Read Kilivila 1 LILIU 9 Bible Online

1 LILIU 9 - Kilivila bible

1 LILIU 9

¹Komwaidona tomotala Isireli livalesi leitakasaisi dalela dalela livalesi bogwa leiginaisi osi buki Bukila Guyousi Isireli. E tomotala Yuda leikatupipaisi leiwaisi mapilana Babiloni baisa ibanaisi kasi mipuki paila si mitugaga.

²Mabudosina itomatalasi ikaimilavausi osi valu tatousi baisa mina Isireli, tolula, mina Libai deli Bwala Kwebumaboma towotitalela.

³E mina Yuda, dalesi Beniamina, Epereim, deli Manasa ilosi isilaisi Yerusalem.

⁴E Yuda dalela eisisuaisi Yerusalem nunu kwaitala kwaitala kasi bawa lakatulima lakatutala kweluwolima kweluwovasi. Yuda latula Peresi, e Peresi dalela tomoyela Utai matauna latula Amiuda e tabula Omri. E Utai tubula taiyu tuvaila Imri deli Bani. E Yuda latula Sela dalela kasi tokugwa yagala Asaia, matauna deli tomoyela nunu makwaina. E taitala tuvaila Yuda latula Serai dalela taitala yagala Yeueli matauna kasi tokugwa.

⁷Tuvaila Beniamina dalela matausina eisisuaisi Yerusalem. Salu matauna Mesulam latula, Mesulam matauna Odavia latula, e Odavia matauna Asenuwa latula Ibineiya matauna Yeroam latula Ela matauna Usisi latula Mikiri tabula Mesulam matauna Sepatia latula, e Sepatia Reueli latula, Reueli matauna Ibinia latula.

⁹E dala madilana eisisuaisi baisa nunu kasi bawa lakatulima lakatuvasi kweluwolima kwailima kwaitala. E komwaidona matausina yagasi eiginaisi walakaiwa matausina tommoyesi dala madalasina.

¹⁰Baisa tolula matausina leisisuaisi olopola Yerusalem. Yedaia, Yeoyaribi, deli Yakini Ilikaia latula Asaraia (matauna tokaraiwogala Bwala Kwebumaboma), e deli tubula Mesulam, Sadoki, Meraioti, deli Aituba Adaia matauna Yeroam latula, e deli tubula Pasuru, sola Malikia Maasai matauna Adieli latula, e tubula Yasera, Mesulam, Mesilemiti, deli Imera.

¹³E tolula matausina tommoyela dala madalasina kasi bawa 1,760. Matausina tokabitutuki komwaidona paisewa olumoulela Bwala Kwebumaboma.

¹⁴Baisa yagasi matausina mina Libai eisisuaisi Yerusalem. Semaia matauna Asubi latula, matauna tabula Asirikam sola Asabia odalela Merari Bakibaka, Eresa, deli Galali Matania matauna Mika latula, tubula Sikiri sola Asapi Obedaia matauna Semaia latula, tubula Galali sola Yedutuni Berekia, matauna Asa latula e Elikana tubula, matauna eisisu olopola kabokaraiwagela mapilana valu Netopa.

¹⁷Baisa makawala toyamatesi Bwala Kwebumaboma isisuaisi Yerusalem. Salum, Akubi, Talimoni, deli Aimani. Salum matauna kasi tokugwa.

¹⁸Omitibogwa leima tuta matutona dala madilasina toyamatesi kabosusuvi mapilana opilibomatu biloula Guyau ola Kapisila. Tuta omitibogwa matausina toyamatesi kalapisila bilokaia mina Libai si valu.

¹⁹Salum matauna Kore latula e tabula Ebiasapi, deli sala odalela Kora, matausina si koni toyamatesi kabosusuvi biloula omatala Guyau la Buliyoyova, makawala tubusia tuta omitibogwa leivigakaisi avai tuta matausina eiyamataisi Guyau la kabosikaiwa.

²⁰E Peniasi matauna Eleasa latula matauna omitibogwa kasi tokaraiwaga. Wa! Ibodi Guyau bimitukwaii matauna.

²¹Meselemia latula Sekaraia matauna tuvaila taitala toyamatela kalapisilela Guyau la Buliyoyova.

