Read Khumi Chin 1 SAMUELA 17 Bible Online

1 SAMUELA 17 - Khumi Chin bible

1 SAMUELA 17

¹Philistia chengchi ly Juda pri Sokoh mary y tavai tiu ai nai akachu u bo; huni mary hawi Azeka mary sala i, Ephe Damim napi nai meingtym y tai u.

²Sawla hawi Israela chengchi py akachu u i, Elah angdym angdengra y tai u. Nichi ly hu y Philistia chengchi ai tiu ai nai angveirym nai ne.

³Philistia chengchi ly mawi aheung hareira y, Israela chengchi ly mawi hareira y meingtym la u bo. Nichi sala y ly leaunghawi arai nai ne.

⁴Kath mary i Koliatha napi nai khumi ly Philistia chengchi i, tai naira i nai theu iy Israela chengchi ai, mymy hawi atiu ai nai palau. Ni ly miu tariurei bo y ka-rei asang i,

⁵Sie 97rei ji nai kheupaja hawi sa nai tavai baichu amchiu iy, kheupaja lukhym amym.

⁶Ni i kheu y py kheupaja hawi sa nai kheu amchiura amchiu teang; Naibaly ni ly my i paleang tleaung y kheupaja jawhaw harei apu nai ne.

⁷Ni i jawhaw apheung ly pe cheaungkheu tirei len na. Naibaly jawhaw apham ly sie 11rei kaji awm. Tavaimi leaungrei ly ni i mo y khupui syn pi naimy, tako ai nai tla.

⁸Koliatha ly angdo iy Israela chengchi teng y, “Nangchi ly hini meingtym y ati aly y jeu u nai mo? tavai atiu u ai nai a? Aw Sawla i miseaungchi awi, kai ly Philistia cheng ne; kai hawi atiu ai nai nangchi theung i khumi leaungrei vawi takhra u.

⁹Ni my kai ai pajau iy padei vui lawh baly, kaichi ly nangchi i miseaung y awm ai; na i py kaimy pajau iy ni ai kapadei vui lawh baly, nangchi ly kaichi i miseaung lawm u ai nai tla ai.

¹⁰Vai, kai ly Israela tavaimichi theung i leaungrei hawi atiu ai nai kang palau nai he; kai hawi atiu ai nai khumi leaungrei ai vawi takhra u!,” napi.

¹¹Sawla hawi my i tavaimi risachi ly huni leu thai nai khala y, khri pa-rei jei u na.

¹²Davida ly Juda pri Bethlehem mary i khumi Jesai i chapo ne. Jesai ly chapo leaung tajarei awm; Sawla samrang sa nai neng y, Jesai ly khri pa-rei miteaung cheang na bo.

¹³Ni i chapo kalen leaung thomrei ly Sawla hawi vanrei tavai atiu ai nai chei u; chapo chalu ly Eliaba, pa-nyh i nai ly Abinada, pa-thom i nai ly Shammah ne.

¹⁴Davida ly chapo kasawi keh ne; amjo kalen leaung thomreichi ly Sawla teng y kalop sa u nai ne i,

¹⁵Davida ly tlentlenrei Bethlehem y vawi iy, ampo i beramchi typ pi nai ne.

¹⁶Koliatha ly Israela chengchi hawi atiu ai nai, dym tlei khawn tleirei, kani vui palyh ryrei palau bo.

¹⁷Kanirei khala y Jesai ly Davida teng y, “Hini chohnei taheang nai sie 16rei hawi tako tleu horei lo ly ngamjochi awm nai tavai tai naira mang y chei kaliki.

¹⁸Tavai lu areng i vui kanu katho phi horei py syn iy pei pi; ngamjochi noso hawi mo, hawi y mo, nanai khen ly no hawi nai sai pany ai nai saisairei syn iy vawi hai ba.

¹⁹Samrang Sawla py, nang i amjochi hawi takhra Israela cheng bawibawichi py, Ela angdym angdeang y, Philistia chengchi ai tavai tiu ai nai awm u nai ne,” napi.

²⁰Davida ly kani pa-nyh khawn angthodyh ang thau iy, beramchi ai ly khumi leaungrei teng y au i, teicha teineichi syn naimy ampo Jesai i thui pi nai kamta chei bo. Ni ly Israela chengchi hawi Philistia chengchi atiu ai nai aeu nai my amsa nai neng y tym.

