Read Khumi Chin 1 SAMUELA 29 Bible Online

1 SAMUELA 29 - Khumi Chin bible

1 SAMUELA 29

¹Philistia chengchi ly mychi i tavaimi bawibawichi ai Aphek mary y angym hai bo. Israela chengchi ly Jezarela leaunghawira i, micheaung sahawi y tai u.

²Philistia samrang leaung pangreichi ly mychi i tavaimi leaung chungvairei kamkawm, leaung sangrei kamkawmchi hawi tavai amsa u bo. Davida hawi my i khumichi ly nithun mang Akhisa samrang hawi vanrei abang u.

³Philistia tavai luchi ly nichi ai niu baly, “Hini Hebrai chengchi ly ati mana nai, kaichi hawi vanrei abang u lawh mo?,” nanai deng. Akhisa my, “Ni ly Israela samrang Sawla i bangtang Davida ne. Kai teng y awm nai ly kra bo. Kai mang y kun nai kani dengdairei, ni i tlang tleaung y tamang nai sai harei py kaniu y,” napi.

⁴Na i py Philistia tavai luchi ly Akhisa ai kado theu i, “Huni khumi ai nangmy pei nai mary mang y pato teang; achi hawi vanrei tavai atiu naira y abang moh sy. Tavai atiu nai thym khala y, ni ly achi ai tiu tan tiu lym ai. Ni ly my i yhmkeung teng y vawi iy, meimai nga ai nai sa pajau nai lam ly achi i khumichi ai padei nai ny y baly takhra lam awm rai na a?

⁵Neampachychi ly lam naimy ‘Sawla my padei nai leaung sangsangrei, Davida my padei nai leaung meaungmeaungrei,’ nanai khulym thui u nai ly hini Davida i satang ny y lawh a?,” napi.

⁶Akhisa ly Davida ai palau i ni teng y, “Nang ly kai i tlang tleaung y ka-ym awm, nanai Israela chengchi my chiu nai Tameuh kangheng i amyn y kai, vaineng abeu bo. Kai ly nang ai kai hawi vanrei, tavai keung y abawi hai ai nai ngai. Kai teng y nang tym nai kani dengdairei, nang i tlang tleaung y hawi y naira harei py kaniu y. Na i py takhra samrangchi my, nang ai ngai y nai ne.

⁷Hunai deaungkho y nang ly paleung awmnem naimy yhm mang y vawi iy, nichi ngai y nai kalop sai sairei py so moh ba,” napi.

⁸Davida my, “Kai ly ati hawi y nai kasa lawh mo? Nangmy leu pei nai kamta, nang i kalop sa amteaung nai kani dengdairei, kai i tlang tleaung y tamang naira ha harei py niu y lawh baly, kai i yhmkeung hawi samrang ne nai nang i vui kai abang iy, ati mana nai paleung ka-echi ai tiu ai nai ngo y nai mo?,” napi.

⁹Akhisa my, “Nang i leu ly teng parai; kai ly nang ai Tameuh i kani pri amtaw thau kamta, ka-ym awm nai khumi kang palawn nai ne. Na i py takhra samrangchi my nang ai kai hawi vanrei, tavai thau ai nai pei y.

¹⁰Hunai deaungkho y nang hawi vanrei, Sawla teng i nai kai teng y ang pyn u nai khumi bawibawichi ly khawndam angthodyh ang thau iy khutawi phai tawi baly, theu u jau ba,” napi.

¹¹Hunai deaungkho y Davida hawi my i khumichi ly khawn pa-nyh angthodyh ang thau iy, Philistia pri mang y vawi u bo. Philistia chengchi py Jezarela mary mang y amsa u nai ne.