Read Kichwa San Mateo 1 Bible Online

San Mateo 1 - Kichwa bible

San Mateo 1

¹Caigunami Jesucristohua huañuc apayaya shutiguna, paiga Davidmandas ñaupa Abrahanmandahuas mirai ara.

²Abrahanba churi Isaac ara, Isaacpa churi Jacobo, Jacobohua churi Judá paihua huauquigunandi.

³Judága ishcai (2) churita charira Fares Zaro nishcaguna, chi churigunahua mama Tamar ara. Farespa churi Esrón, Esrónba churi Aram.

⁴Aramba churi Aminadab, Aminadabba churi Nasón, Nasónba churi Salmon.

⁵Salmon Rahabhuan Boozta charira, Booz Ruthuan Obedta charira. Obedpa churi Isaí,

⁶Isaíba churi mandac rey amu David, mandac Davidpa churi Salomon, Salomonba mamaga Uriaspa huarmi ara.

⁷Salomonba churi Roboan, Roboanba churi Abías, Abíaspa churi Asa.

⁸Asahua churi Josafat, Josafatpa churi Jorán, Joranba churi Uzias.

⁹Uziaspa churi Jotan, Jotanba churi Acaz, Acazpa churi Ezequias.

¹⁰Ezequiaspa churi Manases, Manasespa churi Amón, Amónba churi Josias.

¹¹Josiaspa churi Jeconias paihua huauquigunandi, israel runaguna Babilonia nishca llactama apai tucuushca uras pagaric anaushca.

¹²Israelguna lugaryashcahuasha Jeconias shuc huahuata tupara Salatiel nishcata. Salatielba churi Zorobabel.

¹³Zorobabelba churi Abiud, Abiudba churi Eliaquín, Eliaquínba churi Azor.

¹⁴Azorba churi Sadoc, Sadocpa churi Aquin, Aquinba churi Eliud.

¹⁵Eliudba churi Eleazar, Eleazarba churi Matán, Matanba churi Jacobo.

¹⁶Jacobohua churi Jose, Josega Mariahua cari ara, Mariami Cristo nishca Jesuspa mama ara.

¹⁷Chasna acpi Abrahanmanda Davidgama chunga chuscu (14) miraiguna anaura, chasnallata David mandashca urasmanda israelguna Babiloniama apaitucushca urascama chunga chuscu (14) miraiguna anaura. Chi apai tucushca urasmanda Cristo pagarishca urascama chunga chuscu (14) miraiguna anaushca. Jesucristo pagarishcamanda

¹⁸Jesucristo pagarishcaga casna mara: Paihua mama Mariaga Jose tapushca asha paihuan chara mana llutariushcallaita Diospa Samai ushaihuan huicsayara.

¹⁹Ñáa paihua cari tucuna Josega Diospacpi ali runa ara. Alita pactachic asha pai tapushca huarmi Maria huicsayuc tucushcata yachasha paita saquinata yuyarira. Chasna ashallata tucui runa ñaupacpi paita pingachinata mana munasha, chunllamanda saquinata yuyarira.

²⁰Chasna pai yuyariushcai shu tuta muscuibi Diospa angel ricurimusha paita nira, mandac rey amu Davidmanda mirai Jose, ama manzhaichu camba huarmi Mariata japingahua. Chi paihua huicsaibi tiyac huahuaga Diospa Samaimandami.

²¹Paiga shuc cari huahuata pagarichingami. Chi huahuataga Jesus nishcata shutichingui, paihua runagunata juchamanda quishpichingaraushcamanda chasna shutichingui, nira.

²²Yaya Dios chasna yuyaita cucpi Dios rimashcata shuc pasachic runa ñaupallata caimandami quillcashca. Chimi cunanga ña pactamushca:

²³Shuc malta huarmi huicsayuc tucunga,cari huahuata pagarichinga.Chi huahuata Emanuel nisha rimangauna, nira. Runa shimibi Emanuel nisha nin Dios ñucanchihuanmi.

²⁴Jose puñushcamanda niccharisha Diospa angel rimashcata pactachisha Mariata japira paihua huarmi tucuchun nisha.

²⁵Paihuan chara mana llutarishca agllaita Maria punda cari huahuata pagarichira, paitaga Jesus nishcata shutichira.