Read Kilivila VITOUULA 9 Bible Online

VITOUULA 9 - Kilivila bible

VITOUULA 9

¹Yaubada ibigibwaili Nowa deli litula, ikaibiga, kawala, “Magigu bukuunaisi litumia bibidubadu e bidalasi bimiliaki valu watanawa komwaidona.

²Mauna nasigisagina deli nayoyowa, deli yena bikukolaimi. Komwaidona minasina wala mi kabokwaraiwaga.

³Baisa tuta gagabila bukukwatumkulovaisi uvagila kamkwam metoya wa bagula, e bukukwamsi deli viliona. Paila baisa tuta asakaimi komwaidona minasina bukuvigakaisi kʹami.

⁴Kwaitala wala vavagi viliona kabilibuyavi gala bukukomasi. Uula lasilibodaimi paila momova isisu obuyavi.

⁵Kidamwa avai tau bikatumati sola, matauna bibani mipuki. Kidamwa natana mauna bikamati tomota, bibani mipuki bikaliga.

⁶Paila yeigu Yaubada abubuli tomota makawala kaikobugu. Mapaila availa bikatumati taitala tomota, e sala bikeulasi lugwa bikatumataisi matauna.

⁷“Ibodi bukuunaisi litumia bibidubadu e tubumia bimiliaki valu watanawa komwaidona.”

⁸Yaubada iluki Nowa deli litula tauwau,

⁹kawala, “Baisa tuta bakabutu baisa yokomi deli tubumia,

¹⁰deli komwaidona bubuli kwemmomova mauna nayoyowa deli nasigisagina deli vavagi komwaidona eisunapulasi metoya wa waga deli yokomi.

¹¹Bakabutu baisa yokomi - metoya wa biga mabigasina, ka, akatotila kidamwa gala tuvaila bayogagi bubuli kwemmomova metoya odadoya, e gala tuvaila dadoya bikodidaimi valu watanawa.

¹²Baisa kabutuvitusila makwaina kabutu gala biwokuva baisa lavagi deli yokomi toyo bubuli kwemmomova,

¹³baisa tuta lasaili makaina lubakaidoga olowalowa e baisa kala kabutuvatusi ulo kabutu baisa valu watanawa.

¹⁴E avai tuta bamai lowalowa ovalu watanawa e bogwa bisisu lubakaidoga olowalowa,

¹⁵baluluwai ulo biga katotila baisa yokomi deli bubuli komwaidona kidamwa gala tuvaila bakatudoum bubuli komwaidona metoya odadoya.

¹⁶Avai tuta lubakaidoga bitokaia olowalowa e yeigu bagisi e baluluwai makwaina kabutu gala biwokuva avaka lakabutu deli bubuli komwaidona kwemmomova odabala pwaipwaia.

¹⁷Ka, baisa kabutuvatusi ulo biga katotila metoya baisa yeigu deli bubuli komwaidona ovalu watanawa.”

¹⁸E matausina Nowa litula isunapulasi metoya wa waga, yagasi Sem, Am, Yapeta. (Matauna Am latula yagala Kenani.)

¹⁹Matausina kasitaitolu litula Nowa dalesi idalasi ikaligiaki komwaidona valu watanawa.

²⁰Nowa matauna tobigubagula, e matauna goli tovaulabogwa matamna waini.

²¹E avai tuta matauna imom waini, baisa sopila peula, iwaiya kaibotutu e itaneku kala kwama e tokimwadu ikanukwenu ola bwala.

²²E avai tuta Am matauna tamala Kenani igisi tamala tokimwadu ikanukwenu, isunapula iluki sala.

²³Sem sola Yapeta ikauwaisi yatala kwama isailasi ovilavasi e itotuboulolasi ilokaisi tupwasi e ilokaiasi tumasi ivakanunuvaisi paila gala magisi bigisaisi tumasi tokimwadu.

²⁴Tuta makwaina Nowa ikaluyuvisi nanola ilagi avaka latula molagwadi ivigaki baisa matauna,

²⁵ikaibiga, kawala, “Abuloti Kenani. Ibodi matauna bitopaisewa baisa tuwala.

²⁶Bitayakawolaisi Guyau Sem la Yaubada. Sem bivigaki Kenani la topaisewa.

²⁷Ibodi Yaubada bivigaki Yapeta[22] tubula bidalasi. Ibodi tubula bisisuaisi deli Sem tubula. E Yapeta bivigaki Kenani la topaisewa.”

²⁸Dadoya bogwa leiwokuva e Nowa isisu iboda lakatutolu kweluwolima taitu.

²⁹Nowa kala taitu iboda lakatulima lakatuvasi kweluwolima e oluvi ikaliga wala.