Read Kilivila NIEMAIA 3 Bible Online

NIEMAIA 3 - Kilivila bible

NIEMAIA 3

¹Baisa makawala eikaliivauwaisi kalila valu. E Tolula Toveka yagala Eliasibi deli sala tolula wala ikaliivauwaisi Kalapisila Sipi, ikabomaisi makwaina, e ivitomiliwolaisi tabodala kalapisila. E ivitouulasi ikaliivauwaisi kalila valu metoya kalapisila yagala Sipi isuyewaisi obolela vatoi yagala Lakatutala, e ilauwaisi ivitobwaisi obolela vatoi yagala Ananeli, e ikabomaisi makatupona.

²E mina Yeriko isaisi katupotala tuvaila. Sakura matauna Imri latula isai katupotala tuvaila.

³E Asena dalela ikaliaiisi Kalapisila Yena. Matausina ilavaisi yobilabala e ivitomiliwolaisi tabodala kalapisila, e ibubulaisi buluvala metoya tanumnumta wala.

⁴Meremoti matauna Uraia latula tabula Akosi, isai katupotala. E Mesulam matauna Berekia latula tabula Mesesabeli isai katupotala tuvaila. Sadoki matauna Baana latula isai katupotala tuvaila.

⁵E mina Tekowa isaiyaisi katupotala tuvaila, mitaga kasi tokugwa ipakaisi bipilasaisi paisewa makwaina avaka tokaraiwaga einagaisi kasi vilavila bivagaisi.

⁶E Yoiada matauna Pasea latula sola Mesulam matauna Besodea latula ikaliivauwaisi Kalapisila Yesana.[6] Matausina ilavaisi yobilabala e ivitomiliwolaisi tabodala kalapisila, e ibubulaisi buluvala metoya tanumnumta wala.

⁷Melatia matauna guma Gibioni, e Yadoni matauna guma Meronoti, e deli goli mina Gibioni mina Misipa isaiyaisi katupotala tuvaila, e iiyosisi wala ilauwaisi ivitobwaisi ola bwala tokaraiwogala Yupereiti Opilikwaibwaga.

⁸Usieli matauna Araia latula, matauna taitala goula toyoudulela isai katupotala tuvaila. E Ananaia matauna bulami togabula kaisimasimina isai katupotala tuvaila, iiyosi wala ilau ivitobu makatupona kali yagala Katupobeiyaya.

⁹Repaia matauna Ura latula, matauna tokaraiwogala kabulotala Yerusalem la kabokaraiwaga matauna isai katupotala tuvaila.

¹⁰Yedaia matauna Arumapi latula, matauna isai katupotala tuvaila, makatupona opapala wala la bwala titoulela. Atusi matauna Asabineia latula, matauna isai katupotala tuvaila.

¹¹Malikia matauna Arim latula sola Asubi matauna Peati Mowabi latula isaiyaisi katupotala tuvaila deli ikaliaiisi bolela vatoi yagala Kailagila.

¹²Salum matauna Alowesi latula, matauna tokaraiwogala kabuloyuwela Yerusalem la kabokaraiwaga, matauna isai katupotala tuvaila. (Litula vivila ipilasaisi ipaisewasi deli.)

¹³Anuni deli mina Sanowa ikaliivauwaisi Kalapisila Itayatila. E ivitomiliwolaisi tabodala, e ibubulaisi buluvala metoya tanumnumta wala, e iiyosisi wala kaliai ilauwaisi ivitobwaisi Kalapisila Wawa, kala maloula makawala kubilatala kwabila.

¹⁴Malikia matauna Rekabi latula, matauna tokaraiwogala kabokaraiwaga Beta Akerem, matauna ikaliivau Kalapisila Wawa. Matauna ivitomiliwoli tabodala, e iyouduli buluvala metoya tanumnumta wala.

¹⁵Salum matauna Kolosei latula, matauna tokaraiwogala kabokaraiwaga Misipa, matauna ikaliivau Kalapisila Sopi Kegiposisi. Matauna ikaliivau kalipisila e itomiliwoli tabodala deli iyouduli buluvala metoya tanumnumta wala. E ivitouula wa Sopi Sela matauna ikaliivau kali opapala gweguya si buyagu, e iiyosi wala ilau ivitobu wa daga bibubusi metoya Debida ola Vilouveka.

