Read Khumi Chin 1 SAMUELA 24 Bible Online

1 SAMUELA 24 - Khumi Chin bible

1 SAMUELA 24

¹Sawla ly Philistia chengchi ai tiu naira i vawi teang nai khala y, ni ly Engkedi sahawi i daichi ka-vym y Davida awm, nanai thai.

²Sawla ly Israela chengchi theung i tavaimi vawi patyp nai leaung 3,000 rei hawi, sithachi awm nai lengseaung parachi mang y, Davida hawi ni i khumichi ai hau ai nai chei.

³Samrang ly lam sala i beram haichi sahawi y awm nai tapiu harei niu baly, amdaw ai nai kun bo. Huni tapiu i theung mang y ly Davida hawi ni i khumichi aheu nai ne.

⁴Davida i khumichi my, “ARENG ly paleung ka-e ai nang i kiu y au ai nanai py, ni ai nangmy ngai nai kamta sa pajau ai nanai py, leu pei nai kamta vai, nang i vui neng tym bo,” napi u. Davida ly Sawla awm naira mang y chei i, Sawla i baichu kangjiu ai kangviu y o-pi byp veng.

⁵Na i py huna nai sa lawh nai molam y, Davida ly paleung hawi y.

⁶Hunai deaungkho y mymy i khumichi teng y, “ARENG my khai takhra nai samrang, kai i yhmkeung ai dei ai nai pa-rei so y ai nai, ARENG my kai ai paka sy! Samrang ly ARENG my khai takhra nai samrang ne nai deaungkho y, kai ly ni i tlang tleaung y ka-jeira maidenreichy py, tym hai ai nai avo y!,” napi.

⁷Hunai deaungkho y Davida ly mymy i khumichi teng y, Sawla ai tiu ai nai avo y, nanai hawihai palai pany hai bo. Naibaly Sawla ly ang thau iy, tapiu i nai theu teang bo.

⁸Huna nai khala y Davida ly ni i nithun mang hui iy, “Samrang awi!” nanai palau. Sawla ly amhi iy khen nai khala y, Davida ly tahm khai parai naimy khaileaung y lu meung iy

⁹hina nai thui. “Kai ly nang i tlang tleaung y ka-jeira tym hai ai nai atho sa, nanai khumichi my thui nai leu ai, nang ly ati mana nai ym lawh mo?

¹⁰ARENG ly vaimy nang ai, kai i kiu y au bo, nanai nangmy niu pajau nai ne. Kai i khumi phyreichi my, nang ai padei vui ai nai ang napi. Na i py kai ly nang i vui paleung hawi y nai deaungkho y, nang ai ka-jeira maidenreichy py tym hai ai nai ngai y. Ati mana nai mo nabaly nang ly ARENG my khai takhra nai samrang ne nai deaungkho y ne.

¹¹Kai i ngaai awi, khen cham rai, kai i kiu y syn nai baichu kangjiu tawmchy ai khen cham! Kai ly nang ai padei ai nai nga teu i py, hini baichu tawnchy ai naini kao khyh; nang ai tiu ai nai hawi padei ai nai kai ly paleung ka-dawn by y, nanai hinira y samrang nang ly pany ai nai avo. Kai ly nang ai sairei py tamang vai y teu i py, nang ly kai ai padei ai nai hau nai ne.

¹²Ani leaung nyhrei theung y ami tamang mo, nanai ARENG my chih pi na sy; nang ly kai i tlang tleaung y sa nai saichi molam y, mymy ly nang ai kamngo pajeng na sy; kai ly nang ai maidenreichy py, ka-jeira pei ai ny y.

¹³‘Hawi y nai ly hawi y nai khumi naini sa khyh’ nanai jangni i thui achi nai leu nang pany. Hunai deaungkho y kai ly nang i tlang tleaung y ka-jei pei ai ny y.

¹⁴Khen cham, Israela samrang ly ami ai padei ai nai atho sa nai mo! khen cham, ni ly patiu ai nai tau lawh ly! ui kadei, uikasyhchi ai a!

¹⁵Ani leaung nyhrei theung y ami tamang mo, nanai ARENG my tara chih pi ai. Mymy ly hini molam y chih pi sy; kai mang y asa nai ne i, kai ai nang kiu i nai atleu pi sy,” napi.

¹⁶Huna nai Davida my thui pi pajau nai bo y Sawla my, “Nang ly meitang khyp, kai i chapo Davida teu bo,” nanai thui i vo bo.

¹⁷Naibaly ni ly Davida teng y, “Nang ly teng iy kai ly tamang bo; kai ly nang ai hawi y parai nai sa i py, nang ly kai ai pahen lawh ly!

¹⁸Vaini kai ai nang i sa nai pahen naira ly khri pa-rei len parai na; ARENG my kai ai nang i kiu y au teu i py, nang ly kai ai padei y.

¹⁹Khumi ly mymy i paleung ka-e ai patiu chum baly, mana khala y patleaung vai mo? Vaini kai i tlang tleaung y nang i sa nai sai molam ARENG my nang ai amtheaung hai sy.

²⁰Nang ly Israela samrang lawm ai nai py, Israela pri ly nang i kiu y awm jo ai nanai py, vai ly kai, hawihai palai pany bo.

²¹Na i py kai i amyn hawi, kai i yhm dengtheung amyn py, pipi tamo y ai nai nang ly kai i katu chanauchi ai tlamsa naira pei ai, nanai ARENG i amyn y kai teng y adeu ba,” napi baly,

²²Davida ly adeu nai ne. Naibaly Sawla ly my i yhm mang y vawi ali teang i, Davida hawi my i khumichi ly mychi i aheu nai meingtym mang y vawi teang bo.