Read Kilivila 2 GWEGUYA 15 Bible Online

2 GWEGUYA 15 - Kilivila bible

2 GWEGUYA 15

¹Olopola kweluwoyu kwailima kwaiyuwela kala taitu Yeroboam togudivau eiguguyau olopola Isireli, Usaia matauna Amasaia latula ivitouula iguyoi Yuda

²kala taitu tuta matutona iboda kweluwotala kwailima kwaitala, e matauna iguguyau olopola Yerusalem iboda kweluwolima kwaiyu taitu. Inala yagala Yekolaia ilela Yerusalem.

³Matauna ikikuli tamala la kedakeda, e saina iyomwasali Guyau nanola.

⁴Mitaga makatuposina leivigakaisi si kabotapwaroru baisa tokolu gala ikatudidaimi e tomota isetuwolaisi wala gibugabu lula deli goli kala gabu maiina simasimina metoya makatuposina.

⁵E Guyau imipuki Usaia iyosi kagwaiguya igugweimili wala ola momova komwaidona. Matauna isisu ola bwala kalamwaleta wala ikilavi komwaidona la karaiwaga, e latula yagala Yotam ikaraiwogi valu.

⁶E komwaidona avaka Usaia leivagi isisu obukila Liliusi Guyousi Yuda.

⁷Usaia ikaliga e ibakwaisi matauna okasi laka gweguya Debida ola Vilouveka, e latula Yotam ikaimapu iguyau.

⁸E olopola kweluwotolu kwailima kwaitolula kala taitu guyau Usaia eiguguyoi Yuda, e Sekaraia matauna Yeroboam togudivau latula ivitouula iguyoi Isireli, e iguguyau olopola Sameria iboda nalima natana tubukona.

⁹E makawala wala sala giyoububogwa, matauna imitugaga baisa Guyau. Matauna ibokuli la kedakeda gaga guyau Yeroboam matauna Nebati latula e ivakadi mina Isireli imitugagasi.

¹⁰E Salum matauna Yabesi latula ipogi baisa guyau Sekaraia, ikatumati matauna mapilana Ibileyam, e ikaimapuga matauna iguyau.

¹¹Vavagi komwaidona avaka Sekaraia eivagi iginaisi obukila Liliusi Guyousi Isireli.

¹²Mapaila biga katotila makwaina avaka Guyau Yaubada leivagi baisa guyau Yeu ikaloubusi makawala. “Dalem biguguyausi wala olopola Isireli biuvalutu bila tubwa tubuvasila."[10]

¹³Olopola taitu kweluwotolu kwailima kwaivasila guyau Usaia eiguguyoi Yuda, Salum matauna Yabesi latula ivitouula iguyau olopola Isireli e iguguyau olopola Sameria iboda natana wala tubukona.

¹⁴E Menaem matauna Gadi latula isilavi valu Tesa ila Sameria, ikatumati Salum e ikaimapu iguyau.

¹⁵Komwaidona avaka Salum leivagi deli goli la kedakeda pogi, isisu obukila Liliusi Guyousi Isireli.

¹⁶Tuta makwaina Menaem eisilavi Tesa bila Sameria, matauna ikodidaimi valu Tapuwa e ikatudoum tomotela, deli goli valu mapilasina opapala, paila uula tomotela gala itaimelusi baisa matauna. Matauna tuvaila goli itapusegi luposi komwaidona vivila nasusuma.

¹⁷Olopola kweluwotolu kwailima kwaivasila kala taitu guyau Usaia eiguguyoi Yuda, Menaem matauna Gadi latula ivitouula iguyau olopola Isireli, matauna iguguyau olopola Sameria iboda kweluwotala taitu.

¹⁸Matauna imitugaga baisa Guyau ibokuli la kedakeda doudoga Yeroboam matauna Nebati latula, matauna ola momova komwaidona eivakadi mina Isireli eimitugagasi.

