Read Kilivila VITOUULA 49 Bible Online

VITOUULA 49 - Kilivila bible

VITOUULA 49

¹Yekobe idau litula e ilivala, kawala, “Kusigugulasi gulitinidesi e balukwaimi paila avaka bivitolai tuta oluvi.

²“Tauwau litula Yekobe, kumaisi gulitinidesi kulegasi. Bukulagaigusi yeigu tumami yagagu Isireli.

³“Mwa, Rubeni. Yoku ulo kulutala aunibogwaim, e yoku wala ulo peula. Deli ulo kuluta yoku tutala igau otubovaugu. Yoku tomwamwasila deli goli topeula metoya oluwalaimi yokomi litugwa.

⁴Yoku makawala sakala bidumyelu, mitaga yoku gala kuvigakaim saina toveka. Paila yoku lokumisii minana ulo ula,[96] minawena lavigaki ulo kwava, e makawala goli lokukwavi kam kwaboma titoulem.

⁵“Simioni sola bodala Libai oyumasi iyosisi si lewa e iyowaisi deli sesia.

⁶E yeigu gala batoula deli matausina ikasilamsi, e gala basilala olumoulela sigugula makwaina. Paila ikatumataisi tomota deli kasi leiya, e ikatuuwolaisi bulumakau nammwala kaikesi paila bivigakaisi kasi yousokana.

⁷Akagagi si gibuluwa, paila saina togigasisi. E akagagi si gidaleiya paila uula saina toseputupwatula. Bayobutubutu matausina olopola valu Isireli komwaidona, e babutugigai matausina bibutusi wala oluwalaisi mina Isireli.

⁸“Mwa, Yuda. Budamwa biyakawolaimsi. Bukuyosi kam tilaula okaiyosi. E budamwa bikavaginaimsi.

⁹Yuda makawala laiyoni. Bikamati kala tau e bikeiita kala nobwala, bikanaki lopola yamala bivitukoli, bikanukwenu, e gala taitala biyobosi.

¹⁰Yuda igau bikau gweguya kasi karaiwaga kabutuvitusila, e dalela tuta komwaidona biguyausi. Kabokwaraiwaga igau bimaiyaisi si urigubu, e bikavaginasi deli si tagwala baisa matauna.

¹¹E isikoli la ase osisila waini, makaina saina kaiminabwaita sainela, e iwina kala kakapula metoya tovala waini bweyani.

¹²Matala ikulubuyavi ikalisau waini bweyanila, e kudula pupwakaula ikalisau nunu kala pupwakau.

¹³“Sebuloni matauna tokulumata. Ola kawolawa baisa waga kaivakaveka si kabokota. La valu kaligeila ila itobu mapilana Saidoni.

¹⁴“Isaka gala bikalisau minana ase, minawena ikanuwalai makwaisina kabokaidodiga guguwa.

¹⁵Mitaga igigisi mapilana valu kabovaiwasi saina bwaina. E makubilana kwabila saina bwainigaga. Mapaila itapopula ikau la koni matauna ivigaki makawala taitala towotetila la koni.

¹⁶“Dani igau bitokwaraiwaga baisa la tomota. E Dani dalela makawala avai dala avai dala mina Isireli dalesi.

¹⁷E Dani la bubunela makawala keiyuna kabala baisa osiusiula keda. E minana keiyuna nayayana kabala osiusiula keda. Minawena igau bigadi wosa kegadula kaikela, e availa matauna eisisu otapwala wosa bikapusi.

¹⁸“E Yaubada, mwa! Yeigu latutulaim wala m kwatumova.

¹⁹“Gada biyosisi wala matausina tolibulebu. Mitaga bogwa goli bitovila bibokavili matausina.

²⁰“Asera ola bagula bikabinai bitaiyau matala kaula, makwaina kaula bibodi gweguya kʹasi.

²¹“Napitalai matauna makawala natana dia bulukilova minawena tuta tuta bivilulu litula naminabwaita sainela.

²²“Yosepa matauna makawala ase bulukilova otalila utuwotu. Kaina makawala ase nagugwadi olilina koya.[97]

²³Kala tilaula bikabiliasi baisa matauna deli kasi leiya, e bibokavilaisi matauna deli kasi kaiyala.

²⁴Mitaga matauna kala kaiyala biyosikikiti, deli yamala kweyapapeula wala, metoya ola peula matauna Topeuligaga, Yekobe la Yaubada, matauna Toyamata sipi, e matauwena goli kala Tokwala Isireli.

²⁵E baisa tamam la Yaubada eipilasaim, e Yaubada matauna Topeuligaga bimitukwaiyaim. Bisakaim kuna metoya walakaiwa, deli utuwotu metoya osikowala pwaipwaia. Bisakaim bidubadu bulutuvalu deli litumwa.

²⁶Bisakaim kaula deli lala. Bisakaim tubumwa si koya, deli goli bisakaim vavagi makwaisina saina bwainigaga kasi gigisa metoya koya makwaisina kwetitovagasi. Ibodi mitakwai makwaisina bisisuaisi baisa Yosepa, e matauna Yaubada eikatupali metoya baisa tuwʹala bibani mitakwai makwaisina.

²⁷“Beniamina matauna makawala kaukwa ugiwagi nagigasisi, kaukwau deli koyavi ikikamati ilulupoli.”

²⁸Matausina Isireli dalela dililuwotala dilayu makawala avaka tumasi bogwa ilivala baisa matausina. E isaiki biga bobwailila deli la biga taloi taitala baisa taitala litula.

²⁹E Yekobe isaiki litula kasi karaiwaga ikaibiga, kawala, “Ka, tuta baisa yeigu balokaia ulo tomota baisa okaliga. Bukubakwaigusi deli tubugwa olumoulela lagi makwaina[98] olopola Epironi la kwabila guma Itai,

³⁰mapilana Makipela viluwela Mamira opilibomatu olumoulela mapilana Kenani. Eberaam omitibogwa eigimoli lagi makwaina deli goli baleku metoya baisa Epironi paila kasi laka.

³¹E baisa eibakwaisi Eberaam deli la kwava Sera. Baisa eibakwaisi Aisake deli la kwava Ribeka. Makawala goli yeigu tuvaila labaku Lea.

³²Eberaam igimoli makubilana deli lagi makwaina olopola kwabila metoya baisa mina Itai. E baisa goli bukubakwaigusi.”

³³Avai tuta Yekobe bogwa ivenoku la katuloluta baisa litula, ikenuvau tuvaila, e iwokuva la momova.