Read Khumi Chin AMTENG HAI NAI 7 Bible Online

AMTENG HAI NAI 7 - Khumi Chin bible

AMTENG HAI NAI 7

¹Huni bo y kacheng y hawi, pangli y hawi, dengkeaung ngierei y py ali my hm y ai nai, khaileaung i ali palyhrei paka naimy kani pri i amtaw thau nai leaung palyhreichi ai ly khaileaung taki palyhrei y angdo nai kaniu.

²Naibaly Tameuh kangheng i pajawp typ nai ka-ma-ra syn naimy kani pri i amtaw thau nai takhra ai ly kani theu naira y kalau nai kaniu; naibaly mymy ly kani pri i amtaw thau nai leaung palyhrei; kacheng hawi pangli y atiti hawi y nai sa hai thai ai nai leu nga naichi teng y ly tao pajeng parai naimy,

³“Kaichi ly Tameuh i miseaungchi ai ly nichi i lukati y pajawp typ nai ka-ma-ra so y ryrei ly kcheng ai hawi pangli ai hawi, dengkeaungchi ai py atiti hawi y nai sai py so hai u moh,’ nanai aeu u bo.

⁴Naibaly huni pajawp typ nai ka-ma-ra nga naichi i nawi nai sai kathai i, Israela kangpreangchi i cheng jyn theung i nai khumi taseng atlo meaungkateaung palyh pa-ngo sang palyhreichi ai pajawp typ nai ka-ma-ra nga hai bo.

⁵Juda cheng i khumi meaungkateaung atlo sang nyhreichi ai pajawp typ nai ka-ma-ra nga hai bo: Ruben cheng i khumi meaungkateaung atlo sang nyhrei: Kad cheng i khumi meaungkateaung atlo sang nyhrei:

⁶Asera cheng i khumi meaungkateaung atlo sang nyhrei: Naphtali cheng i khumi meaungkateaung atlo sang nyhrei: Manase cheng i khumi meaungkateaung atlo sang nyhrei:

⁷Sumeon cheng i khumi meaungkateaung atlo sang nyhrei: Levi cheng i khumi meaungkateaung atlo sang nyhrei: Isakhar cheng i khumi meaungkateaung atlo sang nyhrei:

⁸Zebulun cheng i khumi meaungkateaung atlo sang nyhrei: Josepha cheng i khumi meaungkateaung atlo sang nyhrei: Benjamin cheng i khumi meaungkateaung atlo sang nyhreichi ai pajawp typ nai ka-ma-ra nga hai bo.

⁹Huni bo y kai ly khen i khen cham, theaung cheaungkhangchi hawi, cheng cheaungkhangchi hawi, khumi cheaungkhangchi hawi, leu cheaungkhangchi theung i ami py kati pajau y nai khumi mipui ka-teng ny y naichi ai ly kanih kangleung akhiu nai, kiu y lymlo syn naimy areng atehra hawi Beram Cho i mo y angdo nai kaniu;’

¹⁰naibaly nichi ly tao pajeng parai naimy, “Areng atehra tleaung y ateh nai achi i Tameuh teng y hawi, Beram Cho teng y py paheng naira awm,” a nai aeu u bo.

¹¹Naibaly kani pri i amtaw thau nai bawibawichi ly areng atehra hawi, miteaung kehchi hawi, heng nai amjy palyhreichi ai taki teung tareung naimy angdo nai ne;

¹²naibaly nichi ly areng atehra mo y ambeu u i, “Amen: Amtheaung naira hawi, nang parai naira hawi, cheng naira hawi, kawn naira hawi tahm pasang naira hawi sa thai naira hawi, ham naira py achi i Tameuh teng y deungtasarei awm jojo sy. Amen,” nanai Tameuh ai chiu u bo.

¹³Naibaly miteaung kehchi theung i nai leaungrei ly kai teng y, “Hini kanih kangleung akhiu naichi ly amichi mo? Nichi ly ma i dengdairei jeu nai mo?” nanai deng.

¹⁴Naibaly kai ly ni teng y, “Areng, nang ly pany bo,” kanapi. Naibaly mymy ly kai teng y, “Hinichi ly patang parai naira i dengdairei theu u naichi ne, nichi ly Beram Cho i thi y nichi i kanihchi pasiu iy, kaleung hai bo.

¹⁵Hunai deaungkho y nichi ly Tameuh i areng atehra mo y awm u i, mymy i achura yhm kalen pui y vum kanithun mymy i kalop sa pi jojo: naibaly areng atehra tleaung y ateh nai keung ly nichi i salo y mymy i kanih yhm py jang ai.

¹⁶Nichi ly kajeu alam bi y ai, tui py ahai bi ai ny y, kanito hawi kabi my py nichi ai ang ai ny y:

¹⁷ati mana nai mo nabaly areng atehra sala y awm nai Beram Cho ly nichi ai typ nai keung lawn ai i, nichi ai heng nai tuinochi mang y ang pahawi ai; naibaly Tameuh ly nichi i mei i dengdairei mei katui bawibawi tamui pi ai,” napi.