¹⁹Tigilati Pilesa guyoula Asiria isugigai Isireli e Menaem isaiki matauna siliba saina bidugaga mokaila makawala kwailuwotolu kwaivasi tani (34 tani) bivigaki gimolela paila bikatupewoli Menaem la karaiwaga bipeula ovalu mapilana.

²⁰Mani magulona Menaem leibani metoya ola kominimani baisa mina Isireli matausina bidubadu si mani ikaraiwogi taitala taitala matausina bisaili kala vilavila kweluwolima siliba. Mapaila Tigilati Pilesa ikaimilavau ola valu.

²¹Komwaidona avaka Menaem leivagi isisu obukila Liliusi Guyousi Isireli.

²²Matauna ikaliga e ibakwaisi, e latula yagala Pekaia ikaimapu iguyau.

²³E olopola kweluwolimela taitu eiguguyau Usaia matauna guyoula Yuda, e Pekaia matauna Menaem latula eivitouula iguyoi Isireli, e iguguyau olopola Sameria iboda kwaiyu taitu.

²⁴Matauna imitugaga baisa Guyau ibokuli wala la kedakeda doudoga guyau Yeroboam matauna Nebati latula ivakadi mina Isireli imitugagasi.

²⁵Taitala Pekaia la kumatoula yagala Peka matauna Remalia latula, deli tailuwolima tauwau tolesi Giliadi ikeiwalasi ilosi ikatumataisi Pekaia olumoulela ligisa olopola Sameria, e matauna ikaimapu iguyau.

²⁶Vavagi komwaidona Pekaia avaka eivagi iginaisi ila obukila Liliusi Guyousi Isireli.

²⁷Olopola kweluwolima kwaiyuwela kala taitu guyau Usaia eiguyoi Yuda, e Peka matauna Remalia latula ivitouula iguyau olopola Isireli, e iguguyau olopola Sameria iboda kweluwoyu taitu.

²⁸Matauna imitugaga baisa Guyau, ibokuli la kedakeda doudoga guyau Yeroboam matauna Nebati latula, matauna eivakadi mina Isireli imitugagasi.

²⁹Tuta matutona Peka igau wala eiguguyau e Tigilati Pilesa matauna guyoula Asiria iyouli mavilousina viluwesi Iyoni, Eibeli Beti Maaka, Yanowa, Kedesi, deli Asora, e mavilousina viluwesi Giliadi, Galili, deli Napitalai, e ivayouli tomota ivigaki tokatupipi ilau Aisiria.

³⁰E olopola kweluwoyuwela kala taitu Yotam matauna Usaia latula eiguyoi Yuda, e Osea matauna Ela latula ikeiwali Guyau Peka, ikatumati matauna, e ikaimapu matauna iguyau.

³¹Vavagi komwaidona avaka Peka eivagi iginaisi obukila Liliusi Guyousi Isireli.

³²Olopola kweyuwela kala taitu Peka matauna Remalia latula eiguguyau Isireli e Yotam matauna Usaia latula ivitouula iguyau olopola Yuda

³³matauna kala taitu tuta makwaina kweluwoyu kwailima; matauna iguguyau olopola Yerusalem iboda kweluwotala kwailima kwaitala taitu. Matauna inala yagala Yerusa minana Sadoki latula.

³⁴Yotam ibokuli la kedakeda tamala Usaia, e ivagi avaka iyomwasali Guyau nanola.

³⁵Mitaga makatuposina leivigakaisi si kabotapwaroru baisa tokolu gala ikatudidaimisi, e tomota isetuwolaisi wala gibugabu lula deli maiina simasimina metoya baisa. E Bwala Kwebumaboma Kalapisilela Opiliyavata matoulela Yotam eikaliai.

³⁶Komwaidona avaka Yotam leivagi isisu obukila Liliusi Guyousi Yuda.

³⁷Ola tuta wala igau eiguguyau Guyau Yaubada iwitalibogwi Resini guyoula Siria deli Peka guyoula Isireli bikabiliaisi Yuda.

³⁸Yotam ikaliga e ibakwaisi okasi laka gweguya Debida ola Vilouveka, e latula Eyasi ikaimapu iguyau.