²¹Philistia cheng hawi Israela chengchi ly tavai atiu ai nai mo atha leungtang naimy, meingtym la u bo.

²²Davida ly my i syn nai teicha teineichi ai, teicha teinei paji nai keung teng y au jo iy, tavai atiu nai mang y angpreng; naibaly my i amjochi teng y chei i, noso hawi nai saichi deng.

²³Huna nai nichi hawi leu arum nai thym khala y, Koliatha ly angchei i sa reng nai kamta, Israela chengchi ai tavai atiu ai nai palau; huna nai palau nai ly Davida thai bo.

²⁴Israela chengchi ly Koliatha ai niu u nai khala, jei nai y angpreng u.

²⁵“Ni ai khen u cham! ni i kaau nai tangai u; Samrang Sawla ly ni ai padei pajau nai keung ai, kawn vang langseaung pei ai nai adeu yb bo; samrang ly my i chaniu hawi py apom hai iy, ni i ampo i yhm dengtheungchi ai py, kahm lawi hai ai ti,” nanai mychi tengtawi arum u.

²⁶Davida ly sahawi i khumichi teng y, “Hini Philistin khumi ai padei nai keung hawi, Israela chengchi kangji nga ai naira i, atleu pi nai khumi ly ati nga ai mo? Hini Tameuh by y nai Philistin chengchi ly ati mana naichi ne iy, Tameuh kangheng i tavaimichi ai ka-jo hau lawh mo?,” nanai thui.

²⁷Nichi my Koliatha ai padei pajau nai khumi i nga ai nai leaungsaichi thui pi bo.

²⁸Davida i amjo kalen Eliaba ly Davida hawi khumichi i arum nai thai nai khala y kado theu i, “Nang ly ati aly hi y jeu nai mo? Daichi ka-vym theung y nang i beramchi ai ly ami my kry mo? Nang i paleung len nai, nang i paleung akhum nai ly kai pany; nang ly tavai ka-tiu khen ai nai jeu nai ngaw khyh!,” napi.

²⁹Davida my, “Kai ati kasa lawh sai mo? Kai ly leu sairei py deng pajau y na bo a?,” napi.

³⁰Ni ly khumi takhra mang y amhi vui bi i ni teng y, vaichi khala i kamta deng bi, vaichi i kamta pathang u nai ne.

³¹Khumi phyreichi my Davida i thui naichi thai i, Sawla teng y amti pi, Sawla ly Davida ai palau bo.

³²Davida my Sawla teng y, “Samrang awi, hini Philistin khumi ai ami py jei mo sy; kai ly chei iy ni hawi atiu ai,” napi.

³³Sawla my, “Nang ly ni ai mana tiu pajau ai mo? Nang ly deaungdichy teu rai; ni ly my deungrei tavai risa sa nai khumi ne na a!,” napi.

³⁴Davida my, “Tahm awm parai nai samrang awi, kai ly ngaai i beramchi typ nai ne; beram harei ai khrangsi my mo, tavym my mo, tawn vui lawh baly,

³⁵kai ly huni mawi kasi ai hui nai tiu iy, beram ai atleu teang bo. Naibaly khrangsi mo, tavym my mo, kai ai ang taba lawh baly, kai ly tao y taau cheng iy dei pa-rei kapakhau ka bo.

³⁶Kai ly khrangsi hawi tavym ai kapadei nai khumi ne i, Tameuh kangheng ai ym nai tavaimi ai ka-jo hau nai khumi, Tameuh by y nai Philistin khumi ai kapadei pajau.

³⁷ARENG ly kai ai khrangsi hawi tavym teng i atleu nai ne. Mymy ly kai ai hini Philistia khumi kiu i nai atleu ai,” napi. Sawla my, “Hawi mang, chei ba; ARENG ly nang hawi vanrei awm hai sy,” napi.

³⁸Naibaly my i tavai ateaung Davida ai amchiu hai; kheupaja lukhym amym hai i, tamo baichu py amchiu hai.

³⁹Davida ly tamo baichu salo y Sawla i haisau aneang iy tako cham bo. Na i py tamo baichu amchiu vai y nai deaungkho y tako thai y. Hunaibaly Sawla teng y, “Kai ly hini ateaungchi amchiu vai y leang,” nanai thui i aleng vui bo.

