Read Kichwa San Lucas 3 Bible Online

San Lucas 3 - Kichwa bible

San Lucas 3

¹Chi uras romano llactagunata jatun mandac Tiberio Cesar ña chunga pichca (15) huatata romano llactagunata jatun mandac amu tiyashcaibi cai gubirnadurguna anaura: Judea provinciai Poncio Pilato ara, Galilea provinciai Herodesmi ara, Iturea y Traconite provinciagunai Herodespa huauqui Felipe ara, Abilinia provinciai Luciano ara.

²Chasnallata israel pagrigunata mandaccuna Anaspas, Caifaspas anaura. Chi uras Zacariaspa churi Juanga runaguna mana causaushca pambai aushcai Yaya Dios paita mandara ñuca rimashca shimita camachigri nisha.

³Chasna mandacpi Juan tucui Jordan yacu mayanda puriusha casna nisha camachira, Dios canguna juchagunata anchuchingahuaca canguna juchagunata rashcamanda llaquirisha saquichi, chihuasha bautisarichi nisha camachira.

⁴Dios rimashcata ñaupa pasachic Isaiasca Juanmandami casna quillcashca. Pai quillcashcacuinta ña cunan pactarishcami. Chi shimiga casna mashca:Chaquishca pambaibi shuc runa casna caparisha camachin:Dios cachashca quishpichic runaraicushuc cusca ñambita rashcacuintacanguna causaita alichirichi nisha.

⁵Tucui huaicugunahuas taparinaungami, tucui urcugunahuas pambayanaungami.Arcu ñambigunahuas tsigllayanaungami, mana pariullagunahuas pariyashca tucunaungami.

⁶Tucui runaguna Dios shuc quishpichicta cachamungaraushcata ricungaunami. Dios chasna rimachishcacuinta Isaias ñaupata quillcashca ara.

⁷Chi shimi pactaricpi Juan tucui pai bautisarinata munac runagunama casna rimara, Canguna palucuinta mana alita rac mirai partimanda anguichi. Pita cangunata rimaraya Dios taripasha libachinamanda quishpingahuaca. Canguna chasna causausha Dios taripana punzha pactamucpi mana quishpinata ushanguichichu.

⁸Cunanga juchata saquisha alita rasha causana manguichi canguna causai sirtu cambiarisha Diosma shamushcata ricuchingahua. Ama rimaringuichichu ñucanchi apayaya Abrahanmanda miraiguna ñucanchi ashcamandami quishpishca anchi nisha. Cangunata nini, Dios munashaga cai rumigunamandas ushanmi Abrahanmanda miraigunata rangahuaca.

⁹Dios taripanaga shuc ruyata cuchuna hachacuinta cunan pactamushcami. Maican ruya mana ali muyuta aparicpi cuchushcahuasha ninaibi shitaitucun. Cangunaga mana alita rasha causashcamanda chi mana ali aparic ruyacuinta manguichi. Chimandami taripashca tucunguichi.

¹⁰Juan chasna camachicpi uyasha tapushcauna, Ñáucanchiga imatata rana anchi nisha.

¹¹Tapucpi rimara, Maican runa ishcai (2) camidsata charisha mana charic runata shucta cunami. Micunata charisha chasnallata cunami nira.

¹²Chi uras gubirnuraicu cullquita tandachiccuna Juanbagma shamusha bautisaringahua paita tapushcauna, Ñáucanchiga imasnata rashun señor.

¹³Tapucpi nira, Gubirnu rimashca tupullata tapuichi cullquita, ama yalicta tapunguichichu.

¹⁴Sundalugunahuas paita tapunaura, Ñáucanchiga imatata rashun. Paigunata nira, Pimandahuas cullquita ama imatas yanga apaichichu. Ama umasha shuhuanguichichu pihuactahuas. Canguna ganashca cullqui tupullahuan causaichi nira.

¹⁵Dios cachangaraushca quishpichic shamunata chapaucuna Juanda ricusha yuyarinaura, Caichu quishpichic Cristoga an nisha.

¹⁶Juan randi paigunata nira, Ñáuca cangunata yacullahuanmi bautisauni. Ñáucahuasha shamungami ñucamanda mas yali ushaiyuc runa. Shuc mas pishi tarabac runacuinta huascallatas pascasha paihua zapatosta llucshichingahuas mana balicchani. Paiga maican runagunata Diospa Samaihuan ninahuanbas bautisangami.

