Read Kilivila VITOUULA 2 Bible Online

VITOUULA 2 - Kilivila bible

VITOUULA 2

¹E mapaila Yaubada ivigimkulovi kala bububula vavagi komwaidona walakaiwa deli watanawa.

²E kwailima kwaiyuwela yam Yaubada eivinaku la bububula komwaidona baisa avaka leiuvagi, e ivaiwasiga paisewa.

³E bogwa ikabwaili yam kwailima kwaiyuwela e ikatupaliga makwaina yam kwaiveka paila matutowena leivigimkulovi bububula, e ivaiwasi.

⁴Baisa makawala goli leivigaki leibubuli walakaiwa deli watanawa ambaisa ambaisa vavagi komwaidona. Tutala Guyau Yaubada[5] ibubuli vavagi komwaidona walakaiwa deli watanawa,

⁵e gala avai kai isisu odabala pwaipwaia. Paila uula Yaubada gala wala biwitali kuna, e tuvaila gala availa bibiguli makwaina pwaipwaia.

⁶Mitaga sopi biludulodu metoya olumoulela pwaipwaia biiyopututu.

⁷E Guyau Yaubada iyeili sitana pwaipwaia metoya opwaipwaia e ivigaki taitala tau.[6] E ikayoki yagisa deli momova okabulula, e matauna tau ivitouula la momova.

⁸E Guyau Yaubada ibiguli buyagu makubilana Ideni opilibomatu, e baisa isaili matauwena tau leibubuli.

⁹E Guyau Yaubada ivali kai kaiminibwaita kasi gigisa migawelu migawelu isusinasi iuwasi kawailuwa bwaina sainela. E oluwalela makwaina bagula kaiyu kai itotusi, kaitala makaina kaila momova, e kaiyuwela makaiwena uulela kabitam paila vavagi bwaina deli vavagi gaga.[7]

¹⁰E sakala ititayelu olopola Ideni, e ivinumli bagula makwaina. Metoya baisa Ideni ikatuvi ivigaki waya kaduyovasi.

¹¹Kaduyomatala waya makaduyona yagala Pisoni, ititayelu olopola mapilana valu Abila.

¹²(Goula kwevivivila ikanaiki baisa, e bulami maiina saina simasimina, deli dakuna kwekavikavila mwau mipusi.)

¹³Kaduyuwela waya yagala Gioni ititayelu olopola mapilana valu Kusa.

¹⁴Kaduyotolula waya yagala Tegirisi, makaduyona ititayelu mapilana Asiria opilibomatu. E kaduyovasila waya makaduyona Yupereiti.

¹⁵E Guyau Yaubada isaili tau matauna olopola buyagu Ideni paila bibiguli deli biyamati.

¹⁶E Guyau Yaubada iluki matauna, kawala, “Ibodaim bukukoma kai kaiuwala komwaidona olopola bagula,

¹⁷mesinaku wala makaina kai uulela kabitam paila vavagi bwaina deli vavagi gaga. Gala ibodi bukukoma kaiuwala kai makaina. Kidamwa bukukoma, yam makwaina wala bukukwaliga.”

¹⁸E Guyau Yaubada ikaibiga, kawala, “Ka, gala avaka kala bwaina tau matauna kalamwaleta wala bisisu. Bogwa babubuli taitala lubaila kidamwa bipilasi matauna.”

¹⁹Mapaila iyeili sitana pwaipwaia metoya opwaipwaia, e ivigaki mauna nasigisagina deli nayoyowa kasi gigisa migawelu migawelu. E imai minasina bimaisi omatala tau kidamwa bisaiki igasi. E makawala goli komwaidona minasina isim wala igasi.

²⁰Matauna tau bisaiki igasi komwaidona mauna[8] nayoyowa deli nasigisagina. Mitaga gala goli natana minasina isisu bisaiki lubaila kidamwa bipilasi matauna.

²¹E oluvi Guyau Yaubada ikaraiwogi matauna tau bimisiwoya sainela. Tutala immasisi, e Guyau Yaubada ikisasi visiala kaitala e oluvi iluvisosuvau wowola matauwena.

²²Ikau visiala ivigaki natana vivila e ivakouli minana imiaki matauna.

²³E tau matauna ikaibiga, kawala, “Ka, bogwa labani taitala migima migitinidesi wala. Totuwanela metoya ototuwanegu, e vilionala metoya ovilionegu. Bogwa ladoki minana yagala ‘Vivila’ paila uula eisunapula metoya baisa tau.??[9]

²⁴Baisa uula tau bisilavi tamala inala, bivakouli la kwava, e kasitaiyu bivigakaisi uwosi makawala taitala.

²⁵E kasitaiyu wala tau sola vivila tokikimwadu wala, mitaga gala wala immosilasi.