Read Kichwa San Marcos 15 Bible Online

San Marcos 15 - Kichwa bible

San Marcos 15

¹Ñáa punzhayaushcai pagri amuguna, israel rucu mandaccunandi, Diospa shimita yachachiccunandi, israel taripaccunandi Jesusta imasna ranata cuintanacunaura. Chihuasha Jesusta huatasha chi llactata mandac romano apu Pilatohuagma apanaura.

²Apasha pactanaupi apu Pilato Jesusta tapura, Can israelgunata mandac amuchangui nisha. Tapucpi rimara, Indá, can rimashcacuinta mani.

³Pagri amuguna ashcata caudsayachicpi apu Pilato cutillata Jesusta tapura, Manachu imatahuas paigunatas rimangui. Uyai, ashcagunatami canda caudsayachiunguna nira.

⁴

⁵Jesus randi shuc shimillatahuas mana rimarachu. Chasna mana rimacpi apu Pilato manzharira. Jesusta huanchichi nisha caparishcamanda

⁶Chi jista punzhagunaibi mandac amu Pilato shuc carcelbi tapariauc runata cacharic ara israelguna munashca runata.

⁷Chi uras shuc Barabas nishca runa tapashca ara. Paiga shuc runagunahuan gubirnuta piñasha tulashun nisha raushcai shuc runatas huanchishcamanda tapaitucura paihuan puriccunandi.

⁸Chi jista punzhai israel runaguna apu Pilatohuagma rinaura paihua tunu ranata rasha shuc runata cacharichun nisha rimangahua.

⁹Ñáa Pilato yacharami chi pagri amuguna Jesusta piñashcamanda paihuagma pushamushcata. Chasna acpi pactamunaupi Pilato paigunataga tapura, Canguna israelgunata mandac amutaga ñuca cacharichun nishachu munanguichichu.

¹⁰

¹¹Randi pagri amugunaga runagunata rimanaura Barabasta cachari nisha caparichi.

¹²Chasna caparinaupi Pilato cuti paigunata tapura, Imatata rasha israelgunahua rey amu canguna nishcataga.

¹³Tapucpi caparinaura, Paita cruspi quilabasha huanchi.

¹⁴Chasna caparinaupi tapura, Ima mana alitata rara. Paiguna astahuanbas sinzhita caparinaura, Paita cruspi huanchi.

¹⁵Chasna caparinaupi Pilato chi israelgunata cushiyachinata munasha Barabasta cacharira. Astahuanbas Jesusta randiga ashcata libachishcahuasha sundalugunama cura paita cruspi huanchigrichi nisha. Jesusta pugllasha asishcamanda

¹⁶Sundaluguna Jesusta japisha mandacpa huasi ucuma apanaura.

¹⁷Tucui sundaluguna tandarisha apu churarina llachapata Jesusta churachinaura. Casha huascatas ahuasha paihua umaibi churachinaura.

¹⁸Huasha shu aputa cushiyachishcacuinta camisha rimanaura, Israelgunahua amumi cunanga jatun mandac tucungui nisha.

¹⁹Paihua ñaupacpi cungurisha aputa balichishcacuinta ranaura. Chasna pugllasha camisha paihua umai caspihuan huactaunaura, paihua aichaibihuas tiucanaura.

²⁰Asishcahuasha llatanachisha paihua quiquin llachapata churachinaura. Chihuasha paita cruspi huanchingahua apanaura. Cirene llactamanda runa

²¹Paita apanaupi shuc Cirene llactamanda Simon nishca runata tupanaura. Chi runaga Alejandrohua, Rufohua yaya mara. Pai chagramanda shamucta Jesuspa crusta marcachinaura.

²²Ñáa Gólgota nishca urcuma Jesusta apanaura huanchingahua. Runa shimibi Gólgota nisha Umatullu urcu ninmi. Jesusta cruspi huanchishcamanda

²³Chi sundaluguna vinota mirra nishca rimidiuhuan chapushcata Jesusta upi nisha ricuchinaura. Ricuchigllaita Jesus mana upirachu.

²⁴Chasna Jesusta cruspi huanchinaura. Chi sundalugunaga Jesuspa llachapata japisha maicanshi surtita charisha japinga nisha camanaura.

