Read Kilivila 1 LILIU 23 Bible Online

1 LILIU 23 - Kilivila bible

1 LILIU 23

¹Avai tuta Debida bogwa leitomoya matauna ivigaki latula Solomoni iguyoi Isireli.

²E guyau Debida imai komwaidona tokugwala Isireli deli tolula toyo mina Libai gulitinidesi.

³Matauna ikalau kasi bawa mina Libai tauwau kasi taitu kweluwotolu kaina bila walakaiwa. E kasi bawa ibodi 38,000.

⁴E guyau inagi 24,000 bikugwaiyaisi wotitalela Bwala Kwebumaboma, 6,000 biginaisi liliula deli bikiduwosisiaisi sula,

⁵4,000 toyamata Bwala Kwebumaboma, e 4,000 biyakawolaisi Guyau metoya guguwela mwasawa komwaidona avaka guyau eisisaiki matausina paila wotetila makwaina.

⁶Debida ivili mina Libai iboda budotolu, metoya odalesi titoulesi. Gerisoni, Kowati, deli Merari dalesi.

⁷Gerisoni litula kasitaiyu. Ladani sola Simei.

⁸E Ladani litula kasitaitolu. Yeyeli, Setam, deli Yoweli.

⁹Matausina tommoyesi dala madilasina tubusi leikitetilasi metoya baisa Ladani. (Simei litula kasitaitolu. Selomoti, Asieli, deli Erana.)

¹⁰Simei litula kasitaivasi. Yaata, Sina, Yeusa, deli Beria, molitomoya eila molagwadi baisa makawala livalesi. Yeusa sola Beria gala ibawasi dalesi, mapaila matausina ikalumgolaisi dalesi ivigaki dilatala wala.

¹²E Kowati litula taivasi. Amram, Isa, Ebironi, deli Usieli.

¹³La kuluta Amram litula Eroni sola Mosese. (Eroni deli dalela ikatupalaisi matausina tokaraiwogala vavagi kwebomaboma tuta gala biwokuva, bigibugabusi maiina simasimina osi tuta tapwaroru baisa Guyau, biwotitalaisi matauna, deli bikabwailisi tomota metoya Guyau oyagala.

¹⁴Mitaga Mosese matauna Yaubada la touwata, litula goli ikalumgolaisi deli mina Libai.)

¹⁵Mosese litula taiyu, Gerisom sola Eliesa.

¹⁶E Gerisom litula kasi tokugwa Sebweli.

¹⁷Eliesa latula taitala wala yagala Reabia, mitaga Reabia dalela saina bidugaga.

¹⁸E Kowati latula taiyuwela, yagala Isa, e latula taitala yagala Selomiti, matauna tomoyela dala.

¹⁹Kowati latula taitolula, yagala Ebironi, litula kasitaivasi. Yeria, Amaria, Yeasieli, deli Yekameyam.

²⁰Kowati latula taivasila, yagala Usieli, litula taiyu, Maika sola Isia.

²¹Merari litula taiyu Mali sola Msi. Mali litula taiyu, Eleasa sola Kisa,

²²mitaga Eleasa litula vivilawokuva wala gala tauwau, e matauna ikaliga. E litula vivila ivaiyasi lusitaia obuyavi, matausina Kisa litula. (Baisa tumasi bodala litula tauwau.)

²³Merari latula taiyuwela, yagala Msi, litula taitolu, Mali, Ederi, deli Yeremoti.

²⁴Baisa makawala Libai tubula metoya dala deli nunu komwaidosi. E yagasi kala ginigini isisu wala. E taitala taitala kasi taitu kweluwoyu bila walakaiwa, isim wala si paisewa metoya Guyau la Bwala Kwebumaboma wotitalela.

²⁵Debida ikaibiga kawala, “Guyau Isireli la Yaubada bogwa eivigaki la tomota eiluva uwosi, e matauna titoulela bisivagasi Yerusalem tuta gala biwokuva.

²⁶E mina Libai gala tuvaila bikaiki uwosi kaitakewa Guyau la Buliyoyova deli guguwa komwaidona makwaisina leiwotitalaisi otutala tapwaroru.”

²⁷Debida la katuloluta kala vigimkoila baisa komwaidona mina Libai ibudoki paila paisewa avai tuta kasi taitu bibodi kweluwoyu,

²⁸e isakaisi si koni paila bipilasaisi tolula metoya Eroni odalela paila olumoulela Bwala Kwebumaboma wotitalela tapwaroru paila biyamataisi bikubakula Bwala Kwebumaboma deli matabudosina eikalitulaisi olumoulela, e isim kasi karaiwaga taga biyogwalaisi guguwala komwaidona kwebumaboma.

²⁹Tuvaila biyamataisi beredi bisemakavaisi baisa Yaubada, pwarawa bivigakaisi si semakavi, tutuba bigabwaisi gala deli kala yisi, deli semakavi kwegibugabu, deli pwarawa bikepupolaisi toyo olibe bulamila, e bivisaikolaisi deli bikalawasi kala mokaila deli kala bidubadu Bwala Kwebumaboma semakavila;

³⁰biyakaulasi deli bikavisaisi Guyau kaukwau kwaitala kwaitala deli goli koyavi kwaitala kwaitala

³¹avai tuta semakavi makwaisina paila Guyau bigabwaisi wa yam Sabate, Navau Tubukona Pakala, deli goli kasi paka titoulesi. Karaiwaga ibubulaisi bikibuboti taivila kasi bawa mina Libai isakaisi bivagaisi wotetila makwaisina tuta kwaitala kwaitala. E mina Libai komwaidosi si wotetila paila wala bitapwarorusi baisa Guyau tuta komwaidona.

³²Matausina leisakaisi si koni paila biyamataisi Guyau la Buliyoyova deli Bwala Kwebumaboma, deli bipilasaisi veisia tatousi, matausina tolula Eroni dalela, avai tuta bikugwaiyaisi tapwaroru olumoulela Bwala Kwebumaboma.