Read Khumi Chin 1 SAMUELA 1 Bible Online

1 SAMUELA 1 - Khumi Chin bible

1 SAMUELA 1

¹Ephraim mawitleaung pri Ramah mary y Elakana napi nai khumi leaungrei awm; ni ly Ephraim cheng theaung khumi ne i, ampo ly Jeroham, amsipui ly Elihu ne. Ni ly Zuph nupai, Tohu yhm dengtheung ne.

²Elakana ly Hannah hawi Peninah napi nai aju leaung nyhrei awm. Peninah ly cho chanau sa, na i py Hannah ly so y.

³Elakana ly ati cheaungkhang sa thai nai ARENG ai chiu i, apathyp ai nai Ramah mary i dengdairei, Siloh mary y saneng tleirei chei nai ne. Huni mary y Eli i chapo Hopheni hawi Phineha nini ly ARENG i pathyp pi nai keung kalop sa nai ne.

⁴Elakana ly apathyp nai khala y Peninah hawi chanauchi ai mawi phy ha harei phy pi.

⁵Hannah ai ly mawi phy paji pi patyp keh nai ne. ARENG my Hannah ai cho chanau pei y i py, Elakana ly Hannah ai khri pa-rei khrei nai ne.

⁶ARENG my cho chanau so hai y nai deaungkho y, Peninah ly Hannah ai cheh iy paleung mawn hai reng.

⁷Huna nai kamta ly sanengrei bo y sanengrei dym nai ne. Nichi ly ARENG i yhm y chei nai tleirei, Peninah ly Hannah ai paleung mawn hai nai deaungkho y, Hannah ly mani teicha teinei py cho y naimy vo jojo.

⁸My i juvo Elakana my, “Hannah awi, nang ly ati mana nai y vo ryry mo? Ati teicha teinei py cho y naimy awm lawh mo? Ati mana nai y paleung hawi y naimy awm lawh mo? Kai ly nang i vui chapo leaung horei tleaung y vangteng nai ny y lawh a?,” nanai deng.

⁹Kanirei nai khala y nichi ly Siloh mary ARENG i yhm y teicha teinei cha-nei pajau nai bo y, Hannah ly paleung ka-dawn hawi y nai tym i, ang thau iy khri pa-rei vo naimy ARENG teng y chiu sa; huni neng y pathyp pi nai keung Eli ly katheu sahawi, my i ateh reng nai meingtym y ateh nai ne.

¹¹Hannah my, “Ati cheaungkhang sa thai nai ARENG, nang i miseaung kai ai khen kyh; nang ly kai i patang nai sai pany pi kyh! kai ai tami mo kyh ba! Nang ly nang i miseaungnu teng y chapo pei ai nabaly, ni ai heng nai ryrei nang teng y kang-au ai; ni i sam mana khala py vau hai y ai,”[1] nanai vaineng abeu naimy adeu bo.

¹²Hannah ly ARENG teng y kra parai pa-rei chiu sa; naibaly Eli ly ni i labeaungteng ai khen patawm nai ne.

¹³Hannah i chiu sa nai ly labeaungteng ahyn i py, raawi tyn y nai deaungkho y ni ai pavui nai athang khai i,

¹⁴Eli my neampachy teng y, “Nang ly mana tanrei pavui akheng ai mo? kreip hang hai ba,” napi.

¹⁵Hannah my, “areng awi, kai ly rah pavui y leang, rah py kanei y leang; kai ly khri pa-rei paleung hawi y i, kaimy i patang nai sai ARENG teng y amti pi nai chiu kasa nai teu;

¹⁶kai ai tahm by y nai neampachy, nanai dawn moh kyh; kai ly paleung ka-dawn hawi y nai deaungkho y, hina nai chiu kasa nai ne,” napi.

¹⁷Eli my, Paleung awmnem naimy tako ba; Israela chengchi my chiu sa nai ARENG ly nang i hnei nai kamta pei sy,” napi.

¹⁸Hannah my py, “Nang i pei nai amtheaung naira kai teng y tym hai sy,” napi. Naibaly ni ly paleung awmnem naira nga naimy theu i, teicha teinei maidanrei cha bo

¹⁹Naibaly khawn mang y Elakana hawi yhm dengtheungchi ly khawn angthodyh ang thau iy ARENG ai chiu pajau baly, nichi ly Ramah mary mychi i yhm y vawi u teang bo. Elakana ly my i aju Hannah hawi i ahawi i, ARENG ly Hannah i chiu sa nai pathang pi bo.

²⁰Hunai deaungkho y Hannah ly deaungdi aniu i, chapo tapen. Ni my, “Kai ly ARENG teng y hnei nai deaungkho y, hini chapo nga nai ne,” nanai thui i, amyn ly Samuela pathi bo.

²¹Elakana ly my i yhm dengtheungchi hawi vanrei, saneng tleirei ARENG teng y talam reng nai kapathypra py, talam patyp nai amy i leu ka-deu kapathypra py, Tameuh teng y talam ai nai Siloh mary y chei ai nai neng tym bi bo.

²²Na i py hini tlenrei nai ly Hannah abang y nai ne; ni ly juvo teng y, “Kai ly deaungdi kanu-li phai li baly, ni ai ARENG i yhm y awm hai jo ai nai, kaimy kahawi ai,” napi.

²³Elakana my, “Hawi mang, nangmy i ngai nai kamta so ba; deaungdi kanu-li y ryrei ly yhm y phai awm jo teu; nangmy i leu adeu nai kamta sa khyp pajau ai nai, ARENG my sabawm sy,” napi. Naibaly Hannah ly deaungdi ai kanu panei naimy, kanu-li y ryrei ly yhm y awm nai ne.

²⁴Ni ly deaungdi kanu-li chum bo nabaly, saneng thomrei awm nai si katai[2] harei, takodei teaungnyh pa-thom sie tariu rei, kreip hang mawipeih adym harei syn naimy deaungdi hawi vanrei, Siloh mary y chei hai bo. Deaungdi Samuela ly khri pa-rei theang ala rai.

²⁵Nichi ly si katai padei chum nai khala y, deaungdi ai ly Eli teng y tha u.

²⁶Hannah my Eli teng y, “Areng awi, kai ai pahen kyh ba; nang ly kai ai pany jo rai a? Kai ly vaichi khala nang i sahawi y angdo naimy ARENG teng y chiu sa nai neampachy ne.

²⁷Kai ly ARENG teng y hini deaungdi ai kahnei nai ne; kahnei nai kamta mymy ly ang pei bo.

²⁸Hunaibaly kai ly hini deaungdi ai ARENG teng y talam nai ne; ni heng nai sala ryrei ly ARENG teng y kaau bo,” napi. Naibaly nichi ly ARENG ai chiu u bo.