Read Khumi Chin 1 SAMUELA 27 Bible Online

1 SAMUELA 27 - Khumi Chin bible

1 SAMUELA 27

¹Sawla my kanirei nai khala ly kai ai ang padei takengkei ai; Philistia pri mang y preang vui nai ly kai i vui hawi keh nai ne. Huna nai khala y ni ly kai ai Israela pri y hau y ai bo i, kai ly chymme naimy kaawm ai nai nga ai,” nanai Davida ly adawn bo.

²Hunai deaungkho y Davida ly mymy i risa leaung chungvai tariureichi hawi vanrei, Maoch i chapo kath samrang Akhisa teng y, vaimy theu u nai ne.

³Davida hawi my i khumichi ly mymychi i yhm dengtheungchi hawi vanrei, kath mary y khuteng pala u bo. Davida hawi vanrei mymy i aju leaung nyhrei, Jezarela mary i Ahinoam hawi Karamela mary Nabala i aju lumai Abikaila nini py abawi nai ne.

⁴Sawla ly kath mary mang y Davida preang vui bo, nanai satang thai nai khala y, Davida ai hau ai nai atho so y leang bo.

⁵Davida ly Akhisa teng y, “Nang ly kai i tlang tleaung y ahawi ka-dawi kamta ka-dawn khai baly, kai ai marychy hareira y awm ai nai pei ba; hini mary puira y kai ly nang hawi vanrei awm ai nai ngai y,” napi.

⁶Hunai deaungkho y Akhisa ly Davida teng y Zikala mary pei pi nai ne. Hini molam y Zikala mary ly vaini khrairei, Juda samrangchi i khu ka-peang lawm bo.

⁷Philistia pri y Davida awm nai ly lo holai tariurei ne.

⁸Hunanai neng thym khala y Davida hawi mymy i khumichi ly keshura cheng, Kirazi cheng hawi Amalek chengchi i khu ka-peangchi ai, Aikupta pri sahawi i Sura mary y khrairei, tiu u reng nai ne.

⁹Davida ly huni khumichi ai neampacho, neampachy takhawi y naimy padei chauchau i, beram, si, keaungngo kano kasau, kula-iuchi hawi baichu ateaung alangchi la pi pawn iy, Akhisa teng y vawi u ali teang reng nai ne.

¹⁰Akhisa my py Davida teng y, “Hini tlenrei ly mani meingtym mang y chei iy tiu nai mo?,” nanai deng reng nai ne. Huna nai khala y Davida my Juda pri tokalawi ngan Jeramela nupaichi i khu ka-peang, kenit chengchi i khu ka-peang napi naichira y chei iy tiu nai ne, napi reng.

¹¹Davida ly mymy i sa nai ngiereichi ai, ami py kath mary mang y satang thai hai pajau y ai nai, neampacho, neampachy bawibawichi ai padei pawn nai ne. Ni ly Philistia pri y awm nai ryrei ly hina nai kamta sa.

¹²Na i py Akhisa ly Davida i leu ym nai deaungkho y, “Hini khumi ly my i Israela chengchi my niu ngai y nai molam y, mymy deungrei kai i amtaw thau pi ai,” nanai ka-dawn awm bo.