²⁵Ñáa paita cruspi huanchishca urasca tutamanda ara, las nueve tupu.

²⁶Crus jahuai shuc quillcashcata churanaura imamanda huanchitucun nisha. Casna paihua crus jahuai ISRAELGUNAHUA AMUMI nisha quillcashca ara.

²⁷Paihuan pariu ishcai (2) shuhuaccunatas quilabashca anaura, shuca paihua ali maqui partima, shuca paihua lluqui maqui partima.

²⁸Chasna ranaupi Diospa shimibi ñaupa quillcashcacuinta tucura: Paita juchayuccuintata ranaura nisha.

²⁹Ñáa chi ñambita pasaucunahuas Jesusta mana balichisha camisha asinaura. Umata cuyuchisha caparinaura, Can Diosta alabana huasita tulasha quimsa (3) punzhaibi shayachishami nisha rimarangui nisha.

³⁰Cunanga can quiquin quishpiri uraicui nisha asisha caparinaura.

³¹Pagri amuguna chi Diospa shimita yachachiccunandi Jesusta asisha paigunapura rimanaura, Shuccunata quishpichira astahuanbas paillata quishpirinata mana ushanzhu.

³²Chasna asisha rimanacunaura, Pai Cristo ashaga, israelguna amu ashaga cunanllata crusmanda uraicuchun, chita ricusha quirinchimami. Jesushuan pariu cruspi quilabashca runagunahuas paita asinaura. Jesus huañushcamanda

³³Ñáa chaupi punzhamanda las trescama tucui partibi ansayara.

³⁴Las tres tupui Jesus sinzhita caparira, Eloi, Eloi, lema sabactani. Runa shimibi chita nin, Ñáuca Dioslla, ñuca Dioslla, imangahuata ñucata jichuhuangui.

³⁵Chita uyasha shuc chibi tiyaucuna rimanaura, Dios rimashcata pasachic ñaupa causac Eliastami cayaun.

³⁶Shuc runa callpasha risha pututa jayac vinoibi chupachisha caspi pundai huatasha Jesusta upichiunimi nisha rimara, Cunan ricushun Elias shamusha uraicuchichun chimanda.

³⁷Jesusca sinzhita caparisha huañura.

³⁸Chi ratullaita Diosta alabana huasi ucuibi huarcuriac llachapa chaupi chaupibi sháca jahuamanda allpama pasacta liquirira.

³⁹Chi crus ñaupacpi shayauc sundalugunata mandacca Jesus huañushcata ricusha, Sirtupachami cai runa Diospa churi ashca nisha rimara.

⁴⁰Shuc huarmiguna carumanda tucuita ricuunaura. Shucca Maria Magdalena ara, quipa Jacobohua Josehua mama Mariahuas aura, shucca Salome ara.

⁴¹Paiguna Jesusta Galileamanda catisha cuirac anaura. Chi huarmigunahuan shuccunahuas tiyanaura Jesushuan pariu Jerusalenma shamuucunas. Jesusta pambashcamanda

⁴²Cayandi samana punzha ashcamanda ña chishiyaupi shuc runa mana manzhasha amu Pilatohuagma risha Jesuspa aichata cuhuai ñuca apasha pambangahua nisha tapugrira. Chi runa Arimatea llactamanda Jose nishca ara, israel amuguna muntunmanda mara. Paihuas Diospa ali mandanata ricuchinaga caillayamuunmi nisha chapauc ara.

⁴³

⁴⁴Apu Pilato Jesus ña huañushcata uyasha manzharira. Chita mana quirisha chi sundalugunata mandacta cayasha tapura, Jesusca huañushcachu. Pai indá nisha cutipacpi apu Pilato Joseta, Paihua aichata apailla nira.

⁴⁵

⁴⁶Jose chimanda llucshisha ruyac llachapata randira. Huasha, Jesuspa aichata crusmanda uraicuchisha chi llachapahuan pillusha pambana juctui churanaura. Chi juctuga urcu sapibi allashca ara. Chihuasha juctu punguta jatun rumihuan tapanaura.

⁴⁷Chasna racpi Maria Magdalena Josehua mama Mariahuan maibi paiguna churaushcata ricunaura.