Read Khumi Chin RUTHI 4 Bible Online

RUTHI 4 - Khumi Chin bible

RUTHI 4

¹Boaza ly mary apai pa-kho leu arum nai meingtym y chei i hu y ateh bo. Naibaly Elimeleka i amjo amnau yhmtheaung kamtym kypkyp ly tym i, ni ly vaichi khala Boaza my thui nai khumi ne. Boaza my ni ai palau i, “Amjo amnau ngai parai nai awi, hi mang y jeu ly ateh rai,” napi. Naibaly mymy ly chei tapai i hu y ateh bo.

²Naibaly Boaza ly mary i miteaung leaung horeichi ai heang i, nichi py hu y ateh hai bo. Nichi ateh u nai kha y,

³Boaza ly my i amjo amnau teng y, “Vai Naomi ly Moba pri i nai ang vawi teang bo; ni ly Elimeleka i khaileaung jo ai ti na i,

⁴huni molam y nang pany baly hawi keh; nang van ai nai ngai baly, vai hi y ateh nai miteaung kehchi i mo y vang ba. Na i py nang ngai y lawh baly, ngai y nai thui; nang van y baly kaimy van ai; ati mana nai mo nabaly nang ly yhmtheaung kamtym kypkyp ne, huni bo y kai amtym ai nai teu,” napi. Huni khumi my, “Kai van ai mang,” napi.

⁵Boaza my, “Hawi mang, na i py nang ly huni khaileaung ai Naomi teng i van ai nabaly, huni ly kadei khumi i yhmtheaungchi amtym jo thai ai nai Moba neampachy lumai Ruthi ai py vang rau ai nai tla,” napi.

⁶Huni khumi my, “Tuna lawh baly kai i cho chanauchi my huni khaileaung amtym thai ai ny y i, kai ly vang ai nai avo teu i py, vang y leang bo; nang phai van teu,” napi.

⁷Huni neng y ka-jo ka-van sa nai khala py, vawnsai tengtawi akatheung nai khala py, jo nai keung ly my i phainai aleng iy vang nai keung teng y pei pi nai reita awm. Huna nai kamta Israela chengchi ly ka-jo ka-van amcheang nai ka-ma-ra sa u nai ne.

⁸Naibaly huni khumi ly Boaza teng y, “Huni khaileaung ai nang phai van teu,” napi i, mymy ly phainai aleng pi iy Boaza ai pei pi bo.

⁹Huna nai khala Boaza my mary i miteaung kehchi hawi hu y awm khumi bawibawichi teng y, “Elimeleka hawi ni i chapo Khilion nini Mahalonchi i yhmtheaung katui ngiereichi ai, Naomi teng i nai vaini kai my van bo, nanai nangchi ly pany nai keungchi ne.

¹⁰Huni bo y Mahalon i aju tavau, Moba cheng neampachy Ruthi ly kai i aju lawm bo. Huna nai kamta huni yhmtheaung katuichi ly kadei khumi i yhm dengtheungchi amtym ai. Kadei khumi i kangpreang py mymy i chengchi hawi my i saleaung khutengra y, avaw by y pa-rei peung jojo ai. Vaini nangchi ly hini molam y pany nai keungchi ne bo,” napi.

¹¹Mary i miteaung kehchi hawi hu y awm nai khumichi my py, “Kaichi ly pany hai nai keungchi ne mang. Nang i aju ai py Jakob i vui cho chanau neangneang tapen pi nai Rakeli hawi Leah nini ai kamta, ARENG my lawm hai sy. Nang ai py Ephrath nupai theung y nang chawn naimy Bethlehem y amyn amthang nai khumi lawm sy.

¹²Hini neampachy i saho y ARENG my amtheaung hai nai cho chanauchi ly Juda hawi Tamar nini i chapo Perez i yhm dengtheungchi kamta, lawm u sy,” napi.

¹³Hunaibaly Boaza ly Ruthi ai pom i, yhm y vawi hai bo. ARENG my Ruthi ai amtheaung hai nai deaungkho y, ni ly deaungdi aniu i, chapo tapen.

¹⁴Neampachychi my Naomi ai, “ARENG ai kawn naimy palo! Mymy ly nang ai ang kry ai nai vaini katu neampacho amtheaung hai bo. Hini deaungdi ly Israela pri y amyn amthang nai khumi lawm sy!

¹⁵Nang i lengngo ly nang ai tamen nai deaungkho y, chapo leaung saryhreichi tleaung y malawn py, nang ai ang kry nai neampachy ne. Vaini ly lengngo my katu neampacho ang tapen pi bo. Huni deaungdi ly nang ai heng hawihai ai i, nang miteaung cheang nai pajau pakhui y nai khala ang awm hai nem ai,” napi u.

¹⁶Naomi ly deaungdi ai la iy kry bo.

¹⁷Yhm deaungpa neampachychi my huni deaungdi ai ly Obed, nanai amyn pathi iy Neampachychi my, “Naomi ly deaungdi leaungrei tapen!” nanai khumi luteng tleirei y thui u nai ne. Obed i chapo ly Jese, Jese i chapo ly Davida ne.

¹⁸Hinichi ly Perez i dengdairei Davida khrairei katu chanauchi ne: hunichi ly Perez, Hezaron, Ram, Amminada, Nashon, Salmon, Boaza, Obed, Jese hawi Davida ne.