Read Khumi Chin 1 SAMUELA 25 Bible Online

1 SAMUELA 25 - Khumi Chin bible

1 SAMUELA 25

¹Samuela dei vui nai deaungkho y Israela cheng bawibawichi ly jeu achu iy vo tangam u bo. Naibaly nichi ly ni ai Ramah mary, mymy i yhm y up u nai ne. Huna nai up chum nai bo y Davida ly Paran daichi ka-vym mang y theu jo bo.

²Kaleb nupai theung i Mona mary y awm nai Nabala napi nai khumi leaungrei awm; ni ly Karamela mary sahawi y awm nai khumi kanang ne. Ni ly beram 3,000 rei hawi mi-i 1,000 rei awm nai deaungkho y, khri pa-rei nang nai khumi ne. Ni i aju Abikaila ly mo-cha hawi i, tau cheng nai neampachy ne. Nabala ly paleung akhum iy, amangrang nai khumi ne. Nabala ly Karamela mary y, beram mui vau naimy awm.

⁴Huni satang ly daichi ka-vym theung y awm jo nai Davida thai nai deaungkho y,

⁵Karamela mary y thawndeang deaungdi leaung horei pato i, “Nangchi ly Nabala ai hau ly kai i jeng y ka-vum so;

⁶Nabala teng y hina nai thui pi; “Ahawi ngai parai nai awi, Davida my nang ai kawn nai leu ang thui pi; nang hawi vanrei nang i yhm dengtheungchi py, nang hawi kamtawm ka-bi bawibawichi py, noso hawi ai nai chiu kang sa pi mang.

⁷Nang ly beramchi ai mui vau naimy awm, nanai satang thai nai deaungkho y, Davida my nang i beram typ nai keungchi ly kaichi i awm nai meingtym y beramchi ai sui patlai u teu i py, kaichi ly nichi ai ati sai py so hai y nanai py, nichi ly Karamela mary y awm u nai thym khala y, ati sai py tama nai avum u y nanai py, kang pany hai nai ne.

⁸Hini satang ai beram typ nai keungchi teng y deng baly, nang pany pajau ai; kaichi ly pawi kani hini meingtym y kang tym u ai. Davida my kaichi ai lamchung ai nai takeng nai ne. Nang i miseaung kaichi ai py, nang i ahawi Davida ai py, nangmy pei pajau nai ryrei pahen parai naimy pei ba.”

⁹Huna nai leu pei nai kamta, Davida i khumichi ly Nabala teng y thui pi chum baly, nichi ly ajeng u bo.

¹⁰Naibaly Nabala my, “Davida nanai khumi ly ami mo? Kai ly ni i satang tlenrei py thai vai y be! Vai deung i pri ly miseaung kapreangchi hawi kawi na!

¹¹Beram mui takip nai khumichi i vui khai pi yb nai kai i tako, kai i tui, kai i mawi anchi la iy, yhm hlau amny y nai khumichi teng y pei pajau y! nanai pathang.

¹²Davida i khumichi ly vawi ali teang iy, Nabala i thui nai leu Davida teng y amti pi.

¹³Huna nai khala y Davida ly nichi teng y, “Haisauchi akeng y akawm u!” nanai leu pei nai kamta, nichi ly akawm u bo. Davida py my i haisau akeng y akawm teng i, khumi leaung chungvai palyhreichi hawi theu u. Khumi leaung chungvai nyhreichi ai ly cha nei vawn typ hai jo nai ne.

¹⁴Nabala i miseaung leaungrei my Nabala i aju Abikaila teng y, “Hini satang ly nang thai bo a? Davida ly daichi ka-vym i dengdairei, achi i areng teng y savaichi pato iy ka-vum sa. Na i py areng my nichi ai mei aniu y nai leu pathang.

¹⁵Nichi my ly achi ai khri pa-rei hawi hai nai ne; mana khala py achi ai rai naira pei u vai y; kaichi ly nichi hawi vanrei daichi theung y awm nai thym khala py, saisairei tama nanai by y.

¹⁶Kaichi ly beram kanghuchi typ nai thym khala, nichi my kaichi ai kry nai ne.

¹⁷Hini molam adawn pasym iy, mana sa ai avo mo, nanai leu pacheang ba. Hini kalop ly achi i areng hawi yhm dengtheung verei i vui rai naira pei pajau nai ne. Achi i areng ly paleung ka-dawn akhum nai khumi ne i, ami i leu py tangai ai ny y!” napi.

¹⁸Abikaila ly tako phi chungvai nyhrei, kreip hang kawi tyhp nai mawipeih adym nyhrei, beram bom verei dang nai amai pangrei, changleung angheang teaung pangrei, kreip athai kajei phrawn chungvairei hawi thaidu athai kajei hawi sa nai tako chungvai nyhrei angvei kaliki iy, keaungngo kano kasauchi tleaung y tang bo.

¹⁹Naibaly ni i miseaungchi teng y, “Nangchi mo mang tako u man, kai ly nithun mang kanghui ai,” napi. Na i py ni ly juvo Nabala ai ly thui pi y.

²⁰Ni ly keaungngo kano kasau tleaung y atang iy, mawi kheutang lam ka-kawira tym nai khala y, mymy mang y jeu nai Davida i khumichi hawi avum tlui bo.

²¹Hina nai avum tlui y rai khala y, Davida my hina nai thui; “Ati mana nai daichi ka-vym theung y huni khumi i vawnsaichi ai kakry pi law mo? Huna nai ni ai sabawm pi nai deaungkho y, kahawi sa nai ai ly kahawi palawn pi y lawh ly!

