Read Khumi Chin 1 SAMUELA 4 Bible Online

1 SAMUELA 4 - Khumi Chin bible

1 SAMUELA 4

¹Huni neng khala y Israela chengchi ly Philistia chengchi ai tiu ai nai amsa u bo; Israela chengchi ly Ebenezar mary y, Philistia chengchi ly Aphek mary y tai u nai ne.

²Philistia chengchi my tiu i, Israela chengchi sum iy, khumi leaung sang palyhrei tavai keung y dei u bo.

³Dei y nai tavaimichi ly tai nai meingtym y tym u teang nai khala, Israela lu sa nai keungchi my, “ARENG ly ati mana nai deaungkho y, vaini achi ai Philistia chengchi teng y sum hai lawh mo? Achi ly Siloh mary y awm nai ARENG i Leu Maikawm Pawm lo u sina; naibaly mymy ly achi hawi vanrei chei ai i, paleung ka-echi teng i nai achi ai atleu ai,” nanai thui u bo.

⁴Naibaly nichi ly Siloh mary y savaichi pato i, Kheruben salo y awm nai ati cheaungkhang sa thai nai ARENG i Leu Maikawm Pawm la u teang bo. Naibaly Eli i chapo leaung nyhrei, Hopheni hawi Phineha ly Leu Maikawm Pawm hawi vanrei abang hawi bo.

⁵Leu Maikawm Pawm tym nai khala y Israela chengchi ly amo theu nai deaungkho y, khaileaung amchyh na pa-rei aeu u bo.

⁶Huni aeu nai raawi Philistia khumichi thai u nai khala y, “Hebrai tavaimichi taira i dengdairei aeu nai raawi tangai u cham; huni raawi ly ati mo?,” nanai thui u. Nichi ly ARENG i Leu Maikawm Pawm, Hebraichi tai nai mang y tym nai pany u nai khala y,

⁷jei hyn naimy, “Nichi i taira y tameuh tym veng bo!, achi ly sum ai bo he! Hina nai kamta tlenrei py avum vai y!

⁸Huni sa thai naira len nai tameuhchi kiu i, ami my atleu ai mo? Huni tameuhchi ly Aikupta chengchi ai daichi ka-vym y tleh chauchau nai tameuhchi ne na a!

⁹Philistia chengchi awi, paleung sorai u sy, neampacho luitang kamta tiu u, ti y baly Hebrai chengchi ly achi teng y miseaung achei reng nai kamta, achi ly nichi y teng miseaung achei ai nai tla ai; hunai deaungkho y neampacho luitang kamta tiu u!” napi.

¹⁰Philistia chengchi ly athorei my tiu u i, Israela chengchi ly sum u nai y, mychi i yhm mang y angpreng u. Huni atiu nai ly khumi padei pawi lawm na i, Israela tavaimi leaung meaungkateaung thomrei dei u.

¹¹Tameuh i Leu Maikawm Pawm ly paleung ka-echi i kiu y tym vui bo. Eli i chapo Hopheni hawi Phineha ai py padei u nai ne.

¹²Benjamin cheng theaung theung i khumi leaungrei ly tavai atiu nai meingtym i dengdairei angpreng prei bo. Ni ly paleung si nai ka-ma-ra baichuchi sei iy, lu y spryh aphui naimy Siloh mary y kanirei tym prei.

¹³Eli ly Leu Maikawm Pawm i vui y khri pa-rei paleung mawn nai deaungkho y, lam teng i my i atehra salo y ateh naimy, khen ngang ngang jo nai ne. Angpreng nai khumi ly tavai sum nai satang mary theung y ahei hai i, khumi bawibawichi ly angtheng naimy aeu u lengleang bo.

¹⁴Eli ly huni aeu nai katyn thai i, Ati katyn mo?” nanai deng. Huni khumi my Eli teng y jeu kaliki iy amti pi bo.

¹⁵(Eli ly saneng 98 rei awm i, mei py paju ai nai kasa bo.)

¹⁶Huni khumi my, “Kai ly vaini my tavai keung i nai tleaung i, lam jeungrei angpreng prei iy kang tym nai bo,” napi. Eli my ni teng y, Deang awi, leaungsai ly mana mo?” nanai deng.

¹⁷Satang syn nai keung my, “Israela chengchi ly Philistia chengchi teng y tavai sum i, angpreng u pawn veng bo; huni tavai keung y kaichi ly khri pa-rei sum na ly! Huni bo y nang i chapo Hopheni hawi Phineha nini py dei bo; naibaly Tameuh i Leu Maikawm Pawm py, paleung ka-echi i kiu y tym veng bo!” napi.

¹⁸Eli ly Leu Maikawm Pawm satang thai nai khala y, katheu sahawi i atehra tleaung i nai nithun mang y atlym amthai vui bo. Ni ly miteaung cheang iy veung py hawi ala nai y, kaneaung tleukrup i dei bo. Ni ly Israela chengchi ai, saneng vui palyhrei lu sa pi nai ne.

¹⁹Eli i lengngo, Phineha i aju ly deaungdi aniu i, tapen ai nai neng tym ryp bo. Ni ly Tameuh i Leu Maikawm Pawm, paleung ka-echi i kiu y tym nai satang py, amprang hawi juvo dei nai satang py, thai nai khala y vaimy kajeu no i, deaungdi tapen ryp bo.

²⁰Ni ly dei ai enten nai khala y, sahawi i neampachychi my, “Atho alo ba, nang ly chapo tapen bo!,” napi. Na i py ni ly tangai pajau y bo i, leu katheu y leang bo.

²¹Naibaly Leu Maikawm Pawm paleung ka-echi kiu y tym vui nai, amprang hawi juvo dei vui nai molam y, “Israela chengchi i phum-ang ly tama vui bo,” nanai thui i, huni chapo ai Ikabo nanai amyn pathi bo.

²²Hunaibaly ni my, “Paleung ka-echi kiu y Leu Maikawm Pawm tym vui nai deaungkho y, Israela chengchi i phum-ang jum veng bo,” nanai thui bi nai ne.