Read Khumi Chin 1 SAMUELA 20 Bible Online

1 SAMUELA 20 - Khumi Chin bible

1 SAMUELA 20

¹Naibaly Davida ly Ramah mary ka-peang Naioth avang dengdairei angpreng i, Jonathan teng y chei iy, “Kai ly ati kasa lawh mo? Kai ly ati kamngo kasa lawh mo? Kai ai padei ai nai pa-rei nang i ampo ai, kai ati tamang lawh mo?,” nanai deng.

²Jonathan my, “Huna nai kamta ne moh sy; nang dei y leang mang! kai i ngaai ly ati mo sa i py, so y rai khala y kai teng y ang thui pi reng nai ne; kai teng y ati sai py apha y leang; nang ai padei ai, nanai ly ny y leang!, nanai pathang.

³Na i py Davida my, “Nang ly kai ai mana tanrei tamen mo, nanai nang i ngampo pany nai ne. Nang paleung hawi y lawh na, nanai mawn hai nai deaungkho y, ni ly mymy i dawn yb nai, nang teng y thui pi y leang. Kai ly dei ai nai kheukan harei ngai khyh bo, nanai heng nai keung ARENG Tameuh amyn y, nang teng y vaineng abeu bo!,” napi.

⁴Jonathan my, “Nang i ngai nai kamta, kaimy kang sa pi ai mang,” napi.

⁵Davida my, “Khawndam ly lo si pawi kani ne. Kai ly samrang hawi vanrei cha nei ai avo nai neng ne. Na i py nangmy avo hai ai nabaly, kai ly daichi theung y chei iy, khawnvai dym ryrei aheu jo ai.

⁶Sabawira y kai by y nai ngampo my niu lawh nai khala y, vai i neng ly kai i yhm dengtheungchi i neng kamtleh apathyp nai neng ne nai deaungkho y, kai teng y ang takeng i, Bethlehem mary y vawi jo, nanai ngampo teng y amti pi.

⁷Samrang my, ‘Hawi mang’ napi baly, kai i vui awmnemra nga bo; na i py ni my kado theu lawh baly, kai ai padei ai tau khyp nai bo, nanai nang pany ai.

⁸Pahen parai naimy kai ai sabawm ba. Ani sala i adeu nai vaineng ly khaw sy. Na i py kai kamngo kasa lawh baly, nangmy naimy kai ai padei teu ba! Ati mana nai ngampo kiu y kai ai padei ai nai au lawh ai mo?,” napi.

⁹Jonathan my, “Huna naichi dawn reng moh! Ngaai my nang ai padei ai tau takeng kai nai pany baly, nang ai thui pi y nai awm ai a?,” napi.

¹⁰Huna nai khala y Davida my, “Ngampo my nang ai kado theu naimy ang pathang lawh baly, kai teng y ami my pany hai ai mo?,” nanai deng.

¹¹Jonathan my, “Daichi ka-vym mang y chei hawi sina,” napi i, nini ly daichi ka-vym mang y chei hawi bo.

¹²Naibaly Jonathan my Davida teng y, “Israela chengchi i ARENG Tameuh i mo y kai adeu mang. Kai ly Khawndam hawi khawnvai, hini neng y ngaai teng y leu deng ai. Ni ly nang ai paleung hawi hai lawh baly, nang teng y satang kangthai hai ai.

¹³Ni ly nang ai padei ai nai dawn lawh nai khala y, nang chymme naimy tleaungra nga ai nai, nang teng y satang kang thai hai y lawh baly, ARENG my kai ai dei pa-rei pajeng sy; ARENG ly ngaai ai awm hai nai kamta, nang ai py awm hai sy!

¹⁴Nang ly kai heng nai thym khala y, nangmy i vaineng adeu nai kamta, kai i tlang tleaung y ka-ym awm nai khyh chang y i, kai dei nai bo y py,

¹⁵nang i paleung ka-echi ai ARENG my tamyh pi vui nai khala py, kai i yhm dengtheungchi tlang tleaung y, ka-ym awm jojo ba.

¹⁶Ani leaung nyhrei i asa nai vaineng ly phra y naimy khaw jo sy; adeu nai vaineng taphra lawh baly, ARENG my nang ai pajeng sy,” napi.

¹⁷Jonathan ly Davida ai, amymy ai tamen nai kamta tamen nai deaungkho y, mymy ai py tamen teang ai nai adeu hai bo.

¹⁸Naibaly Jonathan my, “Khawndam ly lo si pawi neng kani ne; huni pawira y nang by y lawh baly, nang i meingtym akeu nai niu u ai.

¹⁹Khawnvai py hunai kamta, nang by y nai niu u ai; hunai deaungkho y nangmy i aheu reng nai meingtym y chei ly Ezela lengseaung nithun mang y aheu ba.

²⁰Huna nai khala y kai ly huni lengseaung ai patyp iy, thailiho chyn thomrei ko ai.

²¹Hunaibaly kaimy i miseaung teng y, thailiho chyn hau hai ai; kai ly ni teng y,’ thailiho chynchi ly himang y awm, chei ly lo’ napi baly, nang ly paleung awmnem naimy theu pajau bo, nanai sai ne; nang i vui jeira by y leang bo. ARENG ly heng nai ne i, nang py tlamsa naira nga bo.