²²Khawn khutawi y rai khala y, nichi ai leaungrei py takhawi y pa-rei kapadei y baly, Tameuh my kai ai padei sy!” nanai thui yb bo.

²³Abikaila ly Davida ai niu nai khala y, keaungngo kano kasau tleaung i nai satla kaliki i, Davida i kheukeung y

²⁴khaileaung y aseaung naimy hina nai thui; “Areng awi, pahen parai naimy kai i leu tangai pi kyh ba! lawn veng nai leaungsaichi ly kai i kamngo palawn teu ba.

²⁵Vang teng y nai khumi, Nabala i leu ai ly dawndan pi moh ba. Ni ly my i amyn hawi kamlau khumi ka-khum[4]ne! Aw areng, nang i miseaungchi jeu nai neng khala y, kai ly yhm y by y.

²⁶Paleung ka-echi ai nangmy padei iy vawitheung tha y ai nai paka nai keung ly ARENG ne. Nang i paleung ka-echi py, nang ai ka-jeira pei ai ngai nai khumi bawibawichi py, Nabala kamta kamngo pajengra avum u sy, nanai Tameuh kangheng i amyn y kai, vaineng abeu bo.

²⁷Aw areng, nang teng y kai i kang syn pi nai langseaungchi ai pahen parai naimy talam pi iy, nang i khumichi teng y pei pi ba.

²⁸Kai i sa tamang nai molam y kamngo pahen pi kyh ba. Nang ly ARENG i vui tavai atiu pi nai deaungkho y, ARENG ly nang hawi nang i katu chanauchi ai samrang y palyn pi ai. Nang py nangmy deungrei, patangra avum ai ny y.

²⁹Khumi leaung leaungrei ly nang ai tiu iy padei ai nai atho sa lawh teu baly, khumi ly vang kateng vawnsai ai kryme reng nai kamta, ARENG ly nang ai chymme naimy ang kry ai. Nang i paleung ka-echi ai ly khumi my lengseaung akawi ai lijai hawi ko nai kamta, palo parai naira mang y nangmy aphi vui ai.

³⁰ARENG ly mymy i adeu nai ngierei, hawi nairachi nang teng y ang pei takengkei iy, Israela samrang y ang khai takhra nai khala y,

³¹nang ly nangmy i vawitheung tha nai hawi, padei atyhtyh naichi molam y paleung si ai ny y; uikheih ai nai py awm ai ny y. Nang i sa nai kalop ngiereichi ai ARENG my amtheaung naira pei nai khala y, kai ai pany jo ba,” napi.

³²Davida my ni teng y, “Vaini kai hawi avum ai nai nang ai pato nai keung Israela chengchi i ARENG Tameuh ly palo naira awm sy!

³³Khumi ai padei nai hawi vawitheung tha naichi so y ai nai, nang ly vaini ka-dawn len parai nai hawimy kai ai paka nai molam y, kai ly ARENG ai kapalo nai ne.

³⁴ARENG ly nang ai ka-jeira tym hai y ai nai py, kai ai ang paka bo. Na i py nang ly kai teng y tym kasa y lawh ai nabaly, khawndam khutawi y naimy Nabala i khumi bawibawichi ai kapadei pawn ai, nanai Tameuh kangheng i amyn y kai vaineng abeu bo!,” napi.

³⁵Naibaly Davida ly Abikaila my syn pi nai langseaungchi talam i ni teng y, “Nang i sa hai ai ngai nai kamta kasa ai; paleung mawn y naimy yhm mang y vawi ba,” napi.

³⁶Abikaila py Nabala teng y vawi bo. Nabala ly my i yhm y samrang i pawi kamta, khri pa-rei cha nei pawi pui sa nai ne. Ni ly hm-rah pavui naimy amo theu nai deaungkho y, Abikaila ly ni teng y khawn khutawi ryrei, ati sai py amti pi y leang.

³⁷Naibaly kangvui cheng nai khala y, aju my ni teng y ati cheaungkhangchi amti pi. Huna nai khala y ni ly kiu kheu angto thai y i, tlang verei angto thai y bo.

³⁸Kani horei nai bo baly ARENG my Nabala ai pajeng i, ni ly dei bo.

³⁹Davida ly Nabala dei nai satang thai nai khala y, “ARENG ly palo naira awm sy! Mymy ly Nabala my kai ai mei aniu y nai sa nai molam y vawitheung tha pi i, mymy i miseaung kai ai py, tamang y ai nai ang paka bo. ARENG ly Nabala i kamngo nai molam y ni ai pajeng nai ne,” nanai thui. Huni bo baly Davida ly Abikaila ai pom ai nai, khumi pato iy atli hai bo.

⁴⁰Ni i miseaungchi ly Karamela mary y chei iy, Abikaila teng y, “Davida ly nang hawi apom ai ngai nai deaungkho y, nang ai hawi ai nai kaichi ai pato nai ne,” napi u.

⁴¹Abikaila ly khaileaung y tym pa-rei lu meung iy, “Kai ly ni i miseaung ne nai deaungkho y, ni i miseaungchi i kheu pasi ai nai angveirym nai ne,” napi i,

⁴²ang thau kaliki iy keaungngo kano kasau tleaung y atang. Naibaly neampachy miseaung leaung pangrei ai hawi iy, Davida i savaichi hawi abang i, Davida i aju lawm bo.

⁴³Davida ly Jezarela mary i neampachy Ahinoam hawi apom chum nai ne i py, vai Abikaila ai py aju palawn bi bo.

⁴⁴Hina nai thym khala y Sawla ly Davida i aju kangngym, mymy i chaniu Mikhala ai Kalim mary y awm nai Laisa i chapo Paleti teng y deaung paseng chum veng nai ne.