⁴⁰Ni ly my i beram typ nai cheaungvawi la iy, tavo micheaung theung y lengseaung alymkym nai pangrei akhui i, jeubo theung y pacheang. Naibaly ni ly lijai angveirym iy, Koliatha hawi avum ai nai chei bo.

⁴¹Philistia khumi ly my i khupui syn pi nai khumi i nithun y awm iy, Davida awm nai mang y tako tapai bo.

⁴²Naibaly ni ly Davida ai hawihai palai khen nai khala y, Davida ly khen apu parai nai deaungdi leaungrei teu, nanai niu nai y, ni ai panui hai bo.

⁴³Ni my Davida ai, “Tuni cheaungvawi hawi ati aly jeu nai mo? kai ai ui niu lawh sai a?,” napi chum baly, my i tameuh amyn y Davida ai pasawi bo.

⁴⁴Naibaly Davida my, “Jeu ba, kaimy nang i ngan ai, tavochi hawi mawi ka-sichi i teicha lawm hai ai,” napi.

⁴⁵Davida my, “Nang ly haisau, tivi hawi jawhaw syn naimy kai teng y jeu bo; na i py kai ly nangmy ka-jo hau nai Israela tavaimichi i Tameuh, ati cheaungkhang sa thai nai ARENG i amyn hawi kang jeu nai ne.

⁴⁶Vaini my ARENG ly nang ai, kai i kiu y ang-au ai; kai ly nang ai kang pajau vui ai i, nang i lu kang tameang vui ai. Naibaly Philistin tavaimichi i veuchi ai tavochi, mawi kasichi i teicha lawm hai ai; huna nai khala y Israela chengchi teng y, Tameuh awm nanai khaileaung pri vereichi my pany u ai.

⁴⁷Mymy ly my i khumichi ai atleu ai nai molam y haisau, tivi ateaungchi teaung ai nai aly ngai y nai py, hini meingtym y awm nai khumichi my niu u ai. Mymy ly tavai leaungsai kawp keh nai ne i, nangchi bawibawi ai kai i kiu y ang-au ai,” napi.

⁴⁸Koliatha ly Davida teng y chei tapai bi; naibaly Davida ly my hawi tavai atiu ai nai Philistia khumi mo mang angpreng kaliki iy,

⁴⁹my i jibo theung i lengseaung harei tapo i, lijai hawi Koliatha ko; lengseaung ly Koliatha i lukati y chawm khyp i, lupang khovau bo. Naibaly Koliatha ly khaileaung y atlym nai ne.

⁵⁰Davida ly hina nai kamta haisau abawi y naimy, lijai hawi lengseaung harei y my Koliatha ai dei pa-rei tamo nga hai iy, pajau vui bo!

⁵¹Ni ly Koliatha awm naira y angpreng iy, ni ai kheu hawi chiu; naibaly ni i haisau keura i haisau aphiu iy, lu tameang i padei vui bo. Philistia chengchi ly mychi i sorai pui dei nai niu u nai khala y, angpreng u pawn bo.

⁵²Israela hawi Juda risachi py, aeu nai raawi hawi my kath[3]mary hawi Ekron mary katheuchi ryrei, nichi ai hui iy tiu u. Philistia chengchi ly tamo nga u i, kath mary hawi Ekron mary Saaraim lam jeungrei dei u.

⁵³Israela chengchi ly Philistia chengchi ai hui nai ali teang chum baly, Philistia chengchi i tai naira y kun u iy lawm u bo.

⁵⁴Davida ly Koliatha i lu la iy, Jerusalem mary y syn bo. Na i py Koliatha i tavai ateaungchi ai ly my i kanih yhm theung y reume bo.

⁵⁵Koliatha hawi atiu ai nai Davida tako jo nai Sawla niu nai khala y, my i tavailu Abana teng y, “Abana awi, huni deaungdi ly ami i chapo mo?,” nanai deng. Abana my, “Samrang awi, kai ly pany y,” nanai pathang.

⁵⁶Sawla my, “Pany y baly chei iy satang lo,” napi.

⁵⁷Naibaly Koliatha ai padei chum nai tavai taira y vawi nai khala y, Abana ly Davida ai palau iy Sawla i mo y tym hai bo. Huna nai khala y Davida ly Koliatha i lu syn naimy awm rai.

⁵⁸Sawla my, Deang awi, “Nang ly ami i chapo mo?,” nanai deng. Davida my, “Kai ly Bethlehem y awm nai nang i miseaung Jesai i chapo ne,” nanai pathang bo.