pajawp typ nai ka-ma-ra su ai nai ami ataing ai mo?” nanai aeu nai kaniu.

³Naibaly kani y py, khaileaung y py, khaileaung theung y py huni cha-iu aeang theung mang y khen pajau nai keung ami py by y.

⁴Naibaly huni cha-iu aeang lam iy, theung mang y khen ai ataing nai keung ami ai py ngo pajau y nai deaungkho y kai ly khri pa-rei vo na:

⁵naibaly miteaung kehchi theung y leaungrei ly kai teng y, “Vo moh! Khen cham, Juda cheng theung i theu nai Khrangsi Takai, Davida i Tangjyn ly huni cha-iu aeang i pajawp typ nai ka-ma-ra saryhrei su iy cha-iu aeang lam ai nai pajau bo,” napi.

⁶Naibaly areng atehra hawi heng nai amjy palyhreichi i sala y hawi, miteaung kehchi i sala y py taki saryhrei hawi mei saryhrei awm nai Beram Cho tleh nai kamta angdo nai kaniu:hunichi ly Tameuh i Phailo saryhrei khaileaung pri verei y pato naichi ne.

⁷Naibaly ni my ly ang jeu i, areng atehra tleaung y ateh nai keung lamtang mang i kiu dengdairei cha-iu aeang la bo.

⁸Naibaly cha-iu aeang la phai la baly, heng nai amjy palyhrei hawi, miteaung keh apom phai palyhreichi ly taro hawi pakhyh nai rimui kawi nai muku khau py syn bawibawi naimy, Beram Cho i mo y ly kheukhudi iy meung u bo; huni rimui ly khumi kachaichi i chiu sa nairachi ne.

⁹Naibaly nichi ly khulym kangtha thui iy, “Nang ly huni cha-iu aeang la ai nai hawi, huni i pajawp typ naira ka-ma-ra su ai nai py ataing: Ati mana nai mo nabaly nang tleh nai amteng i, cheng cheaungkhangchi hawi, leu cheaungkhangchi hawi, khumi cheaungkhangchi hawi, theaung cheaungkhangchi theung i nai Tameuh i vui y nang i thi hawi van bo;

¹⁰naibaly nichi ai ly achi i Tameuh i vui y peang naira hawi pathyp pi nai keungchi y nang palawn bo; naibaly nichi ly khaileaung pri y peang ai,” napi.

¹¹Naibaly kai ly khen i, areng atehra hawi heng nai amjy palyhreichi hawi, miteaung kehchi ai taki teungtareung nai kani pri i amtaw thau nai neangneangchi i raawi kathai: nichi i nawi nai sai ly meaungkateaung neang neangchi, sang neangneangchi ne.

¹²Nichi ly tao pajeng parai naimy, “Beram Cho tleh nai ly sa thai naira hawi, nang parai naira hawi, cheng naira hawi, ham naira hawi, tahm pasang naira hawi, palo naira hawi, amtheaung naira py nga ai nai ataing,” napi.

¹³Naibaly kani y hawi, khaileaung tleaung y hawi, khaileaung theung y hawi, pangli saleung y hawi, hunichi theung y awm nai bawibawichi py, “Areng atehra tleaung y ateh nai keung hawi Beram Cho teng y py amtheaung naira hawi, tahm pasang naira hawi, palo naira hawi, aly peang naira py deungtasarei awm jojo sy,” napi nai kathai.

¹⁴Naibaly heng nai amjy palyhreichi ly, “Amen!” napi. Miteaung kehchi py kheukhu di i meung iy chiu u bo.