Read Khumi Chin RUTHI 2 Bible Online

RUTHI 2 - Khumi Chin bible

RUTHI 2

¹Naibaly Naomi ly Boaza, napi nai amjo amnau leaungrei awm; ni ly Naomi i juvo Elimeleka nupai ne i, ni ly khumi kanang tahm awm parai nai khumi ne.

²Kanirei nai khala y Ruthi my Naomi teng y, “Li choh tyn nai keungchi i khai su nai chohvuichi pakym ai nai, chei ai nai pei ba; kai ly huna nai chohvui pakym ai nai pei nai keung avum lym ai,” nanai takeng. Naomi, my, “Ngaawi awi, chei teu ba,” napi.

³Naibaly Ruthi ly li y chei i, choh tyn nai keungchi nithun abang iy, nichi i khai su nai chohvuichi pakym achu bo. Ni i chei nai li ly Boaza i li apeh khyp nai ne.

⁴Neng kra kyh nai bo y Boaza ly Bethlehem mary i nai tym i, mymy i kalop sa naichi teng y, “ARENG ly nangchi hawi vanrei awm hai sy!” napi i, nichi my py, “ARENG ly nang ai py amtheaung hai sy,” nanai pathang u teang.

⁵Boaza ly kalop sa nai lu teng y, “Huni anglo ly ami mo?” nanai deng.

⁶Kalop sa nai lu my, “Huni anglo ly Moba pri i nai Naomi hawi vanrei abang nai Moba neampachy ne.

⁷Ni ly choh tyn nai khumichi nithun hui iy chohvui pakym ai nai kai teng y hnei i, khawn angthodyh i ka-so chohvui pakym nai ne; vai naini li biu y tanarei anawn nai ne,” napi.

⁸Naibaly Boaza my Ruthi teng y, “Tangai ba, lo awi, hini li i ny y baly takhra lichira y chohvui pakym moh. Hini li i neampachychi hawi vanrei kalop so ba.

⁹Nichi i choh tyn nai meingtym khen iy nichi lawi abang; nang ai ati sai py so hai y ai nai, kai i khumi teng y leu kapei yb bo. Naibaly nang tui ahai lawh baly, nichi i deu yb nai tui kacheang theung i tui nei ba,” napi.

¹⁰Ruthi ly khaileaung y abi vi na pa-rei lu meung naimy Boaza teng y, “Nang ly ati mana nai kai ka-tawm cheng takhra khumi ai hina tanrei dawn patyp iy pahen na mo?” napi.

¹¹Boaza my, “Nang ly juvo dei nai bo i ka-so, ngamni ai mana tanrei kry na mo, nanai kai thai chum veng bo. Nang ly nangmy i ngamhm ngampochi hawi, nangmy i pri khai su iy, jangni y py avum vai y, niu vai y nai khumichi theung y awm ai nai jeu nai sai py kai pany bo.

¹²ARENG ly huna nai molam y nang ai kawn nai vang pei sy; nang i abyh nai Israela chengchi i ARENG Tameuh ly nang ai amtheaung naira angym pa-rei pei na sy!” napi.

¹³Ruthi my, “Nang ly kai i tlang tleaung y khri pa-rei pahen bo; kai ly nang i miseaungchi tanrei ny y i py, nang ly leu khulym tui hai nai deaungkho y, kai ai paleung hawi hai na bo,” napi.

¹⁴Boaza ly biu cha nai neng khala Ruthi ai, “Jeu ly tako cho kyh rai, thaitho hangra tako bo iy cho ba,” napi. Naibaly Ruthi ly kalop sa naichi hawi vanrei ateh; Boaza my neampachy teng y changleung aheng tako maidenrei talam pi. Ruthi ly kajeu kawi pa-rei cha i, palai asai rai.

¹⁵Naibaly ni ly chohvui pakym bi ai nai chei; Boaza my kalop sa nai keungchi teng y, “Ni ai chohleng pakheng naira y my, chohvui pakym ai nai pei u; ni ai paka u moh.

¹⁶Chohlengchi pakhengra i chohvui maidenrei atheu iy, ni i vui khai pi u,” nanai leu pei.

¹⁷Naibaly Ruthi ly kani dym nai pa-rei hu y chohvui pakym chum baly, cho ati i, chajai choh teaungrei chang y kyh nga nai ne.

¹⁸Ni ly hunichi syn naimy mary theung y vawi i, amni teng y patei pi; mymy ly cha nai bo i tako kamlai py amni cha ai nai pei pi.

¹⁹Amni my ni teng y, “Hini choh ly ma y pakym nai mo? Ami i li y pakym mo? Nang ai pahen nai keung teng y Tameuh my amtheaung hai sy!” napi. Hunaibaly Ruthi ly mymy i chohvui pakym nai li yhmkeung ly Boaza ne, nanai Naomi teng y amti pi.

²⁰Naomi my, “ARENG ly Boaza ai amtheaung hai sy! ARENG ly heng nai khumi, dei nai khumichi teng y py, mymy i adeu nai leu ly khaw hai jojo sy!” nanai thui chum baly mymy ly “Hini khumi ly achi hawi amjo amnau kypkyp ne i, ni ly achi ai ang kry ai nai keungko ne,” napi.

²¹Naibaly Ruthi my, “Nimy ang thui pi nai ly chajai choh tyn nai pajau y ryrei ly ni i li y chohvuichi pakym ai nai ang napi,” nanai amti pi.

²²Naomi my Ruthi teng y, “Ne, ngaawi awi, Boaza i li y kalop sa nai neampachychi hawi chohvui pakym nai ly nang i vui hawi keh. Takhra mang y nabaly nang i vui rai naira avum pajau nai ne,” napi.

²³Naibaly Ruthi ly chajai choh py, chohpui chomaw py tyn pajau nai pa-rei Boaza i li y chohvui pakym bo. Naibaly ni ly amni hawi vanrei awm jojo nai ne.