Read Kilivila VITOUULA 5 Bible Online

VITOUULA 5 - Kilivila bible

VITOUULA 5

¹Baisa yagasi matausina Adam tubula. (Avai tuta Yaubada eibubuli mina watanawa ibubuli makawala kala gigisa titoulela.

²Matauna ibubuli matausina tau deli vivila, ikabwaili matausina e idoki yagasi “Tomota.”)

³Avai tuta Adam kala taitu iboda 130, matauna iuni guditala latula tau magudina kala gigisa makawala titoulela, e ivabu yagala Seti.

⁴E igau Adam isisu tuvaila 800 taitu. E matauna tuvaila iunai litula,

⁵e kala taitu komwaidona iboda 930 matauna ikaliga.

⁶Avai tuta Seti kala taitu iboda 105, matauna iuni guditala latula tau, yagala Inosi,

⁷e igau isisu tuvaila 807 taitu. E matauna tuvaila iunai litula,

⁸e kala taitu komwaidona iboda 912 matauna ikaliga.

⁹Avai tuta Inosi kala taitu iboda 90, matauna iuni guditala latula tau, yagala Kenani,

¹⁰e isisu tuvaila 815 taitu. E matauna tuvaila iunai litula,

¹¹e kala taitu komwaidona iboda 905, matauna ikaliga.

¹²Avai tuta Kenani kala taitu iboda 70, matauna iuni guditala latula tau, yagala Maalaleli,

¹³e isisu tuvaila 840 taitu. E matauna tuvaila iunai litula,

¹⁴e kala taitu komwaidona iboda 910 matauna ikaliga.

¹⁵Avai tuta Maalaleli kala taitu iboda 65, e matauna iuni guditala latula tau, yagala Yaredi.

¹⁶E isisu tuvaila 830 taitu. E matauna tuvaila iunai litula,

¹⁷e kala taitu komwaidona iboda 895 matauna ikaliga.

¹⁸Avai tuta Yaredi kala taitu iboda 162 matauna iuni guditala latula tau, yagala Inoki,

¹⁹e isisu tuvaila 800 taitu. E matauna tuvaila iunai litula,

²⁰e kala taitu komwaidona iboda 962 matauna ikaliga.

²¹Avai tuta Inoki kala taitu iboda 65 matauna iuni guditala latula tau, yagala Metusela.

²²E Inoki isisu tuvaila 300 taitu, e iveyawa deli Yaubada. E matauna tuvaila iunai litula;

²³matauna kala taitu komwaidona iboda 365.

²⁴Matauna itugwali la tuta komwaidona deli wala Yaubada, e oluvi matauna itamwaumakava wala, paila Yaubada bogwa leikau matauna leilau.

²⁵Avai tuta Metusela kala taitu iboda 187, matauna iuni guditala latula tau, yagala Lameki,

²⁶e isisu tuvaila 782 taitu. E matauna tuvaila iunai litula

²⁷e kala taitu komwaidona iboda 969 matauna ikaliga.

²⁸Avai tuta Lameki kala taitu iboda 182, matauna iuni guditala latula tau,

²⁹e ikaibiga kawala, “Metoya pwaipwaia makwaina, makwaina goli Guyau eibuloti e gwadi magudina igau bikiminum komwaidona kada mmayuyusi metoya komwaidona da pwaitukulasi,” mapaila ivabu yagala Nowa.

³⁰Lameki isisu tuvaila 595 taitu. Matauna tuvaila iunai litula

³¹e kala taitu komwaidona iboda 777 matauna ikaliga.

³²Avai tuta Nowa kala taitu iboda 500, matauna iunai litula taitolu, yagasi Sem, Am, deli Yapeta.