²²E kasi bawa komwaidona lakatuyu tailuwotala taiyu leinagaisi paila toyamatesi kalapisila deli kabosusuvi. Yagasi leiginaisi deli yagasi si valu ambaisa mesisikaisi. Baisa guyau Debida sola tovitoubobuta Samwela eisakaisi tubusia si koni paila wotetila makwaisina.

²³Matausina deli dalesi tuta baisa bisisetuwolaisi wala si wotetila kala yamata kalapisilela Bwala Kwebumaboma.

²⁴Kwaitala kalapisila ikoulakaiwa opiliyavata, kwaiyuwela opilibolimila, kwaitolula opilibomatu, kwaivasila opilikwaibwaga kalapisila, kwaitala kwaitala makwaisina isim toyamatesi.

²⁵Toyamata matausina kasi topilasi veisia wala eisisuaisi ovalu mavilousina katitaikina e taitala taitala matausina la tuta biyamata sivatala olopola kwailima kwaiyu yam.

²⁶Taivasi matausina mina Libai toyamata kasi tokaraiwaga e isim kasi pakula wotetila makwaina. Matausina si koni tuvaila biyamatasi matabudosina eikalitulaisi wa Bwala Kwebumaboma deli goli guguwala komwaidona olumoulela matabudosina.

²⁷Matausina si bwala katitaikinela Bwala Kwebumaboma, baisa si koni paila biyamataisi deli biulaimsi kalapisila kaukwau kwaitala kwaitala.

²⁸Mimilisi mina Libai si koni biyamataisi guguwa makwaisina leiuwotetilasi otutala tapwaroru. Tuta komwaidona bisunupuloiyaisi makwaisina bikalawaisi e avai tuta bikaimilivauwaisi bikalauvauwaisi tuvaila.

²⁹Mimilisi tuvaila isim si koni biyamataisi guguwa kwebumaboma, deli goli pwarawa, waini, olibe bulamila, guguwala lula maiina simasimina deli vana.

³⁰Mitaga paila vana kala kenevigoli baisa tolula wala si paisewa.

³¹Taitala guma Libai yagala Matitia, matauna Salum la kuluta, odalela Kora, matauna kala karaiwaga bikikatubaiasa semakavi kweminumenu.

³²E tomota metoya Kowati odalela si paisewa bikikatubaiasasi kaula kwebumaboma paila Bwala Kwebumaboma Sabate kwaitala kwaitala.

³³Mimilisi Libai dalela si paisewa paila biusiwosisi wosila Bwala Kwebumaboma. E dala madalasina tommoyela isigagasi olumoulela matabudosina wa Bwala Kwebumaboma e gala itoyemwa si paisewa paila uula kasi dou paila biwotetilasi avai kala kalu wa yam, deli bogi.

³⁴Tauwau matausina yagasi isisu walakaiwa tommoyela dala Libai, makawala leikitetilasi metoya otubusia. Matausina goli tokugwa tuta komwaidona leisisuaisi olumoulela Yerusalem.

³⁵Yeieli totai valu Gibioni e isiki mavilouna. Matauna la kwava yagala Maaka.

³⁶Matauna la kuluta tau yagala Abidoni, e litula tuvaila yagasi Sura, Kisa, Beali, Nera, Nadaba,

³⁷Gedori, Aiyo, Sekaraia, deli Mikiloti,

³⁸matauna Simeya tamala. Matausina dalela isisuaisi Yerusalem katitaikinela mimilisi veisia metoya okasi kumila titoulesi.

³⁹Nera latula Kisa, e Kisa latula Saulo. E Saulo litula taivasi. Yonatani, Malikisuwa, Abinadaba, deli Esibeali.

⁴⁰Yonatani latula Meribeali, e Meribeali latula Maika.

⁴¹Maika litula taivasi. Pitoni, Meleki, Tarea, deli Eyasi.

⁴²Eyasi latula Yara, matauna litula taitolu. Alemeti, Asimaveta, deli Simri. E Simri latula Mosa,

⁴³e Mosa latula Binea, Binea latula Repaia, Repaia latula Eleasai, e Eleasai latula Aseli.

⁴⁴Aseli litula tailima taitala. Asirikam, Bokeru, Isimeili, Searia, Obedaia, deli Anana.