Read Khumi Chin 1 SAMUELA 11 Bible Online

1 SAMUELA 11 - Khumi Chin bible

1 SAMUELA 11

¹Lorei kamta kra nai bo y Ammon samrang Nahasa ly my i tavaimichi ai lu sa iy, Kilead pri Jabe mary y tiu ai nai, tavai amsa u bo. Nichi ly mary ai katanmeuh nai deaungkho y, Jabe mary i khumichi my Nahasa teng y, “Kaichi hawi amkawm ai nai sumneang akhai baly, kaichi ly nang i peang nai anui y awm ai mang,” nanai thui u.

²Nahasa my, “Israela cheng verei tahm anem hai ai nai, nangchi i lamtang mei ngierei thapiu vui khala naini, nangchi hawi amkawm nai sumneang akhai pajau ai,” napi.

³Jabe mary i lu sa nai keungchi my, “Israela pri verei y satang thai hai ai nai savai pato ai i, kaichi ai kani saryhrei neng pei rai; kaichi ai sabawm ai nai khumi leaungrei py by y lawh nabaly, kaichi ly nang teng y abyh ai,” napi u.

⁴Sawla awm nai Kibeah mary y savaichi tym u i, huni satang amti pi nai khala y, khumichi ly paleung phra atho di u i, vo u bo.

⁵Huni neng khala y Sawla ly my i si kataichi hawi, li i dengdairei vawi teang. Naibaly ni ly “Ati mana nai mo?” nanai deng; khumi bawibawichi ly ati mana nai y vo u nai mo? Khumichi ly Jabe mary i savaichi my syn nai satang ai, ni teng y amti pi.

⁶Huni satang Sawla thai nai thym y my, Tameuh i phailo ly ni teng y tym i, ni ly khri pa-rei kado theu nai ne.

⁷Ni ly si katai nyhrei la iy, abai piupa bo; savaichi ai Israela pri verei y syn hai i, “Tavai thau ai nai Sawla hawi Samuela nini nithun abang y nai khumi ngiereichi i sichi ai, hina nai kamta abai piupa ai!,” nanai satang thai hai bo. Israela khumichi ly ARENG ai jei nai deaungkho y, nichi ly angym u kaleuteu naimy theu u bo.

⁸Sawla my nichi ai Bezek mary y angym hai i, Israela pri i khumi leaung 300,000 rei hawi, Juda pri i leaung 30,000 rei nga.

⁹Huni khumichi my Jabe mary i savaichi teng y, “Kaichi ly khawndam kani thun y rai khala y, nangchi mary i khumichi ai atleu ai, nanai nangchi i khumichi teng y thui pi,” napi. Jabe mary i khumichi ly huni satang nga nai khala y, khri pa-rei amo theu u bo.

¹⁰Nichi ly Nahasa teng y, “Kaichi ly nang teng y khawndam abyh ai; kaichi i tlang tleaung y ngai nai kamta sa pajau,” napi.

¹¹Huni vum y Sawla ly mymy i khumichi ai phy thomrei kamkawm sa; khutawi mo y nichi ly paleung ka-echi i tai naira mang y athorei my tiu u i, kani thunteng baly Ammon chengchi sum u bo; dei y naimy tleaung nai khumi py ahei u phro i, amy ngai ngai angpreng u akyhkyh pawn nai ne.

¹²Huna nai khala y Israela chengchi my Samuela teng y, “Sawla ly kaichi i samrang lawm ai nai ataing y, nanai leu thui u nai khumichi ly ma y awm u vui mo? Huni khumichi ai kaichi teng y au, kaichi my padei pawn ai!,” napi u.

¹³Na i py Sawla my, “Vaini ly Israela chengchi ai atleu nai ARENG i kani ne; vaini ami ai py padei moh,” napi.

¹⁴Naibaly Samuela my py nichi teng y, “Achi bawibawi ly Kilakala mary mang y chei iy, Sawla ly samrang ne, nanai aeu naimy tahm pasang u bi sina,” napi.

¹⁵Naibaly nichi bawibawi ly Kilakala mary mang y chei u i, meingtym kachaira y, Sawla ly samrang ne, nanai aeu naimy tahm pasang u bo. Nichi ly amkawm nai kapathypra talam u; naibaly Sawla hawi Israela cheng bawibawichi ly amo theu nai pawi sa u bo.