Read Kichwa Romanos 3 Bible Online

Romanos 3 - Kichwa bible

Romanos 3

¹Chasna acpiga israel runa anaga balinzhu. Carata pitirinaga balinzhu.

²Indá, tucuimi balin. Ñáaupapundaga Dios israel runagunata japisha paihua shimita cura.

³Maican israelgunaga Diosta mana quirinaunzhu. Paiguna mana quiripihuas Dios mana pactachicchan nisha ama yuyaringuichichu.

⁴Paiga sirtu quiribac man. Tucui runaguna llullac agllaita Dios pactachishami nisha rimashcaga pactarinmi. Diospa shimibiga casnami nin:Can rimashcata uyasha sirtu man nisha rimangaunami.Canda binsishun nisha rimac runagunata binsinguimi nisha quillcashcami tiyan.

⁵Cunanga runa yuyarishcashina rimangarauni casna nisha, ñucanchi juchata racpi Dios ali acta ricuchinchi, chasna ricuchicpi pai taripaushcai paihuas mana alita racchan nishami yuyaringuichi. Chasna yuyarina balinzhu. Mana.

⁶Mana chasna yuyarinachu. Dios mana alita rasha causashaga tucui runagunata taripanata mana ushanmachu.

⁷Maican runa rimanmachari ñuca llullashcamanda Dios sirtu rimac acta ricuchini. Ñáuca llullashcamanda runaguna paita balichicpi imangahuata juchayuccuintami taripaitucuni nishaga rimasha.

⁸Maican ñucanchita piñaucuna llullasha rimaunguna Pablogunaga casna yachachinaun mana aligunata rasha catishunchi Dios ali ashcata ricuchingahua nisha. Chasna llullashcamandami Dios paigunata taripanga. Tucuigunami culpayuc anchi

⁹Chasna acpi imatata rimashun. Israelgunaga shuccunamanda yali ali manchi nisha yuyarinata ushanchichu. Mana. Ñáa basta rimashcanimi imasna israelgunas mana-israelgunahuas juchata rac manaun nisha.

¹⁰Chimanda Yaya Diospa shimi casna nin:Mana pihuas tiyanzhu Dios munashcata pactachiccunaga,shug runallahuas mana tiyanzhu.

¹¹Mana pihuas Diostaga quiquinda intindinzhu,mana pihuas paihuan causangahua mascanzhu.

¹²Tucui runagunami Diospagmanda anchurishcauna mana alita rasha puringahua.Mana pihuas alita ranzhu,ni shugllahuas mana tiyanzhu.

¹³Pambashca juctu pascariaucshina paiguna shimiga asnacta ashami yapa llullasha jiridsata rimanaun.Palu canishcacuinta paiguna shimihuan shuccunata yapa huaglichinaun.

¹⁴Paiguna shimihuan yapa piñasha chigninaun.

¹⁵Callpashami rinaun runata huanchingahuaca.

¹⁶Maita purishahuas mana alita rasha llaquichisha purinaun.

¹⁷Ali causanata mana ricsinaunzhu.

¹⁸Yaya Diosta mana manzhashachu causanaun. Chasnami Diospa shimibi quillcashcaga tiyan.

¹⁹Ñáa yachanchimi Dios israelgunama cushca shimiga paiguna cadsuna man. Chasna acpi ñucanchi israelgunas chi shuccunahuanbas Diospacpi shayarishcaibi pai taripacpi mana imatahuas rimanata ushanchichu juchata rashcamanda.

²⁰Chi mandashca shimigunata pactachigllaita Dios mana pitahuas ali mangui nisha rimangachu. Chi mandashcagunata yachashami ñucanchi juchayuc ashcata yachanchi. Jesucristota quirishcamandallami quishpishcanchi

²¹Chasna acpi Diospacpi ali tucunaga mana mandashcagunata pactachishcamandachu astahuan shuc tunuta ricuchina tiyan. Chitaga Dios rimashcata pasachic runaguna chillatata quillcasha yachachinaura.

²²Dioshuan ali tucunaga casna man: Jesucristota quirinami. Tucui Jesucristota quiric runaga Diospacpi ali tucusha quishpichishca tucunchi, chi mandashcagunata charic runagunas mana chariccunahuas mana chicanchanaun Diospa ñaupacpiga.

²³Tucui runagunaga juchata rashcamandami Diospagma pactanata mana ushanaunzhu.

²⁴Chasna agllaita Dios runagunata llaquisha Jesucristo huañushcamanda quiriccunataga tucui paiguna juchagunata pichasha lugaryachishcami. Chasna acpi paigunaga Dioshuan ña ali tucushcaunami.

²⁵Jesucristo huañusha paihua rahuaita talisha tucui paita quiric runaguna juchagunata anchuchichun nisha Dios paita cachara. Yaya Dios ali acta ricuchingahuami chasna rashca. Chi ñaupa causac runaguna juchata rashcagunata yachashallatami paiga ahuantasha chapashami chi urasllataga mana cashtigara.

²⁶Cunanga pai ali raushcata ricuchingahuami ñucanchi juchamanda libachisha nisha paihua churita cachamura huañungahua, Jesusta quiric runata ali mangui nisha rimangahua.

²⁷Dios chasna ñucanchita quishpichic acpiga imasata rimanata ushanchi ali mani nishaga. Mana ushanchichu chasna rimanata. Imamandata mana ushanchi. Caimandami: Dioshuan ali tucunchi mana Moises mandashcata pactachishcamandachu astahuan Jesucristota quirishcamandami.

²⁸Chasna asha yachanchimi Jesucristota quirishcamandallami Dioshuan ali tucusha quishpichishca tucunchi, mana chi mandashcagunata pactachishcamandaga.

²⁹Diosca israelgunahuagllachan, manachu tucuibac an. Indá, tucui runagunahuac man Diosca.

³⁰Dios shuglla ashcamandami tucuigunata shuc tunullahuan quishpichin. Israelgunas mana-israelgunahuas Jesusta quirishallami quishpichishca tucunaun.

³¹Ñáucanchi chasna quirinamanda rimasha Dios mandashcagunata saquinchichu. Mana, astahuanbas cunan Jesusta quirisha pai mandashcagunata alita pactachiunchimi.