Read Khumi Chin 1 SAMUELA 31 Bible Online

1 SAMUELA 31 - Khumi Chin bible

1 SAMUELA 31

¹Kilabo mawi salo y Philistia chengchi hawi Israela chengchi atiu u i, Israela chengchi neangneang dei u bo. Huni bo i Sawla, chapochi hawi, phyreichi ly preang u pawn nai ne.

²Na i py Philistia chengchi ly Sawla i chapo leaung thomrei, Jonathan, Abinada hawi Malakhishua ai hui nai kai i padei nai ne.

³Sawla i tengpang sahawi y tavai atiu nai khri pa-rei ho i, samrang ai malawn py thailiho chyn chawm nai y, tamo kalem nga bo.

⁴Samrang ly tavai ateaung syn pi nai thawndeang teng y, “Hini Tameuh by y nai Philistia chengchi ly paleung amo theu naimy, kai ai ana iy padei pajau y ai nai, nang ly nangmy i haisau la iy, kai ai padei vui ba,” napi. Na i py huni thawndeang ly jei ala nai deaungkho y padei vam y i, Sawla ly my i haisau la iy pado; naibaly huni haisau tleaung y taba i dei bo.

⁵Huni thawndeang ly Sawla dei nai niu baly, ni py haisau pado iy taba i, Sawla hawi vanrei dei bo.

⁶Hini ly Sawla py, Sawla i chapo leaung thomrei hawi thawndeang i dei nai leaungsai ne. Huni kani y Sawla i khumi bawibawichi ly dei be bo.

⁷Jezarela leaunghawi vai, Jordan tavo nisi mang y awm nai Israela chengchi ly Israela tavaimichi preang pawn bo, nanai thau u nai khala y, mymychi i marychi khai su iy preang u bo. Huna nai khala y Philistia chengchi ly jeu u iy, huni marychira y awm u nai ne.

⁸Tavai atiu chum nai kani pa-nyh khala y, Philistia chengchi ly khumi kadeichi teng i, vawnsai ateaung alangchi leng ai nai tym u. Huna nai khala y Kilabo mawi saleung y Sawla hawi chapo leaung thomreichi dei nai veu niu u bo.

⁹Nichi ly Sawla i lu tameang iy ni teng i leng vui nai tavai ateaungchi hawi vanrei, Philistia pri y awm nai mychi i tameuh mynchi hawi, mychi i chengchi teng y satang kahawi thui pi ai nai, khumi pato iy syn hai nai ne.

¹⁰Naibaly nichi ly huni tavai ateaungchi Asatare i achura yhm y khai iy, Sawla i veu ai ly Beth Shan mary apaira y banghau bo.

¹¹Sawla ai Philistia chengchi my ati mana sa mo, nanai Kilead pri Jabe mary i khumichi thai u nai khala y,

¹²khumi sorai phyreichi ly Beth Shan mary mang y vum torei amsa u. Nichi ly Sawla hawi chapochi i veuchi ai apai tleaung i nai la u i, Jabe mary y syn iy mai patawi u bo.

¹³Naibaly hiuchi akhui iy, mary theung i meaungkasi keung anui y up u chum baly, kani saryhrei biu hai u nai ne.