Read Khumi Chin 1 SAMUELA 28 Bible Online

1 SAMUELA 28 - Khumi Chin bible

1 SAMUELA 28

¹Neng kra kyh nai khala y Philistia chengchi ly Israela pri y tiu ai nai tavaimichi kachu u bo. Huna nai khala y Akhisa ly Davida teng y, “Nang hawi nang i khumichi ly kai mang y asa iy, tiu ai nai tla,” napi.

²Naibaly Davida my, “Ne mang, kai ly nang i miseaung ne; kai ly mana tanrei ham mo, nanai nang niu ai mang,” napi. Akhisa my, “Hawi mang! Nang ai kai i tamcheaungra y kang khai jojo ai,” napi.

³Samuela dei i, Israela cheng vereichi ly vo tangam naimy, ni i saleaung khuteng Ramah mary y up bo. Huni neng khala y Sawla ly leung sara hawi vawinam pakun kawp nai bawibawichi ai, Israela pri i dengdairei patheu pawn nai ne.

⁴Philistia cheng tavaimichi ly Shunem mary sahawi y akachu iy, tai u bo. Sawla py Israela chengchi ai kachu iy Kilabo mawi saleung y tai u.

⁵Sawla ly Philistia tavaimichi ai niu nai khala y jei hyn na i,

⁶mymy ly mana sa ai mo, nanai ARENG teng y deng bo. Na i py ARENG ly amang mang py, Urim hawi Thummim hawi py, amochi hawi py, pipi pathang pi y.

⁷Huna nai khala y Sawla ly mymy i tavai luchi teng y, “Vawinam pakun kawp nai leaungrei ai hau u; ni teng y chei iy kaimy deng ai,” napi. Nichi my, “Endora mary y vawinam kun nai neampachy leaungrei awm,” napi.

⁸Hunai deaungkho y Sawla ly mo-cha ataphra vui iy, ateaungchi py amchiu takhra i, vum aneng y mymy i khumi leaung nyhrei hawi vanrei, vawinam kun nai neampachy teng y chei hawi. Ni ly huni neampachy teng y, “Kai i khym taham molam y vawinamchi teng, kai i jeng y deng pi cham; kai i amyn thui nai khumi i phailo palau pi kyh,” napi.

⁹Huni neampachy my, “Samrang Sawla ly leung sara hawi vawinam pakun kawp naichi ai, Israela pri i dengdairei ati mana nai y patheu pawn mo, nanai nang pany tatang naimy, kai deira avum ai nai ati mana nai y kai ai deaung pateung iy patiu lawh mo?,” napi.

¹⁰Huna nai khala y Sawla my, “Hina nai sa nai molam y nang teng y pajeng naira tym hai y ai nai, heng nai ARENG i amyn y kai, vaineng abeu mang,” napi.

¹¹Vawinam kun nai neampachy my, “Nang i vui ami ai palau pi ai mo?,” napi. Sawla my, “Samuela ai palau pi,” napi.

¹²Vawinam kun nai neampachy ly Samuela ai niu nai khala y, tao pajeng parai naimy aeu i Sawla teng y, “Ati mana nai kai ai tapawp lawh mo? Nang ly Samrang Sawla ne na a!,” napi.

¹³Samrang my, “Jei moh! nang i niu nai kai ai thui pi,” napi. Neampachy my, “Khaileaung theung mang theu nai phailo harei kaniu,” napi.

¹⁴Sawla my, “Huni ly mana mo-cha awm mo?,” nanai deng. Neampachy my, “Huni khumi ly miteaung pui leaungrei ne iy, baichu kangjiu adam nai ne,” nanai pathang. Naibaly Sawla ly Samuela ne, nanai pany i, tahm khai nai khaileaung y meung bo.

¹⁵Samuela ly Sawla teng y, “Nang ly ati mana nai kai ai khrukhra hai lawh mo? Ati mana nai kai ai palau teang lawh mo?,” nanai deng. Sawla my, “Kai ly khri pa-rei patang naira avum nai ne. Philistia chengchi ly kai hawi tavai atiu bo. ARENG my py kai ai khai su bo. Mymy ly amochi hawi py, amang mang py, kai ai pathang pi y. Hunai deaungkho y kai ly nang ai palau nai ne. Kai ly ati mana sa ai mo, nanai leu pei ba,” napi.

¹⁶Samuela my Sawla teng y, “ARENG ly nang ai ang khai su iy, nang i paleung ka-e lawm vui nai khala y, nang ly ati mana nai kai ai palau mo?

¹⁷ARENG ly kai ai leu pei nai kamta vai, nang i tlang tleaung y ang sa nai bo. Mymy ly nang i pri nang teng i nai la pi vui iy, Davida teng y pei veng bo.

¹⁸Nang ly ARENG i leu pei nai akhi vui iy, Amalek chengchi hawi nichi i vawnsai bawibawichi taphra pyn y nai deaungkho y vai, ARENG ly nang ai hina nai ang pajeng nai ne.

¹⁹Mymy ly nang hawi vanrei Israela pri ai, Philistia chengchi i kiu y au vui ai. Khawndam nang hawi nang i chapochi ly kai i awm naira y tym u ai. Naibaly ARENG ly Israela tavaimichi ai py, Philistia chengchi i kiu y au ai,” napi.

²⁰Samuela i thui pi nai leu molam y Sawla ly angtheng na i, vaimy khaileaung y atlym i amkhiumeuh bo. Ni ly kani kheng, vum torei, ati sai py cho y nai deaungkho y, atho bai bo.

²¹Vawinam kun nai neampachy ly ni teng y chei iy khen i, angtheng naimy awm nai niu nai deaungkho y, “Aw areng, kai ly kaimy i tlang areu iy, nang i amtaw thau pi nai ne.

²²Vai, kaimy kang thui pi nai kamta nang ly so ba. Nang ai kaimy teicha teinei maidenreichy kang sawn pi ai. Nang ly khuleaung keung y atho awm ai nai cho ba,” napi.

²³Sawla my, kai ly ati sai py cha ai nai ngai y leang, nanai akhi bo. Na i py my i khumichi my teicha cha ai nai thui kaleuteu nai deaungkho y, kangkhym y ly khaileaung i nai ang thau iy, ira tleaung y ateh.

²⁴Vawinam kun nai neampachy py, mymy i pacho patyp nai sicho tleh hai kaliki iy, tako dei maidenrei la i, angbo abawi y nai tako paawp.

²⁵Naibaly huni teicha teinei ai Sawla hawi ni i khumichi ai pacho bo. Nichi ly cha nei chum baly, huni vum my theu u nai ne.