Read Khumi Chin 1 SAMUELA 15 Bible Online

1 SAMUELA 15 - Khumi Chin bible

1 SAMUELA 15

¹Samuela ly Sawla teng y, “ARENG ly mymy i khumi Israela chengchi i samrang lawm ai nai molam, nang ai asitui lei ai nai kai ai pato nai ne. Hunai deaungkho y, ati cheaungkhang sa thai nai ARENG i leu pei naichi tangai ba.

²Israela chengchi ly Aikupta pri i dengdairei theu u nai khala y, Amalek chengchi my paka; hunai deaungkho y mymy ly Amalek chengchi ai pajengai.

³Nang ly chei iy Amalek chengchi ai tiu; nichi i vawnsai ateaung awn nai ngierei, ati cheaungkhangchi ai py, taphra pawn ai nai tla; sorai ai py takhawi moh; khumi neampacho neampachy, deaungdi, deaungdi chymplei naichi, huni bo y awm nai sichi, beramchi, kula-iuchi hawi keaungngo kano kasauchi, hunichi ai tamyh pawn ba,” napi.

⁴Sawla ly my i tavaimi soraichi ai Telem mary y pangym iy, kati cham i, Israela khura i tavaimi leaung 200,000 rei hawi Juda khura i tavaimi leaung 10,000 rei awm nai ne.

⁵Naibaly ni ly my i tavaimichi hawi vanrei, Amalek khumichi i mary mang y chei u iy, tui by y nai tavo leaunghawira y meingtym la u bo.

⁶Ni ly kenit chengchi teng y, “Nangchi ly Israela chengchi Aikupta pri i dengdairei theu u nai thym khala y, nichi ai sabawm u. Hunai deaungkho y nangchi ai kaimy padei y ai nai, Amalek chengchi teng i nai theu u,” nanai pany hai yb bo. Hunai deaungkho y kenit chengchi ly theu u pawn bo.

⁷Sawla ly Havila mary i dengdairei, Aikupta pri nisi mang y awm nai Sura mary tym pa-rei, Amalek chengchi ai preng naimy tiu bo.

⁸Ni ly Amalek samrang Akad ai kangheng tang naimy patiu; khumi bawibawichi ai ly padei pawn nai ne.

⁹Na i py Sawla hawi my i khumichi ly Akad ai padei y i, veung hawi keh nai beram hawi sichi, mo-cha hawi keh nai sicho, beramchochi hawi, hawi nai vawnsai cheaungkhangchi ly taphra u y; teaung ai ngo y naichi, vang teng y naichi ai naini taphra u nai ne.

¹⁰ARENG ly Samuela teng y,

¹¹“Sawla ai samrang kapalyn nai ly tamang bo; ni ly kai ai hi vui iy, kai i leu tangai y lawh bo,” napi. Samuela ly kado theu bo. Ni ly ARENG teng y vumtorei ahui pi iy,

¹²ni ly khawn angthodyh Sawla ai hau ai nai theu; Sawla ly Karamela mary y chei iy, my i vui pany jo ai nai leungcheng pado, nanai hawi, hu i dengdairei Kilakala mary mang y chei jo, nanai py Samuela thai nai ne.

¹³Samuela ly Sawla awm naira y tym i, Sawla my, “Nang ai ARENG my amtheaung hai sy! kai ly ARENG i leu pei naichi katangai bo,” nanai thui iy lamchung bo.

¹⁴Samuela my, “Huna lawh baly ati mana nai y beram hawi sichi a-u nai raawi kathai lawh mo?,” nanai deng.

¹⁵Sawla my, “Kai i khumichi ly huni beram hawi sichi ai, Amalek chengchi teng i nga nai ne. Nichi ly veung hawi keh nai beram hawi sichi ai, nang i ARENG Tameuh teng y apathyp ai nai khai u. Huni bo i naichi ly kaichi my taphra be bo,” nanai pathang.

¹⁶Samuela my, “Tangai ba, ARENG ly kai ai jangdyh vum ati mana leu pei mo nanai, nang ai kang thui pi ai,” nanai thui baly, Sawla my, “Thuipi ba,” napi.

¹⁷Samuela my, “Nang ly nangmy ai ati sai py ny y nai khumi, nanai apalawn i py, nang ly Israela chengchi ai lu sa nai keung lawm bo. ARENG ly nang ai Israela chengchi i samrang lawm ai nai asitui ang lei pi bo.

