Read Khumi Chin RUTHI 1 Bible Online

RUTHI 1 - Khumi Chin bible

RUTHI 1

¹Jangni Israela pri y samrang by y nai deung khala, tahum takang theu nai ne; Hunai deaungkho y Juda pri Bethlehem mary i Elimeleka ly aju Naomi hawi chapo Mahalon, Khilion ai hawi iy, Moba pri y awm daw ai nai ang pyn u bo. Nichi ly Ephraim nupaichi ne. Moba pri y awm nai thym kha y,

³Elimeleka ly dei i, Naomi ly chapo leaung nyhrei hawi awm jo.

⁴chapo leaung nyhrei ly Moba cheng neampachy Orpah hawi Ruthi ai pom hawi bo. Nichi ly huni pri y saneng horei awm nai bo y,

⁵Mahalon hawi Khilion nini py dei vui teang bi. Hunaibaly Naomi ly juvo, chanau by y naimy my tlairei awm su bo.

⁶Neng kra kyh nai bo y ARENG my mymy i khumichi ai amti amjang amtheaung hai nai satang Naomi ly thai; hunai deaungkho y ni ly my i lengngo ni hawi vanrei, Moba pri i dengdairei theu ai nai angveirym bo.

⁷Nichi ly Juda pri mang y vawi amteaung nai lam sala y,

⁸Naomi my lengngo ni teng y, “Nangni ly nangmyni i amhmchi teng y phai vawi hawi teang teu. Nangni ly kai i tlang tleaung y py, dei chum naichi i tlang tleaung y py, atiti kahawi sa pi nai kamta, nangni i tlang tleaung py ARENG my kahawi so pi na sy.

⁹ARENG ly nangni ai yhmtheaung kangmeng kangtha angvai iy amo theu parai naimy awm ai nai pei na sy,” napi. Huna nai thui chum baly Naomi my nini ai pachawm iy leu kahawi pavum bo. Na i py nini ly vo hawi naimy,

¹⁰mymy teng y, “Kaini ly nei ngaai yhm mang y vawi ai nai ngai y leang bo! Kaini py nang hawi vanrei, nang i khumichi teng y abang ai,” napi.

¹¹Naomi my, “Ngaawi ni awi, nangni vawi hawi teang teu; ati mana nai y kai teng y abang ai nai ngai hawi nai mo? Nangni hawi apom ai nai, kai ly chapochi sa bi ai nai athang khai hawi nai sai a?

¹²Ngamhm ngampo yhm mang phai vawi hawi teang teu; kai ly yhmtheaung sa bi ai nai py neng by y leang bo. Kai ly athang khai naira awm rai iy, vaimy yhmtheaung sa nai chapo nga bi lawh teu i py,

¹³nangni ly chapochi tleaungri acheang nai pa-rei ajeng hawi pajau na a? Huna nai ajeng naimy yhmtheaung so hawi y ai bo a? Ngaawi ni awi, huna nai ly avo y, nanai nangni pany hawi nai teu bo. ARENG my kai ai pajeng nai bo i, kai ly nangni i vui y khri pa-rei paleung hawi y,” napi.

¹⁴Nini ly vo hawi bi bo. Naibaly Orpah ly amni ai pachawm iy leu kahawi pavum chum baly, amhm ampo yhm mang y vawi jo bo; na i py Ruthi ly amni ai amkhaw veangveang nai ne.

¹⁵Naibaly Naomi my, “Ruthi awi, ngamjo ly mymy i chengchi hawi mymy i tameuh teng y vawi ali teang bo. Nang py ni hawi vanrei yhm mang y vawi teang jau,” napi.

¹⁶Na i py Ruthi my, “Ni nang hawi amprei vui ai nai kai ai atho so hai moh! Kai ly nang hawi vanrei abang ai. Kai ly ni nang i chei naira mang y chei ai; ni nang i awm naira y kai py awm teang ai. Ni nang i chengchi ly kai i chengchi ne, nang i Tameuh ly kai i Tameuh ne.

¹⁷Ni nang i dei naira y, kai py dei teang ai; huni tapreaung y kai py a-up teang ai. Kai ly deira my taprei nai ny y naimy, sai sairei molam y ni nang hawi amprei lawh baly, ARENG my kai ai hawi y keh nai pajengra tym hai teu sy!” napi.

¹⁸Naomi my, Ruthi ly mymy hawi vanrei abang takengkei ai nai niu i, ati sai py thui y leang bo.

¹⁹Nini ly Bethlehem mary y tym pa-rei tako hawi. Nini tym hawi nai khala, mary verei ahynja na; hu y awm nai neampachychi my, “Ni ly Naomi ny y nai sai a?” nanai deng u.

²⁰Naomi my, “Kai ai Naomi,” nanai palau u moh; “Marah,”[1]nanai palau u; ati mana nai mo nabaly, ati cheaungkhang sa thai nai Tameuh my kai ai khym taham kasi ang pei nai bo.

²¹Kai ly hi i nai theu nai khala, nang nai ne; na i py vai ly ARENG my kai ai bengtlairei vawi hai ali teang bo. Ati Cheaungkhang sa thai nai ARENG my pajeng iy patang naira tym hai nai deaungkho y, ‘Naomi’ nanai palau u lawh mo?” napi.

²²Hini ly Naomi i Moba cheng lengngo Ruthi hawi vanrei, Moba pri dengdairei vawi teang nai sai ne. Nini ly chajai choh tyn amteaung nai neng khala, Bethlehem mary y tym hawi bo.