Read Khumi Chin 1 SAMUELA 12 Bible Online

1 SAMUELA 12 - Khumi Chin bible

1 SAMUELA 12

¹Naibaly Samuela my Israela khumimipuichi teng y, “Kai ly nangchi i hnei nai kamta, nangchi i vui samrang kang khai pi bo i,

²vai, nangchi ly lu sa nai keung nga u bo. Kai ly miteaung cheang, sam py pau bo; kai i chapochi py nangchi hawi vanrei awm. Kai ly deaungdi khala i dengdairei, nangchi ai lu kang sa pi bo.

³Vai, kaimy awm nai thym khala y, sa tamang nai kamngo saisairei awm lawh teu baly, ARENG i mo y py, mymy khai takhra pi nai samrang i mo y py, nangchi ly kai ai neng hai iy thui pi u; kai ly ami i si kala vui nai awm mo? Ami i keaungngo kano kasau ai, teng y naimy kala vui lawh mo? Kai ly khumi leaungrei ai li-tapawp nai mo, ana nai mo kasa vai a? unchi kala vai a? hina nai saisairei kasa nai awm lawh baly, kai ly hunichi kape teang ai,” napi.

⁴Khumi mipuichi my, “Ny y leang, nang ly kaichi ai tapawp nai py, kaichi ai ana nai py awm vai y leang; ami i vawnsai py la pi vui nai by y leang,” napi.

⁵Samuela my, “Kai i tlang tleaung y ati sai py kamngo by y leang, nanai nangchi niu nai ly ARENG my pany; mymy i khai takhra pi nai samrang py pany nai ne,” nanai thui pi baly, mipuichi my, “Ne mang, ARENG ly kaichi i pany hai nai keung ne,” nanai thui u bo.

⁶Samuela my thui bi nai ly “Mosi hawi Aron nini ai vawi takhra nai, nangchi i amsi pajochi ai Aikupta pri i dengdairei pahawi nai keung ly ARENG ne.

⁷Nangchi ly vai, ang thau ly angdo u; ARENG i mo y nangchi ai kang neng hai ai; mymy ly nangchi hawi amsi pajochi ai, rengrang tlai atleu pi nai ai pany u jo ba.

⁸Jakob hawi my i yhm dengtheungchi ly Aikupta pri y chei u nai khala y, Aikupta chengchi my nichi ai ana u kalikachi bo. Huna nai khala y nangchi i amsi pajochi ly kasabawmra nga ai nai ARENG teng y aeu u nai deaungkho y, mymy Mosi hawi Aron ai pato pi. Nini leaung nyhrei ly nangchi i amsi pajochi ai Aikupta pri i dengdairei pahawi iy, hini pri y khuteng sa hai bo.

⁹Na i py khumichi ly mychi i ARENG Tameuh ai tami u vui nai deaungkho y, mymy ly Philistia khumichi ai py, Moba samrang hawi Hazor tavailu areng Sisera ai py, tavai tiu hai i, nangchi i amsi pajochi ly tavai sum u bo.

¹⁰Naibaly nichi ly sabawmra nga ai nai ARENG ai palau u i,’ Kaichi ly kamngo sa tamang u bo; ARENG ai khai su iy Bala tameuh hawi Asatare tameuh nu i mynchi ai chiu u. Kaichi ai paleung ka-echi kiu i nai atleu pi kyh ba; kaichi ly nang ai kang chiu u ai!,’ nanai takeng u bo.

¹¹Hunai deaungkho y ARENG ly Kideon, Barak, huni bo y Jephetha, kangkhym y ly kai ai ang pato nai ne. Kaichi bawibawi ly nangchi ai paleung ka-echi kiu i atleu pi nai deaungkho y, nangchi ly tlamsa naimy awm u nai ne.

¹²Na i py nangchi ai Ammon samrang Nahasa my ang tiu ai nai sa nai khala y, nangchi ly ARENG ai samrang palawn y i, nangchi ai peang ai nai samrang khai pi ai nai, kai teng y hnei u bo.

¹³Nangchi my vawi takhra nai samrang ly vai, nangchi i mo y awm bo; nangchi hnei nai kamta ARENG ly ni ai samrang y palyn pi bo.

¹⁴Nangchi ly nangmychi i ARENG Tameuh ai, jei kaji naimy chiu iy leu pei naichi ai akhi y, leu tangai nai hawimy nangmychi i samrang hawi vanrei, mymy i pahen naira y atyp u baly, nangchi ly tlamsa ai.

¹⁵Na i py nangchi ly ARENG i leu tangai y naimy, leu pei naichi akhi u vui lawh baly, mymy ly nangchi hawi nangchi i samrang ai ang tiu ai,

¹⁶Hunai deaungkho y nangchi ly nangmychi awm naira y angdo u; hi y angdo u naichi awi, ARENG my patei pi nai sa thai naira, nangchi niu u ai mang.

¹⁷Vai i neng ly jengha nai kanipui ne. Na i py kaimy chiu sa baly, ARENG ly kani pajyh hai iy, kani nai hai ai. Huna nai khala y samrang ai nangchi hnei u lawh nai kamngo ly mana tanrei len na mo, nanai nangchi pany u ai.

¹⁸Naibaly Samuela ly chiu sa i, huni kani y my ARENG ly kani pajyh hai iy, kani nai hai ryp bo. Naibaly khumi bawibawichi ly ARENG hawi Samuela ai khri pa-rei jei u bo.

¹⁹Naibaly nichi my Samuela teng y, “Areng awi, kaichi dei y ai nai nang i ARENG Tameuh teng y, kaichi i vui chiu so pi kyh ba; kaichi ly samrang hnei nai deaungkho y, kamngo tleaung y kamngo kasa u ra lawh bo,” napi u.

²⁰Samuela my, “Nangchi ly hina nai hawi y nai kalop sa lawh teu i py, ARENG ai khai u su moh; mymy aipaleung hawi verei chiu u.

²¹Tapawp nai tameuhchi teng y ly abang u moh; huni tameuhchi ly tameuh tatang ny y nai deaungkho y, nangchi ai sabawm ai nai py, atleu ai nai py kawp u y leang.

²²ARENG ly nangchi ai mymy i khumi palawn iy vawi takhra bo. Hunai deaungkho y mymy ly my i amyn saho y nangchi ai khai su y leang.

²³Kai ly nangchi i vui chiu so pi y nai awm vai y leang; huni molam y ARENG my pajeng moh sy; kai ly nangchi ai hawi naira naini kang thui pi ai.

²⁴ARENG ai jei kaji iy, paleung hawi verei ka-ym awm naimy chiu so u; nangchi ly mymy i rengrang ang sa pi naichi ly pany u jo ba.

²⁵Na i py nangchi ly kamngo sa u veangveang lawh baly, samrang hawi vanrei, nangchi tama u ai,” napi.