²²Na i py kaimy, ‘thailiho chynchi ly humang y awm, chei ly lo,’ napi lawh baly, ARENG ly nang ai theu hai nai bo i, nang ly theu jo pa ba.

²³Ani leaung nyhrei i asa nai vaineng deungtasarei phra y naimy atyp jo pajau ai nai, ARENG my ang sa pi ai,” napi.

²⁴Hunai deaungkho y Davida ly daichi ka-vym y aheu jo bo. Losi pawi kani khala y Sawla ly cha nei pawira y tym i,

²⁵angpang sahawi mymy i ateh reng naira y ateh bo. Abana ly samrang i sahawi y, Jonathan ly samrang i mo y ateh. Davida i meingtym ly akeu nai ne.

²⁶Na i py huni kani y samrang ly ati sai py katheu y; saisairei molam y Davida ly reita tanynra y chai y nai deaungkho y, tym y nai teu ngaw khyh, nanai dawn bo.

²⁷Losi pawi kani bo i kani pa-nyh nai khala y py, Davida i atehra ly akeu nai niu i, Sawla my Jonathan teng y, “Ati mana nai y Davida ly jangdyh py tym y, vaini py tym y nai mo?,” nanai deng.

²⁸Jonathan my, “Davida ly kai teng y ang takeng i, Bethlehem mary y chei jo;

²⁹mymy ly ‘pahen parai naimy kai ai chei ai nai pei kyh,’ huni mary y kai i amjo amnauchi ly apathyp nai pawi sa nai deaungkho y, kai i amjo amnauchi my jeu ai nai tla, ang napi; nang ly kai ai ahawi palawn baly, kai ai amjo amnauchi hawi avum ai nai pei kyh, nanai ang takeng. Hunai deaungkho y ni ly nang i sahawi y by y nai ne,” nanai pathang.

³⁰Sawla ly Jonathan ai khri pa-rei kado theu i, “Nang ly pajangcho, nang ly Davida mang y asa nai khumi, nanai vai ly kai pany bo; nang ly nangmy ai py, ngamhm ai py, tahm anem hai vui lawh bo ly!

³¹Davida heng nai ryrei ly hini pri y nang, mana khala y py samrang lawm pajau ai ny y, nanai nang pany y nai sai a? Vaimy chei ly ni ai hi y jeu hai; ni ly dei takengkei ai nai tla!,” nanai leu pei bo.

³²Jonathan my, “Ati mana nai dei ai nai tla mo? ni ly ati sa lawh i bo?,” nanai thui baly

³³Sawla ly Jonathan ai chawn pa-rei tivi hawi takhu bo. Huna nai khala y Jonathan ly ampo my Davida ai padei takengkei ai nai paleung ka-dawn awm nanai pany bo.

³⁴Jonathan ly kado theu nai y sabawi i nai theu vui iy, huni lo si pawi pa-nyh kani y kani khengrei teicha teinei cho y naimy awm. Ni ly Davida ai Sawla my tahm panem vui nai molam y, khri pa-rei paleung hawi y nai ne.

³⁵Kani pa-nyh khawn mang y Jonathan ly my ni i adeu yb nai kamta, Davida hawi avum ai nai chei bo. Mymy hawi vanrei deaungdi leaungrei ai hawi i,

³⁶huni deaungdi teng y, “Vaimy kai i ko jo nai thailiho chyn hau,” napi. Deaungdi ly angpreng i, Jonathan my ni ai katlen pa-rei, thailiho chyn harei ko jo.

³⁷Huni deaungdi ly thailiho chyn tla nai meingtym y tym nai khala y, Jonathan my, “Thailiho chyn ly hu mang y awm!

³⁸tunira y angdo jo moh! angpreng kaliki ly akhui,” nanai aeu. Deaungdi ly thailiho chyn akhui iy yhmkeung teng y aliteang bo.

³⁹Ni ly huni leu i awm nai sai pany y; Jonathan hawi Davida nini pany khyh.

⁴⁰Jonathan ly my i thai hawi thailiho chynchi ai deaungdi teng y pei iy, mary mang y vawi hai teang bo.

⁴¹Deaungdi tako jo bo nabaly Davida ly lengseaung pakheng naira i dengdairei kheukhu di iy, Jonathan ai tlen thomrei lu meung bo. Hunaibaly nini leaung nyhrei ly vo hawi naimy atakawi iy, apachawm hawi. Davida i vo tangam nai ly Jonathan i vo tangam nai tleaung y nawi keh.

⁴²Naibaly Jonathan ly Davida teng y, “Tameuh ly nang hawi vanrei awm hai sy; ani leaung leaungrei py ne sy, ani i katu chanauchi py ne sy, ani tengtawi asa nai vaineng ai, phra y naimy deungtasarei khaw jo ai nai, ARENG my awm hai jojo sy,” napi. Naibaly Davida ly tako jo i, Jonathan py mary theung y vawi nai ne.