¹⁶Niemaia matauna Asabuki latula, matauna tokaraiwogala kabulotala Betisuri la kabokaraiwaga, isai katupotala tuvaila, iiyosi wala ilau ivitobu Debida okala laka, wa sopi, deli obolesi vaiwasi.

¹⁷Baisa yagasi mina Libai matausina eikaliivauwaisi katupovila tuvaila kalila valu. Reum matauna Bani latula isai katupotala tuvaila; Asabia matauna tokaraiwogala kabulotala Keila la kabokaraiwaga isai katupotala tuvaila, e ipaisewa oyagalaga la valu;

¹⁸Matauna Babai, Enadada latula, e matauna tokaraiwogala kabuloyuwela Keila la kabokaraiwaga, isai katupotala tuvaila;

¹⁹Esa matauna Yesuwa latula, matauna tokaraiwogala Misipa isai katupotala tuvaila, makatupona omatala bolela kabilia guguwala. Iiyosi wala ilau ivitobu owokulu;

²⁰Baruki matauna Sabai latula isai katupotala tuvaila, ivitouula okalapisila biloula ola bwala Eliasibi matauna Tolula Toveka;

²¹Meremoti matauna Uraia latula, e tabula Akosi isai katupotala tuvaila, iiyosi wala ilau ivitobu ola pwasosiu Eliasibi.

²²Baisa yagasi tolula matausina eikaliivauwaisi katupovila tuvaila kalila valu. Tolula matausina eisipitalaisi Yerusalem eisaiyaisi katupotala tuvaila.

²³Beniamina sola Asubi isaiyaisi katupotala tuvaila, makatupona omatala si bwala. Asaraia matauna Maaseya latula e tabula Ananaia isai katupotala tuvaila, makatupona omatala la bwala.

²⁴Binui matauna Enadada latula isai katupotala tuvaila, eivitouula Asaraia ola bwala e ila ivitobu owokulu.

²⁵Palali matauna Usai latula isai katupotala tuvaila, matauna ikivila owokulu makwaina opapala bolela vatoi gweguya osi mwaininiga makatupona walakaiwa otatila kasi baku toyausa. Pedaia matauna Parosi latula isai katupotala tuvaila, iiyosi wala ilau ivitobu opilibomatu katitaikinela Kalapisila Sopi deli bolela vatoi makwaina kala kwala Bwala Kwebumaboma. (Makatupona katitaikinela valu makwaina yagala Opeli, e matausina Bwala Kwebumaboma topaisewala mesisikaisila baisa.)

²⁷E mina Tekowa isaiyaisi katupotala tuvaila, baisa ivigaki katupoyuwaisi eikaliaisi, isaisi metoya piliyuwela makwaina kwevakaigaga bolela vatoi paila kala kwala Bwala Kwebumaboma, e iiyosisi wala ilauwaisi katitaikina Opeli.

²⁸E mabudona tolula isaiyaisi katupotala tuvaila, mapilana opiliyavata eilokaia Kalapisila Wosa, e taitala taitala ikikaliai wala omatala la bwala titoulela.

²⁹E Sadoki matauna Imera latula, isai katupotala tuvaila omatala wala la bwala. Semaia matauna Sekanaia latula, matauna kala toyamata Kalapisila Pilibomatu isai katupotala tuvaila.

³⁰Ananaia matauna Selemaia latula, sola Anuni matauna tailima taitalela Salapi latula, isaiyaisi katupotala tuvaila, e baisa ivigaki katupoyuwaisi eikaliaiisi. Mesulam matauna Berekia latula isai katupotala tuvaila, makatupona omatala wala la bwala.

³¹Malikia matauna goula toyoudulela, isai katupotala tuvaila, iiyosi wala ilau ivitobu osi bwala matausina Bwala Kwebumaboma topaisewala deli matausina togigimwala, eilokaia makatupona Kalapisila Mipikadi,[7] katitaikina matabudona isisu okalisalewa owokulula kali.

³²E matausina toyoudulesi goula deli matausina togigimwala isebodaisi kalila valu. Ivitouulasi matabudona owokulu e iiyosisi wala ilauwaisi ivitobwaisi Kalapisila Sipi.