Read Kilivila 1 LILIU 16 Bible Online

1 LILIU 16 - Kilivila bible

1 LILIU 16

¹Matausina ikauwaisi Kabutu Didawogala ilauwaisi isewoyasi obuliyoyova makwaina Debida bogwa leikatubiasi. Oluvi isemakaiyaisi kalubaila semakaila deli igabusi lula baisa Yaubada.

²Avai tuta Debida eivenoku katubaiasa semakavi, matauna ibigibwaili tomota oyagala Guyau

³e ivili kaula baisa oluwalaisi komwaidosi tomota. Komwaidona tomotala Isireli ikulasi kasi vilavila kwaitala beredi kuwotala viliona leigabwaisi, deli bukotala uwala waini.

⁴Debida iluki mimilisi mina Libai paila bikugwaiyaisi kala tapwaroru Guyau Isireli la Yaubada omatala Kabutu Didawogala, metoya biusiwosisi deli biyakawolaisi matauna.

⁵Asapi inagaisi matauna bikugwa deli Sekaraia matauna kala topilasi. E matausina Yeieli, Semiramoti, Yeyeli, Matitia, Eliabi, Benaia, Obedi Edom, deli Yeieli matausina towawai gita. Asapi matauna tokatubabila sasani,

⁶deli taiyu tolula, Benaia sola Yaasieli matausina toyuvisi tauya omatala Kabutu Didawogala.

⁷E wa tuta matutona Debida isaiki Asapi deli sala mina Libai si koni paila biusiwosisi kala yakaula Guyau.

⁸Bitanokagutoki baisa Guyau, e bitakamitulaisi matauna Tovakaigaga; bitalukwaisi boda ituwoli ituwoli avaka avaka eiuvagi.

⁹Bitawosisi kala yakaula Guyau; bitalivalasi makwaisina vavagi kabokatubau avaka avaka eiuvagi.

¹⁰Bitamwasawasi paila eivigakaidasi la vavagi goli; ibodi komwaidosi availa availa ititapwarorusi baisa matauna bimwasawasi!

¹¹Bitalokaiasi Guyau paila pilasi e tuta komwaidona bitatapwarorusi baisa matauna.

¹²E yokomi tubula Yekobe, matauna Yaubada la touwata, e yokomi tubula Isireli, matauwena Yaubada einagi, bukululuwaisi makwaisina kabutuvatusi eiuvagi Yaubada, deli bukululuwaisi la yakala makwaisina.

¹⁴Guyau matauna da Yaubadasi; matauna la karaiwaga duwosisia isisu paila komwaidosi mina watanawa.

¹⁵Gala bitalumwelavaisi Yaubada la kabutu, makwaina leivagi paila bikanuvagasi goli.

¹⁶Kabutu makwaina bivagi makawala baisa Eberaam, e la biga katotila baisa Aisake.

¹⁷Guyau eikabutu deli Yekobe, e baisa goli bikanigaga.

¹⁸Kawala, “Bogwa basakaim makubilana Kenani, e bukuvigaki m vavagi tatoum.”

¹⁹Omitibogwa Yaubada la tomota gala ibawasi e isisuaisi tomitawasi wala mapilana Kenani.

²⁰Iwowausi wala avai valu avai valu e deli avai kabokaraiwaga avai kabokaraiwaga.

²¹Mitaga Yaubada gala itagwala availa bilamidadi matausina; magila bikoli matausina e mapaila ikamitilaki gweguya;

²²kawala, “Taga kuyogagaisi matausina ulo towotetila bogwa lanagi. Taga kukwabikonaisi matausina ulo tovitoubobuta.”

²³Komwaidomi mina watanawa, kuwosisi baisa Guyau! Yam kwaitala kwaitala bukukwamitulaisi bulogala bwaina paila matauna bogwa eikolaidasi.

²⁴Kukwamitulaisi la guyugwayu baisa boda ituwoli ituwoli; deli vavagi topilaveka baisa komwaidona tomota.