¹⁸Kamngo parai nai Amalek chengchi ai tamyh pawn ai nai leu pei iy, ang pato nai ne. Mymy ly nichi ai leaungrei py tleaung y pa-rei, padei pawn ai nai leu ang pei bo.

¹⁹Nang ly ati mana nai y mymy i leu pei nai tangai y lawh mo? Ati mana nai y atiura i nga nai vawnsaichi ai ngai phi nai vym vui iy, ARENG i ngai y nai kalop sa u lawh mo?,” napi.

²⁰Sawla my, “Meitang khyp, kai ly ARENG i leu pei nai tangai nai ne; mymy i thui pi nai kamta chei iy, samrang Akad ai kapatiu; Amalek cheng bawibawichi ai py, katamyh pawn bo.

²¹Na i py kai i khumichi ly mychi nga nai veung hawi keh nai beram hawi sichi ai padei y naimy, nang i ARENG Tameuh teng y apathyp ai nai, hini Kilakala mary y syn u nai ne,” nanai pathang teang.

²²Samuela my, “ARENG ly leng patlum nai kapathypra, napi nai katalamrachi talam nai hawi, mymy i leu pei nai tangai naichi theung y, ati ai ngai keh mo? Leu tangai nai ly veung hawi keh nai beram hawi pathyp nai tleaung y vang teng keh nai ne.

²³Mymy ai tiu nai ly uimiu khawn nai kamta hawi y keh nai ne i, paleung len amlyh nai py, mynchi ai chiu nai kamta kamngo len. Nang ly ARENG i leu pei nai tangai y nai deaungkho y, mymy ly nang ai samrang i nai pala vui bo,” napi.

²⁴Huna nai khala Sawla ly “Ne, kai kamngo kasa bo; kai ly ARENG i leu pei naichi py, nang i lam patei naichi py, tangai y nai ne. Kai ly kaimy i khumichi ai jei nai deaungkho y, nichi ngai nai kamta kasa lawh bo.

²⁵Na i py kai ly ARENG ai chiu pajau ai nai, nang ly kai i kamngo pahen pi iy, kai hawi vanrei Kilakala mary y abang ai nai kang takeng,” napi.

²⁶Samuela my, “Nang hawi kai abang y leang; nang ly ARENG i leu pei nai tangai y nai deaungkho y, mymy ly nang ai Israela samrang i nai pala vui bo,” napi.

²⁷Naibaly Samuela ly amhi iy tako pi vui ai nai khala y, Sawla my ni i baichu kangjiu ai amkhaw cheng i, baichu ly aseih vui bo.

²⁸Samuela my ni teng y, “ARENG ly vaini my Israela pri ai, nang teng i nai la vui iy nang tleaung y hawi keh nai khumi leaungrei i kiu y au veng bo.

²⁹Israela chengchi i nang parai nai Tameuh ly ka-chawi thui y, paleung py amtlau vai y leang; mymy ly khumi kamta, mymy i paleung amtlau vui ai ny y,” napi.

³⁰Sawla my, “Kai ly kamngo kasa lawh bo; na i py thuitlamsi ly kai i cheng lu sa nai keungchi i mo y py, Israela cheng vereichi i mo y py, kai i tahm awm nai phra hai y naimy, kai ly nang i ARENG Tameuh ai chiu pajau ai nai, kai hawi vanrei abang teang kyh ba,” nanai takeng.

³¹Hunaibaly Samuela ly ni hawi vanrei, Kilakala mary y abang bo; Sawla py ARENG ai chiu nai ne.

³²Samuela my, “Samrang Akad ai kai teng y jeu hai,” napi. Akad my, “kai ly deira i nai kalawi bo,” nanai adawn i, jei hyn naimy ni teng y chei.

³³Samuela my, “Nang i haisau hawi, amhm neangneangchi ly mychi i chanauchi sum u bo; huna nai y vai, nang i amhm py, my i chapo sum ai,” nanai thui i, Akad ai Kilakala mary i maicham mo y tawp piupa bo.

³⁴Naibaly Samuela ly Ramah mary y chei i, samrang Sawla py Kibeah mary y vawi ali teang bo.

³⁵Samuela ly my deung y samrang ai niu ali bi y leang bo. Na i py mymy ly Sawla i vui y, khri pa-rei paleung mawn nai ne. ARENG py, Sawla ai Israela samrang y palyn nai molam paleung hawi y nai ne.