Read Khumi Chin 1 SAMUELA 22 Bible Online

1 SAMUELA 22 - Khumi Chin bible

1 SAMUELA 22

¹Davida ly kath mary i nai preang i, Adulam mary sahawi y awm nai tapiura y chei bo. Huni satang ai my i amjochi hawi takhra amjo amnauchi pany u nai khala y, jeu iy ni hawi vanrei awm u.

²Ana patang naira avum nai khumichi, kalai awm nai khumichi hawi paleung no-ei nai khumichi ly ni teng y chei u bo; nichi bawibawi ly leaung chungvai palyhrei tahm awm. Davida ly nichi i lu lawm bo.

³Davida ly hu i dengdairei Moba pri Mizapa mary y chei iy, Moba samrang teng y, “Kai i vui ARENG my ati mana pasym pi mo, nanai pany y nai sala y, kai i amhm ampo ni ai, nang teng y awm ai nai pei kyh ba,” nanai takeng.

⁴Hunaibaly Davida ly amhm ni ampo ai, Moba samrang teng y daw jo bo; amhm ampo ni ly Davida tapiu theung y aheu nai ryrei, Moba samrang teng y awm hawi jo nai ne.

⁵Naibaly amo Kad ly Davida teng y chei i, ni teng y, “Nang ly hi y awm jo moh; Juda pri mang y vaimy chei vui,” napi. Hunai deaungkho y Davida ly Hereth daichi ka-vym mang y theu jo bo.

⁶Kanirei nai khala y Sawla ly Kibeah mary y tym; samrang ly tivi syn naimy mawi aheung i angteaung keung anui y, miteaung kehchi ateh teungtareung naimy awm. Samrang ly Davida i awm nai meingtym pany bo, nanai thai nai khala,

⁷my i miteaung kehchi teng y, “Nangchi Benjamin cheng theaungchi awi, tangai u! Davida ly nangchi ai li hlauchi hawi kreip akhochi ang pei iy, tavaimichi ai peang nai miteaung kehra y ang khai ai, nanai athang khai u a?

⁸Huna nai athang khai nai deaungkho y, nangchi ly kai ai tiu ai nai kangviu y dawn paviu u nai sai a? Kai i chapo malawn py Davida hawi amkawm nai satang ai, nangchi leaungrei py kai teng y thui pi y. Kai i miseaung kahawi napi nai Davida ly kai ai padei ai nai neng, vaimy hau nai py, ni ai kai i chapo my atho pei nai py, ami py kai ai thui pi y!,” napi.

⁹Huna nai khala y Edom mary i khumi Doka ly Sawla i miteaung kehchi hawi angdo i samrang teng y, “Davida ly Ahitub i chapo Ahimelek awm nai Noba mary y chei nai kaniu.

¹⁰Ahimelek ly Davida i vui ARENG teng y ati sa ai avo mo, nanai deng pi; naibaly Davida ai teicha teinei py, Philistia khumi Koliatha i haisau py pei pi nai ne,” napi.

¹¹Hunaibaly samrang Sawla ly pathyp pi nai keung Ahimelek hawi ni i amjo amnau bawibawichi, Noba mary y awm nai pathyp pi nai keungchi ai py palau i, nichi ly mymy teng y tym u bo.

¹²Sawla my Ahimelek teng y, “Aw Ahimelek awi, tangai ba!,” napi i, Ahimelek my, “Samrang awi, nang i leu tangai mang,” nanai pathang.

¹³Sawla my ni teng y, “Nang hawi Davida ly ati mana nai kai ai tiu ai nai dawn paviu hawi lawh mo? Nang ly ati mana nai ni ai, teicha teinei hawi haisau pei pi lawh mo? Ati mana nai ni i vui Tameuh teng y hnei pi lawh mo? Vai, ni ly kai ai ang tiu lawh bo; kai ai padei ai nai neng ka-vo hau lawh bo ly!,” napi.

¹⁴Ahimelek my, “Davida ly nang i tlang tleaung y ka-ym awm keh nai bangtang leaungrei ne! Ni ly nang i meaungcha khyh chang y i, nangmy ai typ nai tavailu py ne. Samrang yhm theung i khumi bawibawichi my, tahm khai keh nai keung py ne.

¹⁵Ni i vui ARENG teng y kahnei pi nai ly teng khyp; na i py vaichi khala y hina nai hnei takeng pi reng; nang ai padei ai nai kangviu y dawn nai molam y samrang ly kai ai py, kai i yhm dengtheung leaung leaungrei ai py neng hai moh; hini kalop ai kai pipi pany y,” nanai pathang.

¹⁶Samrang my, “Ahimelek awi, nang hawi nang i amjo amnau bawibawichi ly dei u ai nai tla,” napi.

¹⁷Naibaly mymy sahawi y angdo nai tamcheaung risachi teng y, “ARENG i pathyp pi nai keungchi ly Davida hawi ka-dawn vanrei ne nai deaungkho y, Davida preang nai pany i py kai ai thui pi y i, padei u,” nanai leu pei. Na i py tamcheaung risa leaungrei py, ARENG i pathyp pi nai keungchi ai, padei ai nai kiu pheu u vam y.

¹⁸Hunai deaungkho y Sawla ly Doka teng y, “Nang ly nichi ai tleh!,” napi baly Doka ly pathyp pi nai keung bawibawichi ai padei bo. Huni kani y Doka ly ephod amchiu nai ARENG i pathyp pi nai keung leaung 85 reichi ai padei nai ne.

¹⁹Sawla ly pathyp pi nai keungchi i mary napi nai, Noba mary y awm nai khumi neampacho, neampachy, thawndeang anglo, deaungdi chympleichi hawi khumi bawibawichi ai py, si, keaungngo kano kasau hawi beramchi ai py, padei hai chauchau bo.

²⁰Na i py Ahimelek i chapo Abiatha ly tleaung vui i, Davida teng y tym.

²¹Ni ly Sawla my ARENG i pathyp pi nai keungchi ai padei pawn nai saichi ly Davida teng y amti pi bo.

²²Davida my ni teng y, “Doka ly Sawla teng y hina nai amti pi ai nanai, ni ai huni meingtym y niu nai kani dengdairei kai pany. Hunai deaungkho y nang i amjo amnau bawibawichi dei nai ly kai i molam y ne. Nang ly kai hawi vanrei awm, jei moh.

²³Nang ai padei ai hau nai khumi ly kai ai padei ai hau nai py ne teang; na i py nang ly kai hawi vanrei awm baly, chymme naimy awm ai mang,” napi.