²⁵Guyau matauna toveka, e ibodi kala yakaula saina kwaiveka, bibodi kala taimamila odubasi komwaidona yaubada.

²⁶Boda ituwoli ituwoli si yaubada tokoluwokuva wala mitaga da Guyausi eibubuli labuma komwaidona.

²⁷Kala kalugologusa visigala saina guyugwayu sainela isisu baisa matauna. Peula deli mwasawa ikasewoki la Bwala Kwebumaboma.

²⁸Komwaidomi mina watanawa bukuyakawolaisi Guyau, bukuyakawolaisi kala katububula deli la peuligaga.

²⁹Bukuyakawolaisi matauna Guyau Toguyugwayu; deli mi semakavi bukusuvisi ola Bwala Kwebumaboma. Avai tuta matauna Tobumaboma biyoumatila, bukukwavaginasi baisa omatala.

³⁰Komwaidomi mina watanawa! Bukutatuvasi omatala matauna, valu watanawa itotu peula okabala e gala gagabila biyega.

³¹Bukumwasawasi, valu watanawa deli labuma! Kulukwaisi boda komwaidona Yaubada matauna Guyau.

³²Bolita, kukwaipolu deli bubuli komwaidona olumoulela kuguvavilasi, kumwasawasi, bagula makwaisina, deli vavagi komwaidona olumoulemi!

³³Kai makaisina olawodila bidousi deli si mwasawa avai tuta Guyau bima paila biguyoi valu watanawa.

³⁴Kunokagutokisi baisa Guyau, paila uula matauna giyoubwaila la yebwaili bikanigaga.

³⁵Bukulukwaisi matauna, kawami, “Mwa! Guyau ma Yaubadasi, kukolaimasi, e kukwaimilivauwaimasi metoya oluwalaisi boda tuwoli tuwoli, e gagabila bakanokagutokisi deli bakayakawolaimsi yoku Tobumaboma.”

³⁶Kala yakaula Guyau, matauna mina Isireli si Yaubada. Kuyakawolaisi matauna tuta baisa deli tuta gala biwokuva! E tomota komwaidona ikaibigasi kawasi, “Emeni,” e iyakawolaisi Guyau.

³⁷E guyau Debida ivigaki Asapi deli sala mina Libai si koni kwekanuvagasi paila bikaraiwagasi tapwaroru makwaina leiuvagaisi makatupona ambaisa Kabutu Didawogala eikanukwenu. Matausina bivagaisi si paisewa yam kwaitala kwaitala.

³⁸Obedi Edom matauna Yedutuni latula deli tailuwolima tailuwotala tailima taitolu tauwau metoya odalela bipilasaisi matauna. Osa deli Obedi Edom matausina tokaraiwogasi paila kala yamata kalapisila komwaidona.

³⁹E Sadoki tolula deli sala wala tolula, matausina tokaraiwogala tapwarorula Guyau mapilana Gibioni si kabotapwaroru.

⁴⁰Kaukwau deli koyavi kwaitala kwaitala bigigabwaisi lula namwaidona wala okabogwabu lula makawala karaiwogala kala ginigini isisu obukila karaiwaga mapilana Guyau leisaiki mina Isireli.

⁴¹E deli itotusi Emani sola Yedutuni deli goli mimilisi tuvaila bogwa leinagaisi paila biusiwosisi Guyau kala yakaula, paila la yebwaili kwekanuvagasi.

⁴²Emani sola Yedutuni tuvaila tokaraiwogala paila tauya sasani deli goli komwaidona guguwala mwasawa makwaisina biwaisi avai tuta biusiwosisi wosila yakaula. E Yedutuni dalela matausina tokwaraiwogala paila kalapisila komwaidona.

⁴³Oluvi komwaidona ilosi osi bwala. Debida tuvaila ikaimilavau ola bwala paila bisisu mimilisi wala tuta deli litula.