Read Kilivila 2 LILIU 5 Bible Online

2 LILIU 5 - Kilivila bible

2 LILIU 5

¹Avai tuta guyau Solomoni ivigimkulovi komwaidona paisewala Bwala Kwebumaboma, matauna ikedidagi komwaidona guguwa makwaisina tamala Debida leikabomi baisa Guyau isaili olumoulela matabudosina Bwala Kwebumaboma bwaimala - makwaisina siliba, goula, deli avai vavagi tuvaila.

²Oluvi Guyau Solomoni iluki komwaidona tokugwala Isireli bilosi Yerusalem paila bikauwaisi Guyau la Kabutu Didawogala metoya Saiyoni, mavilouna goli Debida la Vilouveka, bilauwaisi wa Bwala Kwebumaboma.

³Komwaidosi isigugulasi otutala Buliyoyova Pakala.

⁴Avai tuta tokugwa komwaidosi eitogugulasi, oluvi mina Libai ilupaisi Kabutu Didawogala

⁵e ikatikewaisi ilauwaisi wa Bwala Kwebumaboma. E tuvaila tolula deli mina Libai isupeilisi Guyau la Buliyoyova deli goli komwaidona guguwela ilauwaisi wa Bwala Kwebumaboma.

⁶E Guyau Solomoni deli komwaidosi tomotala Isireli isigugulasi omatala Kabutu Didawogala ilulasi sipi deli bulumakau saina bidugaga sainela, gala ibodi bitakalau.

⁷E oluvi tolula ikauwaisi Guyau la Kabutu Didawogala ikovisuyaisi wa Bwala Kwebumaboma e isailisi olumoulela matabudona Bomikikila Sainela osikowasi minasina mauna leiyoudulaisi isim pinupanesi.

⁸E pinipanesi mapilasina leikatuvakaiyaisi ikapoli Didawaga makwaina deli kaitikewala.

⁹E kidamwa availa bitoli omatala matabudona Bomikikila Sainela igagabila wala bigisi kaitakewa matala makaisina mitaga gala wala ambaisa tuvaila. (E kaitakewa makaisina tuta baisa goli leisisu wala.)

¹⁰E Kabutu Didawogala makwaina gala wala avai vavagi isisu olumoulela mesinaku wala mapilasina pilayu dakuna Mosese bogwa leisaili wa Koya Sinai, avai tuta Guyau leivagi kabutu deli mina Isireli tutala leigalasi leimaisi metoya mapilana Itipita.

¹¹E komwaidona tolula imaisi avai boda wala osi boda eisisuaisi komwaidosi wala imaisi gulitinidesi, matausina bogwa eikikilaisi titoulesi. E komwaidona mina Libai towaisi gita, toyuvisi loloni yagasi - Asapi, Emani, Yedutuni, deli goli komwaidona dalesi matausina kasi karekwa yakakaraia. Mina Libai itolisi katitaikina kabogwabu lula mapilana opilibomatu oyumasi iyosisi sasani, gita, e deli goli tolula kasi bawa tailakatutala tailuwoyu iyuvaisi tauya. Towosi isaigogulasi wala deli tauya, sasani, deli goli avai butula avai butula, matausina iyakawolaisi Guyau iusiwosisi kawasi. “Kala yakaula Guyau, paila uula matauna saina bwaina, e matauna la yebwaili kwekanigaga.” Tuta matutona tolula isisilavaisi Bwala Kwebumaboma, e saina nanakwa pilatala lowalowa saina guyugwayu ivivivila deli Guyau la guyugwayu ikuboli Bwala Kwebumaboma, e gala gagabila bisetuwolaisi si tapwatapwaroru.