¹⁷Shuc runa muyugunata pallasha caspihuan huactan muyu carata ishcurichun nisha, muyu carata jichusha ninai rupachingahua, tucui ali muyugunalla saquirichun nisha paihua huasi ucuma huacaichingahua. Dios cachangaraushca ñucamandahuasha shamuc runaga chicuinta rasha Diospacpi alita rac runagunata paihua huasima apangami, chi mana alita rac runagunata huiñaigama ninaibi rupachinga. Chasna nisha Bautisac Juan paigunata yachachishca.

¹⁸Juan chasnallata mas chicuintallata runagunata yachachisha quishpinamanda Diospa ali shimita cuintaura. Juanda carcelbi tapashcamanda

¹⁹Juanga mandac amu Herodesta canga mana alitachu rasha causaungui nisha rimara. Shuctas mas rimara camba huauquihua huarmi Herodías nishcata quichusha mana alitachu rangui.

²⁰Chasna nisha rimacpi Herodes piñasha mas mana alita rasha Juanda carcelbi tapara. Jesus bautisarishcamanda

²¹Tucui runaguna bautisarishcai Jesuspas bautisarishcami. Pai Diosta mañaushcai jahuapacha pascarira.

²²Pascaricpi Diospa Samai shuc palomacuinta ricurisha paihua jahuai shamura. Chasnallata jahuamanda shuc shimi uyarira, Canga ñuca yapa llaquishca churi mangui, can quishpichic tucuchun nisha ñuca canda cushihuan japirani.

²³Jesus ña quimsa chunga (30) huatayuc aushcai pai yachachingahua, pihuas mana rashcagunatas rangahua callarira. Jesuspa huañuc apayayagunamanda

²⁴Josehua yaya Elí nishca ara, Elíba yaya Matat, paihua yaya Leví, paihua yaya Melqui, paihua yaya Jano, paihua yaya Jose,

²⁵Josehua yaya Matatias, Matatiaspa yaya Amos, Amospa yaya Nahun. Nahunba yaya Esli ara, Eslihua yaya Nagai.

²⁶Nagaiba yaya Maat ara, Maatpa yaya Matatias. Matatiaspa yaya Semeí, Semeíba yaya Josec, Josecpa yaya Judá.

²⁷Judáhua yaya Joano ara, Joanohua yaya Ireso, Iresohua yaya Zorobabel. Zorobabelba yaya Salatiel ara, Salatielba yaya Neri.

²⁸Nerihua yaya Melqui ara, Melquiba yaya Adi, Adihua yaya Cosam. Cosamba yaya Elmodan ara, Elmodanba yaya Er ara.

²⁹Erba yaya Josue, Josueba yaya Eliezer, Eliezerba yaya Jorim, Jorimba yaya Matat.

³⁰Matatpa yaya Leví ara, Levíhua yaya Simeon, Simeonba yaya Judá, Judáhua yaya Jose. Josehua yaya Jonán ara, Jonánba yaya Eliaquín.

³¹Eliaquínba yaya Meleo ara, Meleohua yaya Mainán, Mainánba yaya Matato, Matatohua yaya Natán.

³²Natánba yaya David, Davidba yaya Isaí, Isaíba yayaga Obed ara, Obedpa yaya Booz ara. Boozpa yaya Salmon, Salmonhua yaya Nasón.

³³Nasónba yaya Aminadab, Aminadabba yaya Arni ara. Arnihua yaya Esrón, Esrónba yaya Fares, Farespa yaya Judá ara.

³⁴Judáhua yaya Jacobo, Jacobohua yaya Isaac, Isaacpa yaya Abrahan ara. Abrahanba yaya Taré, Taréba yaya Nacor ara.

³⁵Nacorba yaya Seruc ara, Serugpa yaya Ragau, Ragauba yaya Peleg, Pelegpa yaya Heber, Heberba yaya Saló.

³⁶Salóhua yaya Cainan, Cainanba yaya Arfajad, Arfajadpa yaya Sem. Semba yaya Noe ara, Noeba yaya Lamec.

³⁷Lamecpa yaya Matusalen ara, Matusalenba yaya Enoc, Enocpa yaya Jared, Jaredpa yaya Malaleel, Malaleelpa yaya Cainan.

³⁸Cainanba yaya Enos, Enospa yaya Set ara. Setpa yaya Adan ara. Adanga Yaya Dios rashca mara.