Read Khumi Chin 1 SAMUELA 6 Bible Online

1 SAMUELA 6 - Khumi Chin bible

1 SAMUELA 6

¹ARENG i Leu Maikawm Pawm ly Philistia pri theung y lo saryhrei awm nai bo y,

²Philistin cheng miteaung kehchi ly pathyp pi nai keungchi hawi, dawi sarachi ai palau iy, “ARENG i Leu Maikawm Pawm ai achi mana sa ai mo? huni Pawm ai angchei khala i meingtym y tha pi teang ai nabaly, huni hawi vanrei ati katalamra pei ai nai avo na mo?,” nanai deng u bo.

³Nichi my, “Nangchi ly Israela chengchi chiu nai Tameuh i Leu Maikawm Pawm ai nangchi my tha teang ai nabaly, katalamra abawi y baly avo y; nangmychi i kamngo ahui nai katalamra talam ai nai tla. Huna nai sa baly nangchi no roka tama ai. Mymy ly nangchi ai ati mana nai y pajeng nai mo, nanai py nangchi pany u ai,” napi u.

⁴Philistia miteaung kehchi my, “Kaichi ly ati katalamrachi talam ai mo?,” nanai deng u. Naibaly nichi my, “Nangchi ly samrang leaung pangreichi ai, leaungrei y muku uisalu myn pangrei hawi, muku paju myn pangrei talam u ai nai tla. Samrang leaung pangreichi hawi nangchi bawibawi ly no mi amjy harei avum u nai ne.

⁵Huna nai y uisalu i myn, nangchi i pri ai taphra nai paju mynchi sa iy, Israela chengchi i Tameuh ai tahm khai nai hawimy, palo ai nai tla. Mymy ly nangchi hawi nangchi i tameuhchi ai py, nangchi i pri ai py, pajeng nai ly anawn hai lym ai mang.

⁶Nangchi ly ati mana nai y Aikupta samrang hawi Aikupta chengchi kamta, paleung tang u lawh mo? Nichi ly Israela chengchi ai Aikupta pri i dengdairei theu ai naipei y ryrei ly Tameuh my nichi ai ati mana pajeng mo, nanai nangchi tami u moh.

⁷Hunai deaungkho y ka-ri kangtha so u ly kalop so hai y rai nai si nu choprawi nyhrei ai, huni ka-rira tai iy chochi ai ly hai theung y tha teng.

⁸Hunaibaly ARENG i Leu Maikawm Pawm ai ka-ri tleaung y theng ly nangmychi i kamngo ahui nai katalamra napi nai muku mynchi ai, takhra pawm hareira y khai iy Pawm sahawi y khai; hunaibaly ka-ri ai ngai naira mang y theu hai ba.

⁹Ka-ri ly mani mang y chei mo, nanai khen u patawm; Beth Sheme mary mang y chei lawh baly, Israela chengchi i Tameuh ly achi tlang tleaung y, ka-jei awm parai nai no mi tym hai ai, nanai pany u; na i py ka-ri ly huni mary mang y chei y lawh baly, mymy ly achi teng y no mi tym hai ai ny y; no mi ly mymy ngai ngai ang tym nai ne, nanai achi pany u ai,” napi.

¹⁰Nichi ly pathyp pi nai keungchi my thui pi nai kamta, si nu nyhrei ai ka-ri tai iy chochi ai ly hai theung y paeung u bo.

¹¹Leu Maikawm Pawm ai ly muku paju myn hawi muku uisalu myn abawi nai pawm hawi vanrei, ka-ri salo y tang u.

¹²Sinu nyhrei ly ka-ri ryh naimy Beth Sheme mary chei nai lam y tako amteaung bo; huni kataw naimy ryh i, langvawi lamtang py amphri vui y naimy pa-u prei iy Beth Sheme mary mang y cheibo. Philistia samrang leaung pangreichi ly Beth Sheme mary jyh sahawi ryrei abang u nai ne.

¹³Beth Sheme mary i khumichi ly leaunghawi theung y choh tyn u nai thym y angdeang u nai khala, Leu Maikawm Pawm ai niu u nai deaungkho y, khrikhri pa-rei amo theu u.

¹⁴Ka-ri ly Beth Sheme mary i khumi Josua i li y tym nai khala, lengseaung pui sahawi y anawn bo. Khumichi ly huni ka-ri taphra u iy si nu tleh i, leng patlum nai kapathypra palawn naimy, ARENG teng y talam u bo.

¹⁵Levi theaungchi ly ARENG i Leu Maikawm Pawm hawi muku mynchi abawi nai pawm ai kateang iy, lengseaung pui tleaung y khai u. Hunaibaly Beth Sheme mary i khumichi ly ARENG teng y leng patlum nai kapathypra hawi takhra talam nairachi talam u bo.

¹⁶Philistia samrang leaung pangreichi ly huni leaungsaichi khen u chum baly, huni kani y my Ekron mary y vawi u bo.

¹⁷Philistia chengchi ly muku uisalu myn pangrei ai mary ha harei y harei, Asadod mary, Kaza mary, Asakelon mary, kath mary hawi Ekron marychi ai dawn hai pathyp iy, mymychi i vui kamngo lawi nai katalamra palawn iy, ARENG teng y tha pi u.

¹⁸Nichi ly muku paju myn ai py, Philistia samrangchi i peang nai khaw parai nai marychi hawi avangchi i vui, mary ha harei y harei tha pi u bo. Beth Sheme mary Josua i li y, ARENG i Leu Maikawm Pawm khai nai lengseaung pui ly huni neng khala y avum nai saichi ly pany hai nai ne i, vaini khrairei awm.

¹⁹Beth Sheme mary i khumi leaung vui saryhreichi ly Leu Maikawm Pawm theung y khen lawh nai deaungkho y, ARENG ly nichi ai dei ai nai pa-rei pajeng bo. Mary i khumichi ly mychi i khumi neangneangchi ai padei nai deaungkho y, vo tangam u.

²⁰Hunai deaungkho y Beth Sheme mary i khumichi my, “Chai parai nai Tameuh napi nai ARENG i mo y ami kham pajau ai mo? Achi hawi palo pa-rei, mymy ai mani mang y tha vui ai mo?,” nanai thui u bo.

²¹Kiria Jearim mary i khumichi teng y savaichi pato iy, “Philistia chengchi ly ARENG i Leu Maikawm Pawm ai, ang tha pi teang bo, nangchi jeu iy Pawm angjeaung u,” nanai taviu u bo.